Сьвятлана Калядка

Вікіпэдыя мае артыкулы пра іншых асобаў з прозьвішчам Калядка.

Сьвятлана Калядка
Дата нараджэньня	31 траўня 1971(1971-05-31) (53 гады)
Месца вучобы	Берасьцейскі дзяржаўны ўнівэрсытэт імя А. С. Пушкіна (1993)
Занятак	літаратуразнаўца, літаратар
Навуковая сфэра	літаратуразнаўства
Месца працы	Інстытут літаратуры імя Янкі Купалы
Навуковая ступень	доктар філялягічных навук (2021)
Узнагароды	Нацыянальная літаратурная прэмія (2018)

Сьвятла́на Ўладзімераўна Каля́дка (31 траўня 1971) — беларуская літаратуразнаўца. Сфэра навуковых інтарэсаў — тэарэтычная паэтыка, гісторыя літаратуры, гэндарныя дасьледаваньні, літаратуразнаўчая тэорыя паэтычнай эмоцыі, тэксталёгія, творчасьць клясыкаў Максіма Танка, Яўгеніі Янішчыц, а таксама сучасных аўтараў.

Жыцьцяпіс

Скончыла Берасьцейскі дзяржаўны пэдагагічны інстытут імя А. С. Пушкіна ў 1993 годзе, асьпірантуру пры Інстытуце літаратуры імя Янкі Купалы НАН Беларусі ў 1996 годзе. Кандыдат філялягічных навук (1999), дацэнт (2007). Вядучы навуковы супрацоўнік Інстытуту літаратуразнаўства імя Янкі Купалы НАН Беларусі.

Творчасьць

Аўтар манаграфій «Непрыручаная птушка Палесься: Творчая індывідуальнасьць Яўгеніі Янішчыц» (2007), «Беларуская сучасная жаночая паэзія: Мастацкія канцэпцыі „жаночага шчасьця“» (2010), «Максім Танк: новыя факты, матэрыялы, інтэрпрэтацыі» (2014), «Літаратуразнаўчая тэорыя паэтычнай эмоцыі» (2018).

Адзін з аўтараў калектыўных манаграфій «Сучаснае беларускае літаратуразнаўства: Сыстэма каштоўнасьцей і прыярытэтаў» (2006), «Літаратура пераходнага пэрыяду: Тэарэтычныя асновы гісторыка-літаратурнага працэсу» (2007), «Міждысцыплінарныя дасьледаваньні актуальных праблем тэорыі літаратуры» (2011), «Человек-творец в художественном пространстве славянских литератур» (Санкт-Пецярбург, 2013) і інш.

Адзін з аўтараў вучэбных дапаможнікаў «Русский язык: краткий справочник: Орфография. Пунктуация» (2016, у суаўтарстве з І. Капыловым), «Школьный курс. Русский язык. 5-11 классы» (2016, у суаўтарстве з І. Капыловым).

Укладальнік і складальнік Збору твораў Максіма Танка ў 13 тамах (2006—2012), чатырохтомнага выданьня «Яўгенія Янішчыц: творы, жыцьцяпіс, камэнтары» (Т.1, 2016; Т.2, 2017, Т.3, 2019). Таксама аўтар больш за 180 навуковых прац (навуковыя, навукова-папулярныя, крытычныя артыкулы, выступы на рэспубліканскіх, міжнародных навуковых канфэрэнцыях, рэцэнзіі і г.д.). Выступала на канфэрэнцыях і публікавалася ў замежных навуковых выданьнях Украіны, Польшчы, Расеі, Летувы, Вугоршчыны.

Удзельнічала ў стварэньні дакумэнтальнага фільму пра Яўгенію Янішчыц «Небясьпечны талент» (2008), «Яўгенія Янішчыц: сьмерць паэта» (2018).

Узнагароды

За манаграфію «Літаратуразнаўчая тэорыя паэтычнай эмоцыі» атрымала Нацыянальную літаратурную прэмію Рэспублікі Беларусь ў намінацыі «Лепшы твор літаратурнай крытыкі і літаратуразнаўства» за 2018 год.

Бібліяграфія

Навуковыя манаграфіі, калектыўныя манаграфіі

• Літаратуразнаўчая тэорыя паэтычнай эмоцыі. — Менск : Беларуская навука, 2018. — 350 с.
• «Жаночае» і «мужчынскае» пісьмо ў сучаснай беларускай паэзіі // Тэорыя літаратуры ў дыялёгу эўрапайскіх культур / рэд. М. А. Тычына ; Цэнтар дасьледаваньняў беларускай культуры, мовы і літаратуры НАН Беларусі. — Менск : Беларус. навука, 2017. — С. 163—183.
• Максім Танк: новыя факты, матэрыялы, інтэрпрэтацыі. — Менск: Беларус.навука, 2014. — 485 с.
• Модель «женского счастья» в поэзии Раисы Боровиковой // Человек-творец в художественном пространстве славянских литератур / Отв. ред. Н. М. Куренная, М. В. Лескинен. — М.: Институт славяноведения РАН; Санкт-Пецярбург: Нестор-История, 2013. — С. 242—258.
• Экзістэнцыяльныя праблемы ў беларускай паэзіі // Міждысцыплінарныя даследаванні актуальных праблем тэорыі літаратуры. — Менск: Бел.навука, 2011. — С. 200—245.
• Беларуская сучасная жаночая паэзія: Мастацкія канцэпцыі «жаночага шчасця». — Менск: Бел.навука, 2010. — 163 с.
• Непрыручаная птушка Палесься: Творчая індывідуальнасьць Яўгеніі Янішчыц. — Менск: Бел. навука, 2007. — 216 с.
• Псыхалягічныя тыпы ў інтэрсуб’ектыўнай прасторы жаночай лірыкі каханьня // Сучаснае беларускае літаратуразнаўства: сыстэма каштоўнасьцей і прыярытэтаў. — Менск: Бел. навука, 2006. — С. 236—269.
• Жанчына ў соцыюме: гэндэрны асьпект (па творчасьці беларускіх паэтэс ХХ — пач. ХХІ стст.) // Літаратура пераходнага пэрыяду: тэарэтычныя асновы гісторыка-літаратурнага працэсу. — Менск: Бел. навука, 2007. — С. 179—263.
• Паэзія Яўгеніі Янішчыц: станаўленьне творчай індывідуальнасьці: Аўтарэфэрат дысэртацыі на атрыманьне навуковай ступені кандыдата філялягічных навук. Менск, 1999. — 20 с.

Падрыхтоўка і выданьне Збору твораў

• Танк, М. Збор твораў : у 13 т. Т. 1—13 / Максім Танк ; Нацыянальная акадэмія навук Беларусі, Інстытут літаратуры імя Янкі Купалы. — Менск : Беларус. навука, 2006—2012.
• Яўгенія Янішчыц: творы, жыцьцяпіс, камэнтары. У 4 т. / уклад: С. У. Калядка, Т. П. Аўсяннікава; рэд. тома Л. Г. Кісялёва. — Менск: Беларуская навука, Т. 1 — 2016; Т. 2. — 2017; Т. 3 — 2019.

Вонкавыя спасылкі

• У праграме «Суразмоўцы»