Пасма пра Эймунда
Пасма пра Эймунда[1] (Эймундава сага) — ісьляндзкая сага, якая захавалася ў складзе «Сагі пра Олава Сьвятога» паводле «Кнігі з Плоскага вострава», 1387—1394 гады[2]. Апісвае падзеі пачатку XI стагодзьдзя ў Кіеўскай Русі, калі конунг Эймунд Хрынгсан і яго дружына бралі ўдзел у змаганьні за сталец па сьмерці вялікага князя Ўладзімера Сьвятаславіча (1015 год) на баку наўгародзкага князя Яраслава Мудрага супраць полацкага князя Брачыслава Ізяславіча.
Зьмяшчае шмат зьвестак, якіх няма у рускіх летапісах або супярэчаць ім (напрыклад, сьведчыць, што князя Барыса забіў Яраслаў, а не Сьвятаполк; вараг Эймунд княжыў у Полацку ды іншыя). У гістарыяграфіі існуюць супярэчлівыя погляды на верагоднасьць зьвестак сагі.
Кароткі пераказ блізкіх паводле зьместу падзеяў зьмяшчаецца ў пралёгу «Сагі пра Інгвара Вандроўніка». Галоўная адрознасьць ад «Эймундавай сагі» у тым, што галоўны герой не нарвэжац, а швэд — Эмунд (Эймунд) Улафсан.