Эскільстуна

Эскільстуна швэдз. Eskilstuna
Населены пункт
Ратуша Эскільстуны
Герб
Краіна	Швэцыя
Лэн	Сёдэрманлянд
Камуна	Эскільстуна
Дата заснаваньня	1659
Геаграфія
Плошча	31,05 км²
Вышыня НУМ	26 ± 1 м
Часавы пас	UTC+1 UTC+2 (летні час)
Каардынаты	59°22′14″ пн. ш. 16°30′46″ у. д.
Насельніцтва
Колькасьць	67 359 чал. (2015)
Лічбавыя ідэнтыфікатары
Тэлефонны код	016
Паштовыя індэксы	630 03 — 638 21
Сайт	www.eskilstuna.se
Эскільстуна на мапе Швэцыі Эскільстуна

Эскільстуна (па-швэдзку: Eskilstuna) — горад у Швэцыі, прыкладна за 115 км на захад ад Стакгольму, на рацэ Эскільстунаон, за некалькі кілямэтраў ад азёраў Мэлярэн і Ельмарэн. Цэнтар аднайменнай камуны ў лэне Сёдэрманлянд. Насельніцтва на 31 сьнежня 2015 году — 67 359 чалавек.

Гісторыя

Рака Эскільстунаон і гістарычны цэнтар Эскільстуны

Спачатку на месцы сучаснага гораду існавалі два гандлёвыя мястэчкі: Форс і Туна. Апошняя ўпершыню згадваецца ў летапісы пад 1104 годам, калі тут ужо існаваў культ Сьвятога Эскіля, які паводле адной зь легендаў, быў забітым паганцамі ангельскім манахам. У 1120 годзе Туна была ўжо цэнтрам біскупства, а прыкладна ў 1266 годзе была перайменавана ў «Эскілеву Туну» (па-швэдзку: Eskilstuna). Напрыканцы XVI стагодзьдзя Эськільстуна становіцца рэзыдэнцыяй герцага Карла, які пабудаваў тут замак Эскільстунагус (згарэў у XVII стагодзьдзі). У 1659 годзе кароль Карл X Густаў заснаваў на заходнім беразе Эськільстунаон горад, названы ў яго гонар — Карл Густаўсстад, дзе адразу ўзьніклі мануфактуры па вытворчасьці зброі (у 1833 годзе гэты горад увайшоў у склад Эскільстуны). З канца XVIII стагодзьдзя Эскільстуна становіцца важным прамысловым цэнтрам (асабліва мэталюргіі) і застаецца ім да 1970-х гадоў, калі шэраг прадпрыемстваў (Carl Gustafs stads gevärsfaktori, Eskilstuna Jernmanufaktur, Nickelfabriks AB Gottfrid Carlsson, Gense, August Stenman і іншыя) сталі зачыняць свае фабрыкі ў Эськільстуне. У 1990-я гады была пракладзеная чыгунка Svealandsbanan, што станоўча паспрыяла разьвіцьцю гораду. Найбольш значнай падзеяй у сучаснай гісторыі Эскільстуны зьяўляецца пажар 2009 году ў гатэлі Quality Hotel Statt.

Славутасьці

Кляштарная царква (Klosters kyrka)

Кавальні Радэмахэра

• Стары горад
• Кляштарная царква (1929)
• Музэй гораду (па-швэдзку: Eskilstuna stadsmuseum)
• Музэй індустрыйнай гісторыі Мунктэльмузэет (па-швэдзку: Munktellmuseet)
• Кавальні Радэмахэра (музэй; па-швэдзку: Rademachersmedjorna)
• Заапарк Parken Zoo

Асобы

• Юакім Бэрг — саліст гурта Kent
• Маркус Мустанэн — ударнік гурта Kent
• Самі Сырвіё — гітарыст гурта Kent
• Тува Карсан — сьпявачка
• Міка Вяюрунэн — футбаліст

Дадатковыя зьвесткі

Каля 10 000 жыхароў Эскільстуны маюць фінскія карані (большасьць зь іх — гэта дзеці або ўнукі фінскіх рабочых эмігрантаў). Фінская мова і мэянкіелі маюць афіцыйны статус у Эскільстуне і некаторых суседніх камунах.

Вонкавыя спасылкі

Эскільстуна — сховішча мультымэдыйных матэрыялаў