Здэнка Шэлінгава

Дабраславёная Здэнка Шэлінгава
Дабраславёная Здэнка Шэлінгава
Сьвятая
Нарадзілася	24 сьнежня 1916 Крыва на Ораве, Долны Кубін, Аўстра-Вугорская імпэрыя
Памерла	31 ліпеня 1955 (48 гадоў) Трнава, Чэхаславаччына
Шануецца	Рыма-каталіцкі касьцёл
Дзень памяці	31 ліпеня
Патрон	перасьледваных вернікаў мэдсёстраў вязьняў
Атрыбуты	манаская вопратка
Здэнка Шэлінгава ў Вікісховішчы

Здэ́нка Шэ́лінгава (па-славацку: Zdenka Schelingová), ад нараджэньня Цэ́цылія Шэлінгава (славац. Cecília Schelingová; 24 сьнежня 1916, Крыва на Ораве, Долны Кубін, Аўстра-Вугорская імпэрыя — 31 ліпеня 1955, Трнава, Чэхаславаччына) — славацкая рыма-каталіцкая манашка Кангрэгацыі міласэрных сёстраў Сьвятога Крыжа, ахвяра камуністычнага перасьледу ў Чэхаславаччыне, каталіцкая дабраславёная.

Жыцьцяпіс

Была дзясятай з адзінаццаці дзяцей у сям’і Паўла Шэлінга і Зузаны Панікавай. Пры хросьце 27 сьнежня атрымала імя Цэцылія.

Скончыла школу (1923—1931) ў роднай Крывай, дзе таксама ўпершыню пазнаёмілася зь дзейнасьцю Міласэрных сёстраў Сьвятога Крыжа. 6 ліпеня 1931 сышла ў кляштар кангрэгацыі ў Подунайскіх Біскупіцах. У 1933—1935 вучылася на мэдсястру, пасьля прайшла курс радыялёгіі. 28 студзеня 1936 року распачала свой навіцыят і ўзяла імя Здэнка. 30 студзеня 1937 склала манаскія абяцаньні. У 1937—1940 роках працавала інтэрнам у шпіталі ў Браціславе. З 1940 — санітарка ў Гумэннэ, у 1942 вярнулася ў Браціславу, была лябаранткай, пасьля тэхнічкай рэнтгеналягічнага аддзяленьня мескай клінікі.

Пасьля ўсталяваньня камуністычнай улады ў 1948 року пачаўся масавы перасьлед рэлігіі. Усім манашкам было прапанавана выйсьці з кангрэгацыі пад пагрозай страціць працу ў клініцы. Большасьць манашак, у тым ліку і Шэлінгава, адмовіліся, але на працы засталася з-за адсутнасьці кваліфікаванай замены.

19 лютага 1952 року дапамагла ўцячы з-пад варты сьвятару Штэфану Кошцьялу, які трапіў да яе ў клініку на непрацяглы час. Зь ейных словаў, вырашылася на гэты ўчынак, пачуўшы ад ахоўнікаў, што Кошцьяла чакае суд і ссылка ў Расею, „адкуль той ужо ня вернецца“. Каб падмануць ахоўніка, Здэнка падсыпала таму ў гарбату дрымотныя лекі.

29 лютага пры спробе дапамагчы ўцёкам трох ксяндзоў і трох сэмінарыстаў была арыштаваная і катаваная. 17 чэрвеня таго ж году прыгавораная да 12 гадоў пазбаўленьня волі і 10 гадоў пазбаўленьня грамадзянскіх правоў. Пакараньне адбывала сьпярша ў Браціславе, пасьля яе пераводзілі ў Рымаўскую Собату, Пардубіцы, Брно і ўрэшце на Панкрац у Прагу. Катаваньні падчас сьледзтва значна згоршылі ейнае здароўе, у турме ў дадатак разьвіўся рак малочнай залозы. У мэдыцынскай дапамозе ёй адмовілі, ампутаваўшы пазьней грудзі без анэстэзіі. Здароўе працягвала пагаршацца далей, зьявіліся мэтастазы, і 16 красавіка 1955 року яе датэрмінова вызвалілі з турмы, баючыся, што яна там памрэ.

Працаваць у Браціславе ёй было забаронена, таму з 19 красавіка працавала ў трнаўскім шпіталі; неўзабаве памерла падчас імшы. 2 жніўня пахаваная на могілках у Трнаве; у 1979 року перапахаваная на кляштарных могілках Подунайскіх Біскупіц (раён Браціславы). Адтуль 6 чэрвеня 2003 парэшткі перанесеныя і цяпер знаходзяцца ў кляштарным касьцёле Сьвятога Крыжа ў Біскупіцах.

6 красавіка 1970 року суд зьняў зь яе абвінавачваньне ў дзяржаўнай здрадзе, а 18 лістапада Вярхоўны суд Славаччыны рэабілітаваў за адсутнасьцю складу злачынства.

Бэатыфікацыя

22 лютага 2000 року Кангрэгацыя па кананізацыі сьвятых назвада Здэнку Шэлінгаву Служкай Божай. З 18 верасьня 2000 да 12 студзеня 2003 вялося вывучэньне ейнага жыцьця. 14 верасьня 2003 року падчас візыту папы Яна Паўла II бэатыфікаваная.

Вонкавыя спасылкі

• Бачына блаславёнай Здэнкі Шэлінгавай  (славацк.)
• Агіяграфічнае кола  (анг.)
• Каталіцкія сьвятыя  (анг.)
• Памяць народу  (чэс.)
• Здэнка Шэлінгава ў Facebook
• Кангрэгацыя міласэрных сёстраў Сьвятога Крыжа  (анг.)