Час сэканд-гэнд

Час сэканд-гэнд
па-расейску: Время секонд хэнд
Вокладка першага выданьня
Жанр:	эсэ
Аўтар:	Сьвятлана Алексіевіч
Мова арыгіналу:	расейская
Публікацыя:	2013
Асобнае выданьне:	2013
Выдавецтва:	Мастацкая літаратура
Сэрыя:	Галасы Ўтопіі
Пераклад на беларускую:	2014
Перакладчык:	Валер Стралко і Ціхан Чарнякевіч
Носьбіт:	Папера

«Ча́с сэ́канд-гэ́нд» (па-расейску: Время секонд хэнд) — дакумэнтальна-нарысавая кніга беларускай пісьменьніцы Сьвятланы Алексіевіч. У гэтай кнізе распавядаецца ня столькі пра падзеі ХХ стагодзьдзя, колькі пра іх адлюстраваньне ў сэрцы паспалітага чалавека, прадстаўніка «новае гістарычнай супольнасьці людзей». Паводле жанру, гэта трагічны эпас савецкага народу, які балюча зьнікае на нашых вачах разам з распадам імпэрыі. Зьяўляецца пятай часткай мастацка-дакумэнтальнай нізкі «Галасы ўтопіі».

Публікацыя

Кніга апублікаваная ў 2013 годзе, а ў 2016 годзе перакладзеная Бэлай Шаевіч на ангельскую мову. Між гэтых падзеяў — Нобэлеўская прэмія па літаратуры, якую Сьвятлана Алексіевіч атрымала ў 2015-м. У студзень 2014 году кнігу пераклалі на беларускую мову.

У культуры

Пастановы

17 сакавіка 2018 году ў Менскім абласным драмтэатры, які працуе ў Маладзечне, адбыўся прэм’ерны паказ спэктакля «Час сэканд гэнд» паводле кнігі Сьвятланы Алексіевіч. У афішы жанр спэктакля вызначаны як «дакумэнтальная драма». Пастанову й сцэнічную рэдактуру ажыцьцявіў заслужаны дзяяч мастацтваў Валер Анісенка. У спэктаклі, які складаецца з пранізьлівых маналёгаў пра савецкую мінуўшчыну, задзейнічаная амаль уся трупа драмтэатру..