Дынама Менск (хакейны клюб)

Дынама Менск
Заснаваны	1992
Адкуль	Менск, Беларусь
Пляцоўка	Менск-Арэна Зьмяшчальнасьць: 15 086
Генэральны дырэктар	Анатоль Курылец
Чэмпіянат	КХЛ
Канфэрэнцыя	Заходняя
Дывізіён	Тарасава
Клюбныя колеры
Галерэя здымкаў у Вікісховішчы
hcdinamo.by (рас.)​ (анг.)

«Дынама» — беларуская каманда па хакеі з шайбай зь Менску. Выступае ў Кантынэнтальнай хакейнай лізе.

Гісторыя

Менская хакейная каманда «Дынама» была створана ў 1966 годзе. Выступала ў чэмпіянатах БССР. У сэзонах 1967/1968 і 1969/1970 была чэмпіёнам рэспублікі, у сэзоне 1968/1969 — срэбраным прызэрам. Пасьля каманда спыніла існаваньне.

Улетку 1976 году менскае «Тарпэда», якое выступала да таго часу ў заходняй зоне другой групы клясы «А» (трэці паводле сілы дывізіён чэмпіянату СССР), перайшло пад юрысдыкцыю ФСТ «Дынама». Спартовае таварыства, заснаванае сілавымі ведамствамі, стварыла ўмовы для іншагародніх гульцоў, вырашыла многія жыльлёвыя і матэрыяльныя пытаньні, наладзіла сувязі з маскоўскімі аднаклюбнікамі. Каманду ўзначаліў аўтарытэтны новасыбірскі спэцыяліст Віталь Стаін, якому дапамагаў былы брамнік «Тарпэда» Юры Ніканаў. Добрай дапамогай для будучага «Дынама» стала адкрыцьцё крытага катка ў парку Горкага, які быў пабудаваны ў 1976 годзе. На базе катка была створана СДзЮШАР «Юнацтва», выхаванцы якой пасьля склалі касьцяк «Дынама».

Колішні лягатып клюбу.

Ужо ў год дэбюту «Дынама» заваявала пуцёўку ў першую групу чэмпіянату СССР, а праз тры сэзоны, у 1980 годзе, дамаглося выхаду ў найвышэйшую лігу. У найвышэйшай лізе каманда замацавацца ня здолела і, заняўшы апошняе 12 месца, вылецела ў клясу «А». У 1982 і 1983 гадох «Дынама» ўдзельнічала ў пераходных турнірах за права гуляць у найвышэйшай лізе, аднак прабіцца туды зноўку не сталася магчымым.

Вяртаньне ў эліту савецкага хакею адбылося ў 1988 годзе, калі новае пакаленьне выхаванцаў «Юнацтва» на чале з Уладзімерам Крыкуновым здолела нарэшце пераадолець бар’ер пераходнага турніру. Лепшага выніку ў чэмпіянатах СССР «Дынама» дамаглося ў сэзоне 1989—1990 гадоў, калі адзіны раз у сваёй гісторыі камандзе атрымалася правесьці другі этап розыгрышу чэмпіянату вышэйшай лігі ў дзясятцы наймацнейшых каманд. Хакеісты, якія гулялі ў канцы 1980-х гадоў у складзе «Дынама» пасьля склалі аснову зборнай Беларусі, у зборную СССР выклікаліся Юры Крывахіжа і Андрэй Кавалёў.

Каманда адроджаная ў 2003 годзе. Чэмпіён Беларусі ў сэзоне 2006/2007, срэбраны прызэр у сэзоне 2005/2006. З 2008 году ўдзельнік міжнароднай хакейнай лігі — КХЛ, прадстаўнік Дывізіёну Баброва, з 2010 — Дывізіёну Тарасава. Уладальнік Кубка Шпэнглера 2009.

На пачатку верасьня 2010 г. клюб займеў новы беларускамоўны гімн у суправаджэньні беларускіх традыцыйных інструмэнтаў. Музыку напісаў і выканаў гурт «Палац» на чале Алегам Хаменкам. Тэкст 2 куплетаў напісаў паэт Алесь Камоцкі. Прэзэнтацыя гімна прайшла ў спартовым комплексе «Менск-Арэна» перад 7 тысячамі заўзятараў. 24 студзеня 2012 году заўзятары клюбу падалі прашэньне да кіраўніцтва «Менск-Арэны» аб беларускамоўным дыктарскім і дыджэйскім суправаджэньні хатніх гульняў «Дынама».

Склад

Паводле стану на 31 студзеня 2026 году

Брамнікі
22		Яўген Прохараў	2006	35		Антон Крупавец	2006
60		Закары Фукале	1995	94		Васіль Дземчанка	1994
Абаронцы
5		Робэрт Гэмілтан	1994	10		Нікаля Мэлёш	1997
18		Крыстыян Гэнкель	1995	24		Тай Сьміт	2000
27		Джош Брук	1999	33		Брэйдзі Лайл	1999
36		Данііл Крыштофік	2005	38		Павал Воранаў	2000
44		Дарэн Дыц	1993	61		Ксаўе Ўэле	1993
Нападнікі
7		Сэм Энас	1993	9		Данііл Ліпскі	2004
12		Алекс Лімож	1997	13		Вадзім Мароз	2003
14		Сяргей Кузьняцоў	2002	23		Андрэй Стась	1988
26		Данііл Сацішвілі	2003	41		Кірыл Варонін	1994
52		Дзьмітры Хабян	2006	56		Ягор Карабань	2007
58		Мікалай Салыга	2005	67		Ягор Борыкаў	2005
80		Ільля Вусаў	2001	81		Віталь Пінчук	2002
87		Вадзім Шыпачоў	1987	91		Мікіта Пышкайла	2000
97		Станіслаў Галіеў	1992	—		Раян Снупэр	1992

Дадатковыя зьвесткі

• Менскае «Дынама» стала першым клюбам у гісторыі КХЛ, які зьмяніў галоўнага трэнэра — канадзец Пол Гарднэр быў звольнены 29 ліпеня 2008 году гэтак і не правёўшы ніводнага афіцыйнага матчу.
• На цырымоніі адкрыцьця зімовых Алімпійскіх гульняў 2010 году ў Ванкувэры два гульцы «Дынама» былі сьцяганосцамі сваіх нацыянальных камандаў — Алег Антоненка нёс сьцяг каманды Беларусі, Віле Пэлтанэн — Фінляндыі.

Вонкавыя спасылкі

• Афіцыйны сайт (рас.)