Перайсьці да зьместу

Рэмка Эвэнэпуль

Зьвесткі зь Вікіпэдыі — вольнай энцыкляпэдыі
Рэмка Эвэнэпуль
Агульная інфармацыя
Дата нараджэньня 25 студзеня 2000(2000-01-25)[1] (26 гадоў)
Месца нараджэньня
Краіна
Рост 171 см
Вага 62 кг
Спартовая інфармацыя
Клюб Судаль Кўік-Стэп
Спэцыялізацыя усе тыпы
Прафэсійныя клюбы
2019— Судаль Кўік-Стэп

Рэ́мка Э́вэнэпуль (па-нідэрляндзку: Remco Evenepoel; нарадзіўся 25 студзеня 2000 году, Аальст, Бэльгія) — бэльгійскі шасэйны раварыст, які выступае за каманду «Судаль Кўік-Стэп». Двойчы стаў Алімпійскім чэмпіёнам 2024 году ў Парыжы. Пераможца Вуэльты Гішпаніі (2022).

Кар’ера

[рэдагаваць | рэдагаваць код]

Футбол

[рэдагаваць | рэдагаваць код]

Пачынаў сваю спартовую кар’еру ў футболе, займаючыся ў акадэміях клюбаў «Андэрлехт» і ПСВ. У веку 14 гадоў вярнуўся ў «Андэрлехт».

Роварны спорт

[рэдагаваць | рэдагаваць код]
Спартовец сьвяткуе перамогу на Клясыцы Сан-Сэбастыяну ў 2019 годзе.

У 2017 годзе Эвэнэпуль пераключыўся з футболу на роварны спорт, у якім калісьці спаборнічаў ягоны бацька Патрык. Спартовец браў удзел у юнацкіх чэмпіянатах Эўропы і сьвету. У ліпені 2018 году стала вядома, што бэльгіец далучыцца да каманды Дэкёнінк Кўік-Стэп[3].

У сваім першым сэзоне Эвэнэпуль мусіў быў браць удзел у гонках на больш кароткіх этапах і прапусьціць брукаваныя аднадзённыя клясычныя гонкі[4][5]. У сваім дэбюце на Вуэльце Сан-Хуану, роварнік здабыў перамогу ў моладзевай клясыфікацыі і стаў 9-м у агульным заліку, а таксама ўпершыню ўзьняўся на подыюм у гонцы на час трэцяга этапу пасьля таварыша па камандзе Жуліяна Аляфіліпа і Валерыё Конці[6]. Першая прафэсійная перамога Эвэнэпуля прыпала на Тур Бэльгіі, дзе ён ачоліў генэральную клясыфікацыю, а таксама здабыў перамогу ў адным з этапаў і стаў першым у клясыфікацыі паводле пунктаў[7]. 3 жніўня 2019 году бэльгіец атрымаў сваю першую перамогу ў Сусьветным туры, перамогшы ў Клясыцы Сан-Сэбастыяну. 8 жніўня 2019 году Эвэнэпуль выйграў гонку на час на чэмпіянаце Эўропы на шашы 2019 году[8]. Спартовец пачаў сэзон 2020 году на Вуэльце Сан-Хуану, дзе перамог у індывідуальнай гонцы на час на трэцім этапе і генэральную клясыфікацыю агулам[9]. Маладзён здабыў яшчэ некалькі этапаў на розных роварных гонках. А пасьля перапынку, выкліканага пандэміяй каранавірусу, стаў пераможцам Туру Польшчы. На Джыра дзі Лямбардыі 2020 году раварыст трапіў у сур’ёзную аварыю, паваліўшыся падчас спуску і пасьля рэзкага закрутку[10][11]. Спартоўца хутка вывезьлі зь месца здарэньня супрацоўнікі МНС, а празь некалькі гадзінаў ягоная каманда паведаміла, што Эвэнэпуль атрымаў пералом тазу і пашкодзіў правае лёгкае, у выніку чаго прапусьціў наступныя плянаваныя спаборніцтвы[12].

Эвэнэпуль у чырвонай кашулі лідэра на Вуэльце Гішпаніі 2022 году.

Эвэнэпуль вярнуўся да Джыра д’Італіі 2021 году, але пасьля 17-га этапу быў вымушаны зьняцца праз новую траўму. Бэльгіец браў удзел у перанесеных летніх Алімпійскіх гульнях 2020 году ў Токіё як у шашэйнай гонцы, гэтак і ў гонцы на час, заняўшы месца ў дзясятцы найлепшых у апошняй з памянёных гонак. На чэмпіянаце сьвету 2021 году ў Фляндрыі ён здабыў свой другі мэдаль чэмпіянату сьвету, узяўшы бронзу ў гонцы на час. 24 красавіка, у веку 22 гадоў, Эвэнэпуль выйграў свую першую клясычную роварную гонку Льеж — Бастонь — Льеж пасьля таго як асобна ад групы рушыў у атаку на апошнія 14 км, умацаваўшы перавагу на фінішы на 48 сэкундаў. У пачатку верасьня роварнік здабыў перамогу на Вуэльце Гішпаніі 2022 году, што стала ягоным першым трыюмфам у Гранд-турах[13]. Бэльгіец узьняўся на першы радок на шостым этапе, захаваўшы яго да апошняга этапу.

23 красавіка 2023 году Эвэнэпуль здабыў перамогу ў гонцы Льеж — Бастонь — Льеж другі год запар. У траўні раварыст выступаў на Джыра д’Італіі як адзін з галоўных фаварытаў турніру[14]. У першай гонцы на час ён здабыў перамогу ў першым этапе і атрымаў ружовую кашулю лідэра шматдзённай гонцы, усталяваўшы значную перавагу ў часе над супернікамі ў агульнай класыфікацыі[15]. Пасьля страты лідэрства цягам першага тыдня, ён вярнуў сабе ружовую кашулю, але пасьля станоўчага выніку тэставаньня на каранавірус, быў вымушаны зьняцца з гонкі[16]. Пасьля акрыяньня спартовец браў удзел у Туры Швайцарыі, але там быў трэцім у агульным заліку.

Роварнік на Туры Краіны Баскаў у 2024 годзе.

Эвэнэпуль пачаў сэзон 2024 году зь перамогі на клясычнай гонцы Фігейры, якая ладзілася 11 лютага[17]. З 14 па 18 лютага браў удзел у Волце Алгарвэ, здабыўшы перамогу ў гэтай шматдзённай гонцы[18]. У гонцы Парыж — Ніцца, якая ладзілася з 3 па 10 сакавіка, роварнік выйграў залік паводле пунктаў і горны залік, заняўшы другое месца ў агулам. У красавіку бэльгіец зьняўся з Туру Краіны Баскаў. Спартовец атрымаў пералом раменьніцы і лапаткі, што патрабавала апэрацыі, якая была пасьпяхова зробленая 6 красавіка[19]. Улетку Эвэнэпуль дэбютаваў у гонках Тур дэ Франс. Першапачаткова ён зважаўсяадным з трох фаварытаў на перамогу ў агульнай класыфікацыі, але фінішаваў у агульным заліку на трэцім радку, прапусьціўшы наперад Ёнаса Вінгегора і Тадэя Пагачара. Бэльгіец выйграў толькі адзін этап гонкі, але ў выніку атрымаў белую кашулю найлепшага маладога гоначніка[20]. 27 ліпеня, усяго праз 6 дзён па сканчэньні Тура Францыі, Эвэнэпуль заваяваў золата ў гонцы на час на Алімпійскіх гульнях 2024 году ў Парыжы, апярэдзіўшы Філіпа Ганна на 15 сэкундаў[21]. Праз тыдзень, 3 жніўня, ён таксама здабыў алімпійскае золата ў шашэйных гонках, не зважаючы на сапсаваную покрыўку. Бэльгіец стаў першым чалавекам, які здабыў залатыя мэдалі ў абодвух шашэйных роварных гонках на адной Алімпіядзе.

Крыніцы

[рэдагаваць | рэдагаваць код]
  1. ↑ Remco Evenepoel // Transfermarkt (мн.) — 2000.
  2. ↑ ProCyclingStats (анг.) — 2013.
  3. ↑ «Evenepoel vanaf 2019 al prof bij Quick-Step: „Sky kwam nog met gek bod“». Sporza.
  4. ↑ «Evenepoel reveals schedule for debut with Deceuninck-QuickStep». CyclingNews.
  5. ↑ «Evenepoel will not ride cobbled Classics in 2019». CyclingNews.
  6. ↑ «Vuelta a San Juan Stage 3 Results». Edosof.
  7. ↑ «Baloise Belgium Tour: Evenepoel takes overall victory». CyclingNews.
  8. ↑ «UEC Road European Championships 2019: Men’s time trial Results». CyclingNews.
  9. ↑ «Remco Evenepoel wins Vuelta a San Juan». CyclingNews.
  10. ↑ «Remco Evenepoel suffers bridge fall after crash during Il Lombardia». BBC Sport.
  11. ↑ «Remco Evenepoel crash: Cycling prodigy in hospital after falling 30 feet off bridge during Il Lombardia». Independent.
  12. ↑ «Remco Evenepoel Update». Deceuninck-Quickstep.com.
  13. ↑ «Vuelta a España: Belgium’s Remco Evenepoel seals maiden Grand Tour win». BBC Sport.
  14. ↑ «Giro d’Italia 2023 route revealed: three time trials, cruel climbs, and an eye-watering finale». VeloNews.
  15. ↑ «Remco Evenepoel obliterates rivals to win Giro d’Italia opening time trial». NBC Sports.
  16. ↑ «Leader Remco Evenepoel pulls out of Giro d’Italia with Covid-19». The Guardian.
  17. ↑ «Evenepoel claims solo victory at Figueira Champions Classic». CyclingNews.
  18. ↑ «Evenepoel wins Volta ao Algarve with time trial victory». CyclingNews.
  19. ↑ «Remco Evenepoel undergoes successful surgery». Soudal Quick-Step Team.
  20. ↑ «Pogačar wins stage 21 and the Tour de France». The Guardian.
  21. ↑ «Remco Evenepoel Blasts To Olympic Time Trial Gold». FloBikes.

Вонкавыя спасылкі

[рэдагаваць | рэдагаваць код]
Атрымана з «https://be-tarask.wikipedia.org/w/index.php?title=Рэмка_Эвэнэпуль&oldid=2666720»