Алесь Траяноўскі

	Алесь Траяноўскі; лац. Aleś Trajanoŭski
Асабістыя зьвесткі
Нарадзіўся	22 верасьня 1925; Уздымач[d], Слуцкі раён, Слуцкая акруга, БССР, СССР;
Памёр	18 сакавіка 2005 (79 гадоў); Менск, Беларусь;
Пахаваны	Кальварыйскія могілкі;
Літаратурная дзейнасьць
Род дзейнасьці	публіцыст, пісьменьнік, літаратуразнаўца, перакладнік

Але́сь Пятро́віч Траяно́ўскі (22 верасьня 1925, хутар Уздымач, Слуцкі раён, Менская вобласьць — 18 сакавіка 2005, Менск) — беларускі пісьменьнік, перакладчык, крытык, публіцыст.

Біяграфія

Нарадзіўся 22 верасьня 1925 году на хутары Ўздымач Слуцкага раёну Менскай вобласьці ў сям’і лесьніка Пятра Іванавіча Траяноўскага. У час нямецка-савецкай вайны зь верасьня 1942 году па ліпень 1944 году — партызан брыгады імя Чапаева, зь ліпеню 1944 году— на 3-м Беларускім і 3-м Украінскім франтах, быў цяжка паранены. Пасьля дэмабілізацыі ў 1946 годзе працаваў на розных пасадах у Менску.

У 1959 годзе скончыў Маскоўскі гісторыка-архіўны інстытут. У 1955—1962 гадох — літаратурны супрацоўнік газэты Беларускага ўпраўленьня грамадзянскай авіяцыі «Западная трасса». У 1962—1982 гадох — літаратурны супрацоўнік, загадчык аддзелу літаратуры і мастацтва газэты «Звязда», у 1983—1986 гадох — намесьнік галоўнага рэдактара часопісу «Мастацтва Беларусі». Член Саюзу пісьменьнікаў СССР з 1990 году. Узнагароджаны мэдалямі.

Памёр 18 сакавіка 2005 году ў плябані Чырвонага касьцёлу ў Менску^[2]. Пахаваны ў Менску на Кальварыйскіх могілках^[3]

Творчасьць

Дэбютаваў артыкуламі на літаратуразнаўчыя тэмы ў 1957 годзе ў пэрыядычным друку. Працаваў ў галіне мастацкага перакладу з 1960 году. Перакладаў з верхнелужыцкай, ніжнелужыцкай, кашубскай, польскай і ўкраінскай моў. Адзін з укладальнікаў і перакладчыкаў, аўтар прадмовы і камэнтарыяў да анталёгіі паэзіі лужыцкіх сэрбаў «Там, дзе Шпрэвя шуміць» (1969). У яго перакладах на беларускую мову выйшлі анталёгія кашубскай паэзіі «За даляглядам край Сталемаў» (1980), аповесьць Ю. Брэзана «Чорны млын» (1984). Пераклаў шэраг твораў І. Франко, П. Тычыны, Я. Барта-Цішынскага, Ю. Брэзана, К. Лоранца, А. Лаймінг і іншых.

Крыніцы

Літаратура

Беларускія пісьменнікі (1917—1990): Даведнік; Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. ISBN 5-340-00709-X
Траяноўскі Алесь // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: БелЭн, 1992—1995.

[_e9baf2e66f09ce0e-1] а ^б Беларуская энцыклапедыя: У 18 т. Т. 15: Следавікі — Трыо (белар.) — Мінск: Беларуская Энцыклапедыя імя Петруся Броўкі, 2002. — С. 525. — 552 с. — ISBN 985-11-0251-2

[2] Родам з Уздымача. Да 90-годдзя Алеся Траяноўскага // Новы час. 29 мая 2015. № 21 (438) — С. 11

[3] 80 пахаванняў выбітных беларусаў, якія варта наведаць на Дзяды

[1]

[2]

[3]