Мядзельская Кальварыя

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку

Каардынаты: 54°53′38.70″ пн. ш. 26°54′18.18″ у. д. / 54.8940833° пн. ш. 26.90505° у. д. / 54.8940833; 26.90505

Рэшткі капліцы і крыжы, усталяваныя на Кальварыйскім узгорку

Мядзельская Кальварыя (Галгофа; імітацыя Крыжовага Шляху Езуса Хрыста) — гістарычнае месца пакланеньня вернікаў-каталікоў, задуманая і пабудаваная паводле пляна Крыжовай Дарогі ў Ерузалеме. Мядзельская Кальварыя зьяўляецца ўнікальным аб’ектам, бо такога тыпу пабудовы ў сучаснай Беларусі не існуюць. Месцазнаходжаньні 18 былых каплічак і іх парэшткаў пазначаныя драўлянымі крыжамі. Мядзельская Кальварыя знаходзіцца на паўночнай ускраіне Мядзела паабапал аўтадарогі МядзелПаставы празь вёску Чарняты. Двойчы на год (у ліпені і верасьці) вернікі Мядзельскай парафіі Маці Божай Шкаплернай ушаноўваюць Кальварыю крыжовым паходам, агульная працягласьць маршруту якога складае больш за 5 км, і набажэнствамі.

Гісторыя[рэдагаваць | рэдагаваць крыніцу]

У 1772 годзе Мядзельская Кальварыя складалася з 21 капліцы і 8 брамаў, якія былі разьмешчаныя па прылеглых палях вакол касьцёла. Капліцы былі збудаваныя з дрэва на каменным падмурку. У саміх капліцах знаходзіліся абразы і драўляныя фігуры.

Кальварыя была асьвечаныя суфраганам беларускім біскупам Фэліксам Тавянскім 8 жніўня 1772 году. Працэдура асьвячэньня доўжылася 4 дні. У 1866 годзе парафія была перададзеная праваслаўнаму духавенству і Кальварыя пэўны час заставалася занядбанай. У 19271929 гадох айцец Браніслаў Ярасінскі ініцыяваў адбудову Кальварыі. У той час зямля, дзе была разьмешчаная кальварыя, належала Генрыку Козелу-Паклеўскаму, які жыў у Старым Мядзелі і вызначыў плошчу пад капліцу. Айцец Браніслаў з дапамогай мясцовых жахароў і пляну Кальварыі пад польскім мястэчкам Зэбжыдова вызначыў месца для астатніх капліцаў. Пасьля сьмерці Генрыка Козела-Паклеўскага зямля, дзе разьмяшчалася Кальварыя, была выкупленая кармэлітамі за сродкі, атрыманыя ад продажу фальварку Мікасецк.

У 19331938 гадох з цэглы, каменьня і пустакоў, пакрытых бляхай, былі пабудаваныя 15 капліцаў. Папулярнасьць Кальварыі значна павялічылася, і шэрагі пілігрымаў зьдзяйсьнялі сюды свае паломніцтвы.

2 лістапада 1942 году падчас Вялікай Айчыннай вайны Мядзелская Кальварыя, якая на той час налічвала блізу 40 капліцаў, была амаль цалкам разабраная і зьнішчаная.

Сучасны стан[рэдагаваць | рэдагаваць крыніцу]

Miadzielskaja kalvaryja.jpg

Цяпер на месцы Кальварыі ўсталяваныя 18 драўляных крыжоў, якія сымбалізуюць месцазнаходжаньні былых капліцаў. Каля крыжоў знаходзяцца адна адноўленая капліца, парэшткі сьценаў двох капліцаў на Кальварыйскім узгорку і рэшткі падмуркаў яшчэ трох капліцаў. Кальварыя даглядаецца вернікамі, але з-за адсутнасьці сродкаў на аднаўленьне агульны яе стан пагаршаецца. У сьпіс гісторыка-культурных каштоўнасьцяў Рэспублікі Беларусь Мядзельская Кальварыя не ўваходзіць. Мясцовыя моладзевыя актывісты распрацавалі плян аднаўленьня Кальварыі[1].

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]