Царква Нараджэньня Божай Маці (Лыскаў)
Славутасьць | |
Царква Нараджэньня Божай Маці
| |
Краіна | Беларусь |
вёска | Лыскава |
Каардынаты | 52°51′13″ пн. ш. 24°36′55″ у. д. / 52.85361° пн. ш. 24.61528° у. д.Каардынаты: 52°51′13″ пн. ш. 24°36′55″ у. д. / 52.85361° пн. ш. 24.61528° у. д. |
Канфэсія | праваслаўе |
Эпархія | Берасьцейская |
Тып будынка | царква |
Архітэктурны стыль | «закапанскі» |
Аўтар праекту | Станіслаў Пятроўскі |
Дата заснаваньня | 1933 |
Будаваньне | 1930—1933 гады |
Апошні плябан | Аляксандар Багдановіч[1] |
Статус | ахоўваецца дзяржавай |
Стан | дзейная |
Царква Нараджэньня Божай Маці | |
Царква Нараджэньня Божай Маці на Вікісховішчы |
Царква́ Нараджэ́ньня Бо́жай Ма́ці — праваслаўная царква ў Лыскаве Берасьцейскае япархіі, збудаваная ў 1933 року. Помнік народнага дойлідзтва ў «закапанскім» стылі.
Мінуўшчына
Пад 1859 рокам згадваецца лыскаўская праваслаўная царква, збудаваная ў 1725 року. У 1892—1893 роках яна была разабраная з прычыны састарэласьці і адсутнасьці сродкаў для рамонту, а царкоўны рыштунак перанесены ў былы рыма-каталіцкі касьцёл, які ў 1880 року выгарэў пасьля ўдару маланкі. Гэты касьцёл быў адноўлены ў 80-я, аднак ужо як праваслаўная царква. 11 сьнежня 1886 року яна была асьвечаная ў імя нараджэньня Найсьвяцейшае Багародзіцы.
За часам Першай сусьветнай вайны немцы выкарыстоўвалі царкву сьпярша як шпіталь, а пасьля — як склад зерня. У 1921, за палякамі, царква была разабраная. Да 1933 року набажэнствы ладзіліся ў капліцы на могілках.
У 1925 у Лыскаў быў прызначаны новы праваслаўны сьвятар Пётар Радкевіч, які дабіўся ва ўладаў дазволу на пабудову новае царквы на старым месцы. Узьвядзеньне адбывалася ў 1930—1933 роках праваслаўнымі жыхарамі паводле праекту Станіслава Пятроўскага зь Беластоку. Пабудова каштавала 40 тысячаў злотых, стыль характарызуецца як «закапанскі»[2] або «бяшчадзкі»[3][4].
8 кастрычніка 1933 року царква была асьвечаная архіяпіскапам Гарадзенскім і Наваградзкім Алексіем (Грамадзкім). На цырымоніі прысутнічалі намесьнік ваўкавыскага старосты, уладальнік маёнтку Адамкова Быхавец, мясцовыя грамадзкія дзеячы. Іканастас быў узяты са старога каменнага храму, разабранага ў 1921 року за палякамі.
Архітэктура
Царква — помнік народнага драўлянага дойлідзтва, пабудаваная пад уплывам храмавай архітэктуры Закарпацьця і стылю мадэрн.
Даўжыня будынку — 21 мэтар, шырыня — 12 м, вышыня — 22 м. Царква пабудаваная з сасновага брусу.
Кампазыцыя крыжова-купальная. На захадзе да асноўнага кубападобнага аб’ёму прымыкае трохярусная званіца, на ўсходзе — простакутная апсіда з бакавымі рызьніцамі. Асноўны зруб накрыты чатырохскатным дахам, на якім васьмігранны сьветлавы барабан з купалам-цыбулінай, завершаным ліхтаром з макаўкай.
Пірамідальная чацьвярыковая званіца таксама завершаная купалам-цыбулінай. Асноўныя праёмы ромбападобныя ў барабане і стрэлападобныя ў асноўным аб’ёме.
Крыніцы і заўвагі
- ^ «Брестская епархия». Пружанское благочиние (рас.) Православие.By Праверана 12 ліпеня 2012 г.
- ^ Па паўднёвай Ваўкавышчыне Вандроўкі. ГА «Беларускае дабраахвотнае таварыства аховы помнікаў гісторыі і культуры» (2 красавіка 2011). Праверана 12 ліпеня 2012 г.
- ^ Witold Karpyza. Łysków // Ziemia Wołkowyska. — Lębork: 2005 Т. 2.
- ^ У дадзеным выпадку вядзецца пра невялічкія драўляныя цэрквы, пакрытыя драўлянымі цёсанымі пліткамі.
Аб’ект Дзяржаўнага сьпісу гісторыка-культурных каштоўнасьцяў Рэспублікі Беларусь, шыфр 113Г000623 |