Гэльсынгборг

Гэльсынгборг
швэдз. Helsingborg
Герб Гэльсынгборгу
Дата заснаваньня:	1085
Горад з:	1085
Краіна:	Швэцыя
Ляндскап:	Сконэ
Лэн:	Сконэ
Камуна:	Гэльсынгборг
Плошча:	39,57 км²
Насельніцтва (2015)
колькасьць:	▲ 104 250 чал.
шчыльнасьць:	2634,57 чал./км²
Часавы пас:	UTC+1
летні час:	UTC+2
Тэлефонны код:	042
Паштовы індэкс:	25X XX
Геаграфічныя каардынаты:	56°2′32.683″ пн. ш. 12°43′15.586″ у. д.
Гэльсынгборг на мапе Швэцыі Гэльсынгборг
Галерэя здымкаў у Вікісховішчы
https://helsingborg.se

Гэльсынгборг (па-швэдзку: Helsingborg) — горад на поўдні Швэцыі, у лэне Сконэ, у аднайменным ляндскапе, цэнтар аднайменнай камуны. Насельніцтва на 2015 год — 104 250 чалавек.

Назва

Назва гораду паходзіць ад словаў «helsing» — частка шыі, а ў дадзеным выпадку — найвузейшае месца праліву Эрэсунду, і «borg» — замак.

Гісторыя

Помнік Магнусу Стэнбоку каля Ратушы

Вежа Чэрнан

Гэльсынгборг — адзін з найстаражытнейшых гарадоў Скандынавіі, лічыцца што забудова ў форме невялікай фартэцыі існавала тут ужо ў X стагодзьдзі.

Адам Брэмэнскі ўзгадвае горад у 1070-х гадах, а 21 траўня 1085 году Гэльсынгборг згадваецца ў лісьце дацкага караля Кнута Сьвятога — гэтая дата й зьяўляецца афіцыйнаю датай заснаваньня гораду. У XII стагодзьдзі тут пабудавалі значна мацнейшы замак, горад пачаў расьці й у XIV стагодзьдзі Гэльсынгборг становіцца адным з найбуйнейшых гарадоў Даніі. У 1332 годзе горад разам з усім Сконэ й Блекінге набыў швэдзкі кароль Магнус Эрыксан, аднак ужо ў 1360 годзе дацкі кароль Вальдэмар Атэрдаг зноў адваяваў гэтыя землі. У XV—XVI стагодзьдзях значнасьць Гэльсынгборгу паменшылася са зьяўленьнем на супрацьлеглым беразе Эрэсунду замка Кронбарг у горадзе Гэльсынгёр. У 1658 годзе Гэльсынгборг пераходзіць Швэцыі й у наступныя паўстагодзьдзі пабачыў шмат войнаў: у прыватнасьці, у 1710 годзе, у часе Вялікай Паўночнай вайны тут швэдзкая армія Магнуса Стэнбока перамагла датчанаў.

У XIX стагодзьдзі горад паступова пачынае расьці. У 1892 годзе Гэльсынгборг і Гэльсынгёр былі злучаныя паромам, прычым гэты транспарт злучае два гарады й дасёньня. У 1921 годзе ў Гэльсынгборгу адчыніў свае дзьверы першы ў Швэцыі гарадзкі тэатар, які, дарэчы, у 1944 годзе ўзначальваў Інгмар Бэргман. 15 верасьня 1973 годзе ў мясцовым шпіталі памёр кароль Густаў VI Адольф.

Славутасьці

Дом Якаба Гансэна

• Вежа «Чэрнан» (літаральна «ядро») — пабудаваная ў 1310-х гадах.
• Царква Сьвятой Марыі (XII ст.)
• Фахвэркавы Дом Якаба Гансэна (1641)
• Ратуша (1887)
• Гарадзкія ўмацаваньні з Тэраснымі сходамі
• Помнік Магнусу Стэнбоку

Вонкавыя спасылкі

Гэльсынгборг — сховішча мультымэдыйных матэрыялаў