Герб Берасьця

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Герб Берасьця
Coat of Arms of Brest, Belarus.svg
Апісаньне
Зацьверджаны 26 студзеня 1991

Права на атрыманьне гербу Берасьцю было даравана вялікім князем Аляксандрам прывілеем 1494 году: «у блакітным полі срэбраны лук са стралой накіраванай уверх».[1]

Герб Берасьця ўзору 1845 году

Згодна з прывілеем вялікага князя Жыгімонта ІІІ 1554 году, Берасьце атрымала права карыстацца гербавай пячаткай з выявай чатырохвугольнай вежы на чырвоным полі на зьліцьці дзьвюх рэк (Буга і Мухаўца). Гэты герб зафіксаваны на пячатцы войтаўска-лаўніцкай калегіі гарадзкога магістрата. Акрамя гэтага Берасьце мела іншую пячатку з 1584 году, пра якую ўзгадвае ў сваім зборніку гербаў Барташ Папроцкі: «Берасьце ўжывае лук з нацягнутай цецівой з накладзенай стралой і з тэкстам вакол: Sigillum civitat Brestensis Magni Duc Litvaniae». У 1742—1775 г.г. гербам Берасьця зьяўляўся фігурны картуш, на якім выяўлены лук з нацягнутай цецівой з накіраванай уверх стралой. Над картушам — карона[2].

Пасьля акупацыі гораду войскамі Расейскай імпэрыі ў 1795 годзе Берасьце стала павятовым горадам Гарадзенскай губэрні, і стары герб быў скасаваны. Новы герб Берасьця быў зацьверджаны расейскімі ўладамі 6 красавіка 1845 году разам зь іншымі гарадамі Гарадзенскай губэрні. Гэты варыянт герба быў утвораны на аснове герба 1554 году. Новы герб меў наступнае апісаньне: «У верхняй частцы шчыта Гарадзенскі герб; у ніжняй, у блакітным полі прадстаўлена зьліцьцё рэк Буг і Мухавец; на мысе, утвораным злучэньнем рэк, пастаўлена кола срэбраных шчытоў, сярод якіх узвышаецца крапасны штандар з двухгаловым арлом, у гонар таго, што Берасьце ўтворана ў крэпасьць»[1].

У канцы ХІХ стагодзьдзя быў створаны праект новага гербу Брэст-Літоўска: «у лазуровым шчыце апракінуты вілападобны срэбраны крыж», аднак ён ня быў зацьверджаны афіцыйна.

Герб Берасьця з 1921 да 1939 г.г.

У пэрыяд знаходжаньня Берасьця ў складзе Польшчы (з 1921 да 1939 г.г.) у якасьці герба гораду выкарыстоўвалася выява, на якой быў намаляваны астрог з трыма малымі вежамі. Аднак польскія гарадзкія ўлады пагаджаліся, што гэты герб ніяк ня быў зьвязаны з гісторыяй гораду, і разглядалі некалькі іншых варыянтаў гербу[3]. Аднак пачатак Другой Сусьветнай вайны і далучэньне Берасьця да Савецкай Беларусі спынілі гэтую дзейнасьць.

Сучасны герб Берасьця

Сучасны герб гораду быў зацьверджаны рашэньнем Берасьцейскага гарадзкога Савета народных дэпутатаў 26 студзеня 1991 году: «На блакітным полі выяўлены срэбраны лук з нацягнутай цецівой і страла, накіраваная ўверх». Зарэгістраваны ў Гербавым матрыкуле Рэспублікі Беларусь 1 чэрвеня 1994 г. № 1. Герб Берасьця адносіцца да гісторыка-геральдычных помнікаў Беларусі[4].

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]

Commons-logo.svg Герб Берасьцясховішча мультымэдыйных матэрыялаў