Чырвоны харчавік

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Чырвоны харчавік
Тып Адкрытае акцыянэрнае таварыства
Заснаваная 1870
Заснавальнікі Ханон Райцын
Краіна Беларусь
Разьмяшчэньне 213805 Бабруйск, Магілёўская вобласьць
Адрас вул. Бахарава, 145
Галіна харчовая прамысловасьць
Прадукцыя слодычы

«Чырво́ны харчаві́к» — прадпрыемства ў Бабруйску, заснаванае ў 1870 року.

Мінуўшчына[рэдагаваць | рэдагаваць крыніцу]

У 1870 року купец Ханон Райцын адкрыў у Бабруйску дражджавы завод. На ім працавалі 40 чалавек, у год выраблялі каля 400 фунтаў дрожджаў. Першыя будынкі былі драўляныя, пазьней дабудаваныя мураваныя баракі для пражываньня працаўнікоў.

У 1890 року Райцын прадаў завод купцу Зусьману Рабіновічу. У 1892—1897 быў збудаваны мураваны корпус, набытае новае абсталяваньне. У 1898 Рабіновіч прадаў ⅗ часткі ўласнасьці Ашэру Рабіновічу і Шмэрку Галадцу. З 1902 року завод перайшоў ва ўласнасьць абшарнікаў Вікенція Паклеўскага-Казелы і Карла Незабытоўскага. У 1913 новым уласьнікам стаў купец 1-й гільдыі Янкель Разоўскі.

Пасьля прыходу бальшавікоў завод перададзены павятоваму Саўнаркаму, ягоным кіраўніком стаў Геца Фрыд. У 1921 року, за новым дырэктарам С. Л. Гінзбургам вытворчасьць спынілася. У 1924 року завод перададзены Белхарчтрэсту, пачаўся капітальны рамонт. Былі створаныя вытворчыя аддзяленьні: квасільнае, вальцавое, заторнае, мачыльнае, прасовачнае, пакавальнае. У наступным годзе завод выпусьціў больш за 700 кг дрожджаў, якія пастаўляліся пераважна ва Ўкраіну, а таксама Бабруйскі ды Магілёўскі раёны.

У 1928—1930 завод рэканструяваны і перайменаваны ў кандытарскую фабрыку «Чырвоны харчавік». Пачаўся выпуск пасьцілы, мармэляду, павідлы. У 1934 року ўведзены карамэльны цэх, у 1934 — халвічны, у 1937 — дрожджавы. Перад Нямецка-савецкай вайной фабрыка выпускала 33 віды кандытарскіх вырабаў агульнай масай 7000 тонаў.

У 1944 року немцы пры адступленьні спалілі фабрыку, частку абсталяваньня вывезьлі. Вытворчасьць адноўленая ў 1945, да 1950 дасягнуты даваенны аб’ём прадукцыі. У 1952—1955 рр. адбываецца пераарыентацыя прадпрыемства на выпуск пасьціла-мармэлядных вырабаў. У 1969—1971 року збудаваная халвічная вытворчасьць.

У кастрычніку 1994 р. кандытарская фабрыка пераўтвораная ў адкрытае акцыянэрнае таварыства. У 1999 р. уведзеныя ў эксплюатацыю лініі па вытворчасьці ірысу, мармэляду і цукерак у шакаляднай глязуры з аўтаматычным пакаваньнем.

Прадукцыя[рэдагаваць | рэдагаваць крыніцу]

Фабрыка выпускае больш за 140 відаў прадукцыі: зэфір, халва, дражэ, мармэляд, ірыс, жэлейныя цукеркі.

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]