Мужчынская рыфма

Мужчы́нская ры́фма — разнавіднасьць рыфмы, пры якой націск падае на апошні склад зарыфмаваных словаў. Адрозьніваюць адкрытую мужчынскую рыфму — з галосным на канцы (дна́ — вайна́, зару́ — пару́) і закрытую, што мае ў канцы зычны гук (сто́л — вузё́л, прыва́л — права́л). У беларускай паэзіі мужчынскія рыфмы сустракаюцца ва ўсе часы яе існаваньня, хоць у вуснай народнай паэзіі і ў сілабічнай паэзіі яны значна саступаюць жаночым рыфмам.

Наце ж вам, свашачкі, сыра кусо́к,

Штоб вам, свашачкі, язык усо́х.

(Народная песьня)

Асаблівае распаўсюджаньне набыла мужчынская рыфма ў новай беларускай літаратуры:

Той лясок невысо́к,

Дзе бярозавы со́к

Весьнім сонечным днё́м.

Льецца ў звонкае дно́!..

(А. Лойка)

Рытміка-інтанацыйную і страфічную адметнасьць надае вершаванаму твору чаргаваньне мужчынскіх рыфмаў з жаночымі, дактылічнымі і гіпэрдактылічнымі.

Глядзіце таксама

• Жаночая рыфма
• Дактылічная рыфма
• Гіпэрдактылічная рыфма

Літаратура

• Рагойша В. П. Паэтычны слоўнік. — 3-е выд., дапрац. і дапоўн. — Менск: Беларуская навука, 2004. — 576 с. — 2000 ас. — ISBN 985-08-0598-6
• Рагойша В. П. Тэорыя літаратуры ў тэрмінах. — Менск: Беларуская энцыклапедыя, 2001. — 384 с. — 1000 ас. — ISBN 985-11-0197-4