Ольбарг (гандбольны клюб)

Ольбарг
Поўная назва	Aalborg Håndbold
Кароткая назва	Aalborg
Заснаваны	2000
Арэна	Гігантыюм Зьмяшчальнасьць: 5020
Галоўны трэнэр	Майк Махульля
Чэмпіянат	Дацкая ліга
2023—2024	1 месца
Форма
Клюбныя колеры
Хатняя Выязная
Спасылкі
Афіцыйная бачына
Галерэя здымкаў у Вікісховішчы

«Ольбарг» (па-дацку: Aalborg Håndbold‎) — дацкі гандбольны клюб з аднайменнага гораду. Выступае ў Дацкай мужчынскай лізе. Свае хатнія матчы ладзіць на арэне Гігантыюм.

Гісторыя

У 2000 годзе «Ольбарг» паўстаў, пераняўшы ліцэнзію ад іншага былога клюбу гораду. Свой першы чэмпіянат клюб выйграў у 2010 годзе, перамогшы ў фінальнай сэрыі матчаў зь лікам 2:1 клюбу «Кольдынг». Пры гэтым лёс фіналу вырашаўся ў сэрыі штрафных кідкоў. У студзені 2011 году клюб прайшоў праз працэдуру рэфармаваньня. Фундатарам клюбу выступіў бізнэсовец Эйгільд Б. Крыстэнсэн, а дырэктарам каманды стаў Ян Лярсэн. Абодва дзеячы паходзяць з Ольбаргу. Наступным разам клюб стаў пераможцам чэмпіянату Даніі ў 2013 годзе, зноўку адолеўшы супраціў «Кольдынгу».

У 2014 годзе «Ольбарг» заняў другое месца і прабіўся ў 1/16 фіналу Лігі чэмпіёнаў, дзе пацярпеў паразу ад «Барсэлёны». Посьпех «Ольбаргу» працягнуўся ў 2015 годзе, калі яны зноўку прасунуліся ў 1/16 фіналу Лігі чэмпіёнаў. Супернікам дацкага клюбу яшчэ раз была «Барсэлёна», якая ізноў выбіла ольбарскі клюб. У 2017 годзе «Ольбарг» выйграў чэмпіянат Даніі ў трэці раз, а з 2019 па 2021 гады яны здабывалі перамогу ў айчынным першынстве тройчы запар. У 2021 годзе «Ольбарг» выйшаў у фінал Лігі чэмпіёнаў ЭГФ, стаўшы першай дацкай камандай, якая здолела дамагчыся такога плсьпеху. У фінале «Ольбарг» прагуляў «Барсэлёне». У 2024 годзе дацкі клюб яшчэ раз прасунуўся да фіналу Лігі чэмпіёнаў, дзе саступіў свайму звыкламу суперніку з Барсэлёны.

Дасягненьні

Нацыянальныя

• Дацкая ліга:
  • : 2010, 2013, 2017, 2019, 2020, 2021, 2024
• Кубак Даніі:
  • : 2019, 2021
• Супэркубак Даніі:
  • : 2012, 2019, 2020, 2021, 2022

Вонкавыя спасылкі

• Афіцыйная бачына