Гульня шкляных пэрлаў

Гульня шкляных пэрлаў
Das Glasperlenspiel
Жанр:	раман
Аўтар:	Гэрман Гэсэ
Мова арыгіналу:	нямецкая
Год напісаньня:	1931—1942
Публікацыя:	1943
Перакладчык:	Васіль Сёмуха
Папярэдні твор:	Паломніцтва ў Краіну Усходу[d]
Электронная вэрсія

«Гульня шкляных пэрлаў» (па-нямецку: Das Glasperlenspiel) — апошні і галоўны раман нямецка-швайцарскага пісьменьніка Гэрмана Гэсэ, над якім ён працаваў з 1931 па 1942 год (кніга была скончаная 29 красавіка 1942 году). Упершыню раман апублікаваны 18 лістапада 1943 году ў цюрыскім выдавецтве «Фрэтц і Васмут» (Fretz & Wasmuth) у двух тамах. У 1946 годзе Гэсэ быў узнагароджаны Нобэлеўскай прэміяй у галіне літаратуры ў тым ліку і за гэты твор.

Галоўны герой кнігі — Ёзэф Кнэхт. Яго тытул — Магістар гульні (лац. Magister Ludi). Тэрмін Magister Ludi — гэта калямбур: 'ludus' на лацінскай мове можа азначаць як «гульня», так і «школа». Такім чынам, Magister Ludi можа азначаць як «Магістар гульні», так і «школьны настаўнік».

Алюзіі

Назва правінцыі Касталія, паходзіць ад імя німфы Касталіі, якую Апалён ператварыў у крыніцу, што даруе натхненьне таму, хто зь яе напіўся.

Імёны пэрсанажаў рамана зьмяшчаюць адсылкі на рэальных людзей. Гэтак, папярэдніка Ёзэфа Кнэхта на пасадзе магістра гульні звалі Томас ван дэр Травэ, і ў яго імені ўгадваецца Томас Ман, які нарадзіўся ў Любэку на рацэ Травэ. Таленавіты, але не зусім стабільны сябра Ёзэфа Кнэзта, носіць імя Фрыц Тэгулярыюс, што зьяўляецца адсылкай на Фрыдрыха Ніцшэ, айцец Якаб, імаверна, мае за аснову Якаба Буркгарта. Імя Карлё Фэрамонтэ зьяўляецца італьянізаваным варыянтам імя пляменьніка Гэсэ, Карла Ізэнбэрга.

Беларускія пераклады

На беларускую мову раман пераклаў Васіль Сёмуха.

• Гульня шкляных перлаў: спроба жыццёпісу Магістра Гульні Ёзэфа Кнэхта з дадаткам ягоных твораў: [раман] / выдадзена Германам Гесэ. — Мінск : Мастацкая літаратура, 1992. — 472, [2] с.

Вонкавыя спасылкі

• Гульня шкляных пэрлаў на Беларускай Палічцы