Мошэ Бярнштэйн

Моше Бярнштэйн
Дата нараджэньня	1920
Месца нараджэньня	Бяроза, Польская Рэспубліка
Дата сьмерці	2006
Месца сьмерці	Ізраіль
Занятак	мастак, паэт
Плынь	жывапіс, малюнак, графіка
Моше Бярнштэйн у Вікісховішчы

Мо́шэ Бярнштэ́йн (па-ангельску: Moshe Bernshtein, 1920, Бяроза — 2006, Ізраіль) — жыдоўскі мастак, паэт.

Жыцьцяпіс

Нарадзіўся ў 1920 року ў Бярозе ў сям’і артадаксальных жыдоў. Скончыўшы тут Талмуд Тору і школу Тарбуту, пераехаў у Варшаву дзеля навучаньня выяўленчаму мастацтву.

У 1935 паступіў у мастацкую акадэмію Вільні. Пасьля падзелу Польшчы ў 1939 пераехаў у Беласток, значны жыдоўскі мастацкі і культурны цэнтар. Здолеў пазьбегнуць этапаваньня ў Беластоцкае гета, уцёкшы ў Расею. Асеў у Саратаве, працаваў у калгасе, пасьля мастаком у адной з вытворчых майстэрняў.

Па вайне выехаў у Польшчу, адтуль разам зь іншымі ўцекачамі празь Нямеччыну ў Італію. Карабель, які перавозіў нелегальных імігрантаў, быў арыштаваны брытанцамі падчас высадкі ў Палестыне, Машэ Бярнштэйн разам зь іншымі нелегаламі трапіў у канцэнтрацыйны лягер на Кіпры. Праз два рокі ён здолеў урэшце трапіць у Палестыну і ў жніўні 1948 мабілізаваны ў войска.

Пасьля службы некалькі рокаў жыў у кібуцы Эйн-Гарод, ажаніўся і гадаваў дзьвюх дачок.

Творчасьць

У 1949 року ўпершыню выставіў свае творы на выставе мастакоў-рэпатрыянтаў у Тэль-Авіве. Агулам удзельнічаў у больш як 50 мастацкіх выставах. Працы экспанаваліся ў Расеі, ЗША, Нідэрляндах, Францыі, Італіі, Вэнэсуэле.

Працаваў у галіне жывапісу, малюнку і графікі. Валодаў тэхнікай тэмперы, акрылавымі фарбамі, тушай.

Працы захоўваюцца ў музэях і прыватных калекцыях у Ізраілі і за мяжой.

Узнагароды

• Прэмія «Мангер» (1982)
• Прэмія «Шалом Алейхем» (1990)
• Ганаровы грамадзянін муніцыпалітэту Тэль-Авіў — Яфа (1992)
• Узнагарода Інстытуту вывучэньня Галакосту (1999)

Літаратура

• Алена Зялевіч. Выкрадзенае дзяцінства // Новы час. — 4 траўня 2011. — № 18 (289).

Вонкавыя спасылкі

• Жыцьцяпіс(недаступная спасылка)^(анг.)