Пачатак і аднаўленьне гульні (футбол)

Зьвесткі зь Вікіпэдыі — вольнай энцыкляпэдыі

Правіла 8 футбольных правілаў вызначае, як робіцца пачатковы ўдар і розыгрыш «спрэчнага мяча».

Жараб’ёўка[рэдагаваць | рэдагаваць крыніцу]

Перад пачаткам матчу праводзiцца жараб’ёўка (напрыклад, падкіданьне манэты). Каманда, якая выйграла жараб’ёўку, вызначае, у якую браму яна будзе гуляць у першым тайме, другая выконвае пачатковы ўдар. У наступным тайме каманды мяняюцца брамамі, і каманда, якая выбірала браму, выконвае пачатковы ўдар.

Пачатковы ўдар[рэдагаваць | рэдагаваць крыніцу]

Пачатковы ўдар выконваецца:

  • у пачатку любога тайму, асноўнага або дадатковага
  • пасьля забітага голу той камандай, у чыю браму быў забіты гол

Каманды займаюць месцы на сваёй палове поля, пры гэтым каманда, якая не выконвае першы ўдар — за межамі цэнтральнага круга. Мяч нерухома ляжыць у цэнтры поля. Па сыгнале судзьдзі гулец б’е па мячы наперад, і гульня пачынаецца. Пры гэтым той, хто ўдарыў ня можа дакранацца да мяча, пакуль яго не кране іншы гулец.

Штрафы[рэдагаваць | рэдагаваць крыніцу]

За паўторны дотык супернікам падаецца вольны ўдар. За астатнія парушэньні пачатковы ўдар перайграецца.

Спрэчны мяч[рэдагаваць | рэдагаваць крыніцу]

Пры прыпынку, не прадугледжаным правіламі, (лопнуўшы мяч, заўзятар, які выйшаў на поле й г. д.) разгульваецца спрэчны мяч. Для гэтага судзьдзя ўкідае мяч у тым месцы, дзе ён знаходзіўся ў момант прыпынку. Гульня аднаўляецца, калі мяч падае на зямлю. Калі хтосьці ўдарае па мячы да таго, як мяч зваліўся, спрэчны мяч перайграецца. Перайграецца ён і ў тым выпадку, калі мяч выходзіць за межы поля, але ні адзін гулец яго не крануў. Калі прыпынак адбыўся на брамавай пляцоўцы, спрэчны мяч разгульваецца на пярэдняй лініі пляцоўкі, у пункце, найбліжэйшым да месца прыпынку.

Мяч у брамавай пляцоўцы[рэдагаваць | рэдагаваць крыніцу]

Таксама правіла 8 апісвае дзьве сытуацыі, не зьвязаныя з пачатковым ударам і «спрэчным мячом».

Штрафны або вольны ўдар, які разыгрываецца ў сваёй брамавай пляцоўцы, можа разгульвацца зь любой яе кропкі. Вольны ўдар, які разыгрываецца з брамавай пляцоўкі праціўніка, разгульваецца зь яе пярэдняй лініі, з пункту, найбліжэйшага да месца парушэньня.