Крывяліцк

Крывяліцк
Краіна:	Беларусь
Вобласьць:	Магілёўская
Раён:	Краснапольскі
Сельсавет:	Сідараўскі
Часавы пас:	UTC+3
Тэлефонны код:	+375 2238
Нумарны знак:	6
Геаграфічныя каардынаты:	53°17′57″ пн. ш. 31°6′56″ у. д.
Крывяліцк на мапе Беларусі ± Крывяліцк Крывяліцк

Крывялі́цк — былая вёска ў Краснапольскім раёне Магілёўскай вобласьці. Уваходзіла ў склад Сідараўскага сельсавету. Разьмешчана за 23 км на паўднёвы захад ад Краснапольля, 132 км ад Магілёва, 74 км ад чыгуначнай станцыі Камунары на лініі Крычаў—Сураж (Расея). Транспартныя сувязі па мясцовай дарозе і далей па шашы на Краснапольле.

Геаграфія

Рэльеф раўнінны. На паўднёвым захадзе і поўначы межавала зь лесам. У цэнтры і на ўсход — 2 сажалкі.

Гісторыя

Пад уладай Расейскай імпэрыі

У 1858 годзе вёска Крывяніцк, уласнасьць памешчыка.

У 1880 годзе частка вяскоўцаў займалася сталярным і кравецкім промысламі. Мелася школа граматы. У 1897 годзе вёска Крывялецк (яна ж Гарцуеўка) у Наваельненскай воласьці Чэрыкаўскага павету Магілёўскай губэрні. У 1903 годзе адкрыта школа, у якой у 1905 годзе навучалася 48 хлопчыкаў і 12 дзяўчынак.

Найноўшы час

У 1909 годзе працавалі 2 ветракі. У 1925 годзе дзейнічала працоўная школа 1-й ступені, у якой было 59 вучняў, бібліятэка, хата-чытальня. У 1930-я гады вяскоўцы ўступілі ў калгас.

У Нямецка-савецкую вайну з жніўня 1941 году да 2 кастрычніка 1943 году акупавана нямецка-фашысцкімі захопнікамі. 40 вяскоўцаў змагаліся на фронце, 7 — у партызанскіх атрадах, 21 зь іх загінулі. У 1986 годзе ў складзе калгаса імя Жданава (цэнтар — былая в. Карма-Пайкі).

Пасьля катастрофы на Чарнобыльскай атамнай электрастанцыі 1986 году вёска адселена ў сувязі з радыяцыйным забруджаньнем.

Уваходзіла ў склад Наваельненскага сельсавету. З 31 студзеня 1992 году ў складзе Сідараўскага сельсавету.

Ліквідаваная ў 2006 годзе.

Пляніроўка

Складалася з просталінейнай вуліцы, арыентаванай з паўднёвага захаду на паўночны ўсход, ад канцоў якой адыходзілі пэрпэндыкулярныя кароткія просталінейныя вуліцы, на паўднёва-ўсходняй ускраіне быў вытворчы сэктар.

Насельніцтва

• XIX стагодзьдзе:
  • 1858 — 23 двары, 206 жыхароў.
  • 1880 — 38 двароў, 336 жыхароў.
• XX стагодзьдзе:
  • 1909 — 90 двароў, 629 жыхароў.
  • 1926 — 91 двор, 598 жыхароў.
  • 1986 — 39 гаспадарак, 83 жыхары.

Асобы

• Андрэй Сьцефаненка (1900—1957) — беларускі геоляг і гідроляг.

Літаратура

• Гарады і вёскі Беларусі: Энцыклапедыя. Т. 6, кн. 2. Магілёўская вобласць / У. Д. Будзько і інш. — Мн.: БелЭн, 2009. — 591 с. ISBN 978-985-11-0440-2.