Аляксандар Ян Масевіч

Аляксандар Ян Масевіч

Герб «Копач»
Асабістыя зьвесткі
Памёр	каля 1696
Род	Масевічы

Аляксандар Ян Масевіч (? — каля 1696) — дзяржаўны дзяяч Вялікага Княства Літоўскага. Ваявода амсьціслаўскі (з 1690).

Меў маёнткі ў Лідзкім павеце. Трымаў Цэльскае (па сьмерці бацькі з 1615) і Аршанскае староствы.

Біяграфія

Прадстаўнік незаможнага шляхецкага роду Масевічаў гербу «Копач». У маладосьці служыў у Сапегаў. Ваяваў супраць украінскіх казакоў, а таксама швэдаў пад Варшавай (1656).

У 1658 як камісар гетмана вялікага Паўла Яна Сапегі ўдзельнічаў у складаньні інвэнтару Ляхавіцкага замка. У 1659—1661 быў падстаростам Рэтаўскага цівунства, што належала Сапегу. Лідзкі пісар гродзкі (1660-я), пісар земскі (з 1671), харунжы (з 1680) і маршалак (з 1684), цівун шадаўскі (з 1674), падваявода віленскі (з 1682). Быў дэпутатам Галоўнага Трыбуналу ў 1667, абіраўся паслом на соймы 1668, 1677, 1683, 1685 (на трох апошніх быў у складзе Скарбовага Трыбуналу), 1688, 1689, маршалак Галоўнага Трыбуналу ў 1691.

У 1669 браў удзел у выбарах караля і вялікага князя Міхала Вішнявецкага, у 1674 — Яна Сабескага. У пачатку 1670-х быў маршалкам двару Казімера Яна Сапегі.

Удзельнічаў у Хоцінскай бітве (1673). На сойме 1683 абіраўся ў склад камісіі для перамоваў з Расеяй (паседжаньні праходзілі ў Кадзіне). Зь пераходам у 1680-х Сапегаў у апазыцыю да каралеўскага двара Масевіч зрабіўся адным зь лідэраў сапегаўскага лягеру на соймах Рэчы Паспалітай.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2010. — Т. 3: Дадатак А — Я. — 690 с. — ISBN 978-985-11-0487-7