Трандуіл

Тра́ндуіл (на сындарыне Thranduil) — у легендарыюме Дж. Р. Р. Толкіна кароль лясных эльфаў Ліхалесься. Упершыню згадваецца ў тэксьце твору «Хобіт, або Туды і назад».

Біяграфія

Сын Орафэра, бацька Ляголаса. Ён стаў каралём лясных эльфаў пасьля сьмерці яго бацькі ў бітве Апошняга Зьвязу. Дакладная дата нараджэньня невядомая. Як было сказана ў «Няскончаных казаньнях», і Орафэр, і Трандуіл — эльфы з Дарыяту, якія ў пачатку Другой Эпохі адправіліся на ўсход, і, перабраўшыся праз Туманныя горы, заснавалі там каралеўства лясных эльфаў. Паводле тэксту «Хобіта», ён меў валасы залатога колеру.

Трандуіл у «Хобіце»

Пасьля паляпшэньня адносінаў з гномамі ён скарыстаўся іх дапамогай пры будаўніцтве свайго падземнага палаца. Гэты палац таксама служыў крэпасьцю, скарбніцай і турмой. Праўда, Трандуіл меў слабасьць да срэбра і самацьветаў, аднак скарбаў у яго было менш, чым у эльфійскіх каралёў старажытнасьці, і праз гэта ён часта быў з гномамі ў нацягнутых адносінах (чаму, па ўсёй верагоднасьці, нямала спрыяла старажытная варожасьць праз рабаваньне гномамі Дарыяту), таму Трандуіл вельмі жорстка абышоўся з Торынам і яго кампаніяй.

У дні Трандуіла паміж эльфамі Ліхалесься і людзьмі Эсгарота былі ўсталяваны разьвітыя гандлёвыя адносіны: эльфы куплялі ў людзей харчы, асабліва якаснае віно з Дарвініёну, наўзамен збываючы страявы лес, сплаўляючы яго ўніз па рацэ.

Пасьля гібелі цмока Смога Трандуіл рушыў з войскам да Эрэбару, аднак, даведаўшыся пра бядотны стан жыхароў Эсгарота, дапамог ім правіянтам і адправіў майстроў для дапамогі ў пабудове новых дамоў. Сам жа ён выступіў з войскам разам з апалчэньнем Эсгарота да Самотнай гары і абсадзіў яе разам з Бардам, утрымліваючы блякаду гары аж да падыходу Даіна.

Пасьля раптоўнага зьяўленьня оркаў Туманных гораў Трандуіл узначаліў эльфійскае войска ў Бітве Пяці Войскаў і ваяваў на адным боку разам з гномамі і людзьмі. За гэта пасьля перамогі Бард са сваёй часткі скарбаў (адна чатырнаццатая частка ад скарбу Смога) узнагародзіў яго за ўдзел і дапамогу. У падарунак ад Більба Трандуіл атрымаў срэбныя з жэмчугам каралі (падарунак Даіна) як «плату» за ўсё зьедзенае і выпітае ў палацы Трандуіла, калі Більба вымушаны быў хадзіць нябачным да таго, як здолеў зладзіць уцёкі з гномамі. Трандуіл жа назваў яго Сябрам эльфаў.

Трандуіл ва «Ўладары Пярсьцёнкаў»

Па просьбе Арагорна Трандуіл трымаў пад вартай Глыкса датуль, пакуль той ня зьбег падчас раптоўнага ўварваньня оркаў. Трандуіл адправіў свайго сына Ляголаса да Эльранда, каб паведаміць пра гэта. У дні Вайны Пярсьцёнка яго каралеўства падверглася нападу войска Дол Гульдура, аднак у Бітве пад дрэвамі (анг. Battle Under the Trees) эльфы Ліхалесься выдужалі і самі адкінулі войскі Саўрона. Пасьля падзеньня Саўрона землі пад уладай Трандуіла сталі звацца Лесам Зялёнага Лісьця (сынд. Eryn Lasgalen).

Трандуіл у фільмах

У фільмах рэжысэра Пітэра Джэксана «Хобіт: Нечаканае падарожжа» і «Хобіт: Смогава пустэча» Трандуіла граў актор Лі Пэйс. Таксама Трандуіл зьявіцца і ў трэцім фільме трылёгіі «Хобіт». У першым фільме ён граў нямую ролю.