Ураджай (выдавецтва)

«Ураджай»

Тып	Унітарнае прадпрыемства
Заснаваная	9 траўня 1961 (63 гады таму)
Краіна	Беларусь
Разьмяшчэньне	Менск
Закрытая	2002
Галіна	Выдавецкая
Прадукцыя	Кнігі
Матчына кампанія	Міністэрства сельскай гаспадаркі Рэспублікі Беларусь

«Ураджа́й» (да 21 жніўня 1963 году — Сельгасвыд БССР) — дзяржаўнае кніжнае выдавецтва, якое працавала з 9 траўня 1961 году да 2002 году ў Мінску.

Гісторыя

Заснавана 9 траўня 1961 году як спэцыялізаванае выдавецтва «Сельгасвыд БССР» Мінсельгасу БССР. З 21 жніўня 1963 году мела назву «Ураджай». У 2002 годзе выдавецтва ўвайшло ў склад выдавецтва «Беларусь».

Дзейнасьць

Выпускала літаратуру для патрэб сельскай гаспадаркі па пытаньнях земляробства, расьлінаводства, жывёлагадоўлі, эканомікі і кіраваньня, сельскагаспадарчага будаўніцтва, навукова-тэхнічнага прагрэсу, мэліярацыі, вядзеньня прысядзібнай і фэрмэрскай гаспадаркі, падручнікі, навуковыя і мэтадычныя дапаможнікі і даведнікі, таксама літаратуру па сумежных галінах навуковай і гаспадарчай дзейнасьці (біятэхналёгіі, экалёгіі, прыродазнаўстве і прыродакарыстаньні, генэтыцы, сэлекцыі, лясной, воднай гаспадарцы, мэдыцыне, машынабудаваньні, перапрацоўчай прамысловасьці, таваразнаўстве і інш.).

Выдавала таксама мастацкую і слоўнікавую літаратуру, працы па беларусазнаўстве. Гістарычная тэматыка самастойнымі разьдзеламі ўключалася ў падручнікі, у асобных выданьнях асьвятлялася гісторыя разьвіцьця розных галін сельскай гаспадаркі, сельскагаспадарчай навукі, адукацыі, устаноў і прадпрыемстваў, эканомікі, зьмен аграрнай палітыкі, разьвіцьця розных сыстэм прыродакарыстаньня, гісторыя вёскі і сялянскага побыту, народных традыцый, духоўнай спадчыны, роля выдатных асобаў у гістарычных працэсах краіны. Зь сярэдзіны 1990-х гадоў выдавецтва ўдзельнічала ў выданьні гісторыка-дакумэнтальных хронік «Памяць», з 1998 году пачало выпуск кніг па гісторыі культуры, мастацтва і архітэктуры, літаратуры, усеагульнай гісторыі.

Літаратура

• Малашэвіч, Я. В. «Ураджай» // Беларуская энцыклапедыя: У 18 т. / Рэдкал.: Г. П. Пашкоў і інш. — Мн.: БелЭн, 2003. — Т. 16: Трыпалі — Хвіліна. — 576 с. — ISBN 985-11-0263-6 — С. 245.
• Малашэвіч, Я. «Ураджай» / Яўген Малашэвіч // Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2001. — Т. 6. Кн. 1: Пузыны — Усая. — 591 с. — ISBN 985-11-0214-8 — С. 588.
• Касько, В. К. «Ураджай» // Республика Беларусь: энциклопедия в 6 т. Т. 7 / Редкол.: Г. П. Пашков (гл. ред.) и др. — Мн.: БелЭн, 2008. — С. 323. — 744 с.: илл. — ISBN 978-985-11-0421-1.