Віктар Астроўскі
- Вікіпэдыя мае артыкулы пра іншых асобаў з прозьвішчам Астроўскі (неадназначнасьць).
Ві́ктар Астро́ўскі (28 жніўня 1912, в. Засімавічы, Пружанскі павет, Гарадзенская губэрня, сёньня Пружанскі раён, Берасьцейская вобласьць — 31 жніўня 1975, Лёндан, Вялікабрытанія) — беларускі грамадзкі дзяяч на эміграцыі, публіцыст, картограф. Сын Радаслава Астроўскага.
Жыцьцяпіс
[рэдагаваць | рэдагаваць крыніцу]Вучыўся на факультэце права Віленскага ўнівэрсытэту імя Стэфана Баторыя, быў чальцом Беларускага студэнцкага саюзу, арганізацыі «Скарынія». Скончыў агранамічны факультэт Познанскага ўнівэрсытэту (інжынэр-аграном).
У кастрычніку 1939 року ў Вільні арыштаваны і асуджаны на 8 гадоў лягераў (тэрмін адбываў у Варкуце, Расея). Яго маці, Антаніна Астроўская, загінула ў лягеры ў Казахстане. Уцёкшы зь лягеру, прайшоў пешкі 300 км. З канца 1941 у Арміі Андэрса (2-гі Польскі корпус), у складзе якой прымаў удзел у штурме Монтэ-Касіна (Італія, травень 1944 р.).
З 1946 жыў у Вялікабрытаніі, працаваў у вугальных шахтах, потым на працягу 20 гадоў — у друкарні апэратарам машынаў.
Дзейнасьць
[рэдагаваць | рэдагаваць крыніцу]Займаўся вывучэньнем картаграфіі Беларусі. Аўтар шэрагу кніг па беларускай картаграфіі і старажытных назвах Беларусі, а таксама публіцыстычных брашур і артыкулаў, прысьвечаных гісторыі XX ст. і скіраваных супраць апанэнтаў БЦР — Рада БНР. Усе кнігі выдаваў за ўласны кошт.
У 1960-х гг. займаўся выданьнем часопісу «Аб’еднаньне». Зьбіраў калекцыю картаў, якая пасьля ягонай сьмерці была перададзеная ў Скарынаўскую бібліятэку.
Творы
[рэдагаваць | рэдагаваць крыніцу]- На крывіцкім панадворку (псяўдонім Аркадзь Прадуха). Лондан, 1956. — 15 стар. машынапісу (Бібліятэка царквы БАПЦ святога Кірылы Тураўскага ў Нью-Ёрку)
- Russia the suburb of hell from Ivan Kalita to Khrushchev Nikita. — London, 1961 — 84 s.
- ŽYDY na Bielarusi i Ukrainie (krynicy anty-semityzmu). KAMPILACYJA. — London, 1967. — 20 стар. машынапісу (Б-ка царквы БАПЦ сьв. Кірылы Тураўскага ў Нью-Ёрку)
Літаратура
[рэдагаваць | рэдагаваць крыніцу]- Гардзіенка, Н. Беларусы ў Вялікабрытаніі / Рэдактар Алег Гардзіенка. — Мн.: Медысонт. — Т. 2010. — С. 520. — (Бібліятэка Бацькаўшчыны; Кніга 18).