Павал Шастакоў

	Павал Шастакоў
Асабістыя зьвесткі
Нарадзіўся	29 чэрвеня 1889; Манастыршчына, Мсьціслаўскі павет[d], Магілёўская губэрня, Расейская імпэрыя;
Памёр	30 студзеня 1937 (47 гадоў)
Літаратурная дзейнасьць
Род дзейнасьці	паэт, журналіст

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Шастакоў.

Па́вал Шастако́ў (29 чэрвеня 1889, м. Манастыршчына, Мсьціслаўскі павет, цяпер Манастыршчанскі раён, Смаленская вобласьць, Расея — 29 кастрычніка 1937) — беларускі паэт і журналіст.

Жыцьцяпіс

Нарадзіўся ў сялянскай сям’і. Скончыў Віцебскі настаўніцкі інстытут. Працоўную дзейнасьць пачаў настаўнікам школы граматы ў 1906 годзе. З 1916 году ў складзе 7-ай артылерыйскай брыгады ваяваў на румынскім фронце. У 1917 годзе ў Маскве: прапаршчык 2-га запаснога палка цяжкай артылерыйскай брыгады, удзельнік кастрычніцкага ўзброенага паўстаньня ў 1917 годзе ў Маскве. З 9 лістапада чалец Маскоўскага Савету салдацкіх дэпутатаў.

У 1918—1919 гг. у Мсьціславе: чалец павятовага выканкаму і загадчык аддзела народнай асьветы, рэдактар павятовай газэты «Думы бедняка». Удзельнічаў у грамадзянскай вайне.

У 1920 пераехаў у Менск. Служыў начальнікам палітасьветы губваенкамату. З-за хваробы пакінуў армію. З 1921 году працаваў у Мсьціславе загадчыкам павятовага зямельнага аддзелу. Потым прызначаны загадчыкам аддзелу народнай асьветы Магілёўскага акруговага выканкаму. Пісаў нарысы і артыкулы па-беларуску і па-расейску, друкаваўся ў мясцовай прэсе, у газэце «Савецкая Беларусь».

Зь верасьня 1926 году па жнівень 1928 году ў Маскве — загадчык беларускага сэктару Камуністычнага інстытуту нацменьшасьцяў імя Мархлеўскага. Арганізаваў у Маскве сьвяткаваньне 20-годзьдзя літаратурнай дзейнасьці Якуба Коласа. Быў адным з укладальнікаў зборніка артыкулаў «Літаратурная творчасьць К. М. Міцкевіча (Якуба Коласа)» (М., 1928), аўтар уступнага артыкула ў зборніку. Удзельнічаў у стварэньні Цэнтральнага беларускага клюбу ў Маскве (люты 1928), сябра праўленьня клюбу.

Зь верасьня 1928 па жнівень 1929 году — намесьнік наркаму асьветы БССР. З сакавіка па ліпень 1929 году адказны рэдактар газэты «Савецкая Беларусь». У траўні 1933 году прызначаны рэдактарам газэты «Калгаснік Беларусі». Зрабіў выданьне папулярным сярод чытачоў і аўтараў. У жніўні 1935 газэта закрытая.

З кастрычніка 1935 па жнівень 1936 году — дырэктар Белдзяржвыдавецтва. Быў чальцом ЦВК БССР (1929—1932). Аўтар лібрэта першай опэры Мікалая Чуркіна «Вызваленьне працы», многіх вершаў і артыкулаў.

30 студзеня 1937 году арыштаваны органамі НКУС па адрасе: вул. К. Маркса, 16 (2-гі Дом Саветаў). Асуджаны 28 кастрычніка 1937 году як «чалец дывэрсійна-шкодніцкай тэрарыстычнай арганізацыі» да найвышэйшай меры пакараньня з канфіскацыяй маёмасьці. Расстраляны 29 кастрычніка 1937 году. Рэабілітаваны вайсковай калегіяй Вярхоўнага суду СССР 10 лістапада 1956 году. Асабовая справа Шастакова № 7772-с захоўваецца ў архіве КДБ Беларусі.

Цікавыя факты

Быў жанаты, гадаваў двух дзяцей. 20 лістапада 1937 году ў Менску арыштаваны ягоны сын, вучань адной зь менскіх школаў Вадзім Шастакоў (н. у 1921). 28.11.1937 асобай нарадай пры НКУС СССР 16-гадовы падлетак быў асуджаны як «чалец сям’і здрадніка радзімы» да 5 гадоў ППК. Далейшы ягоны лёс невядомы.
У 1933 годзе быў арыштаваны ягоны брат, адказны сакратар Наркамату земляробства БССР Сяргей Шастакоў (г. н. 1896). 8.5.1933 асуджаны як «чалец контрарэвалюцыйнай арганізацыі» да 5 гадоў ППК. Далейшы ягоны лёс невядомы. Рэабілітаваны трыбуналам БВА 16.7.1958 году.

Літаратура

ШАСТАКОЎ Павел Пятровіч, Слоўнік Маракова
Шастакоў Павел Пятровіч: Удзельнікі Кастрычніцкай рэвалюцыі// Памяць: Мсціслаўскі р-н: Гіст.-дак. хронікі гарадоў і р-наў Беларусі. — Мн., 1999. — С.118.