Замак Красіцкіх

Славутасьць
Замак Красіцкіх
Замак у Красічыне
Краіна	Польшча
Мястэчка	Красічын
Каардынаты	49°46′32″ пн. ш. 22°38′58″ у. д. / 49.77556° пн. ш. 22.64944° у. д. / 49.77556; 22.64944Каардынаты: 49°46′32″ пн. ш. 22°38′58″ у. д. / 49.77556° пн. ш. 22.64944° у. д. / 49.77556; 22.64944
Тып будынка	замак
Архітэктурны стыль	маньерызм
Аўтар праекту	Галеаца Апіані
Заснавальнік	Станіслаў і Марцін Красіцкія
Дата заснаваньня	канец XVI стагодзьдзя
Статус	на кансэрвацыі
Сайт	Афіцыйны сайт
Замак Красіцкіх на мапе Польшчы Замак Красіцкіх
Замак Красіцкіх на Вікісховішчы

За́мак Красі́цкіх — замак у Красічыне, непадалёк ад Пшэмысьлі.

Апісаньне

Пабудаваны па праекце італьянскага архітэктара Галеаца Апіані з 1598 па 1633 рокі ў стылі эпохі позьняга Адраджэньня. Па кутах сьценаў разьмешчаныя чатыры круглыя вежы з традыцыйнымі для гэтай часткі Эўропы вонкавымі росьпісамі — зграфіта.

Мінуўшчына

Запачаткаваны польскім магнатам Станіславам Красіцкім у канцы XVI стагодзьдзя. Ён збудаваў абарончы замак з чатырма круглымі вежамі, а з усходняга боку жылую прыбудову.

Чарговы ўласьнік Марцін Красіцкі разбудаваў замак, ператварыўшы яго ва ўмацаваную рэзыдэнцыю. У разбудаваным паўночным крыле разьмяшчаліся пакоі ўласьніка і сталовы пакой. Уздоўж усходняга муру паўстала новае двухпавярховае жылое крыло. З боку дзядзінца зьявіліся партэравыя кружганкі.

У далейшым замкам валодаў любельскі ваявода Ян Тарла, прыхільнік Аўгуста II. Гэта спрычынілася да таго, што ў 1726 року Красічын быў захоплены расейскім войскам і казакамі. Замак быў сур’ёзна пашкоджаны. Пакоі былі разрабаваныя, разбураная Папская вежа.

У 30-х роках XIX стагодзьдзя палац выкупіў Лявон Сапега. Сапегі ўвялі звычай пасадкі дрэваў у парку па народзінах кожнага дзіцяці: пры нараджэньні сына — дуб, дачкі — ліпа. Гэтыя дрэвы захаваліся да сёньня.

На пачатку II Сусьветнай вайны замак быў разрабаваны савецкімі жаўнерамі. У 1941 годзе паблізу існавалі ўмацаваньні лініі Молатава (умацаваны пшэмысьлеўскі раён).

У цяперашні час разглядаецца пытаньне аб уключэньні палацава-паркавага ансамблю ў Красічыне ў лік помнікаў Сусьветнай спадчыны.