Готфрыд фон Гагенаў

	Готфрыд фон Гагенаў
	Gottfried von Hagenau
Асабістыя зьвесткі
Нарадзіўся	1270-е
Памёр	26 верасьня 1313; Страсбург
Літаратурная дзейнасьць
Род дзейнасьці	сьвятар, лекар, багаслоў і паэт
Мова	лацінская

Го́тфрыд фон Гагена́ў (па-нямецку: Gottfried von Hagenau, па-лацінску: Godefridus Haguenonensis; 1270-я — 26 верасьня 1313, Страсбург) — эльзаскі сярэднявечны сьвятар, лекар, багаслоў і паэт^[1]. Імя, магчыма, паходзіць ад места Гагенаў (цяпер у Францыі), магчымага месца нараджэньня.

Жыцьцяпіс

Вывучаў мэдыцыну і багаслоўе ў Страсбургу ды Парыжы, пасьля працаваў дырэктарам школы ў Базэлі (Швайцарыя). Уладкаваўшыся лекарам у Страсбургу, у 1300 заняў пасаду каноніка ў касьцёле сьвятога Томаса. У 1307 року запачаткаваў у парафіі сьвята Беззаганнага Зачацьця, якое адзначалася ўсутыч да пераходу храму пратэстантам у 1524 року. Памёр 26 верасьня 1313 і пахаваны ў храме. Усю сваю спадчыну ахвяраваў парафіі^[1].

Готфрыд фон Гагенаў — аўтар эпасу (4134 рыфмаваныя вершы па-лацінску) пра жыцьцё Дзевы Марыі, Liber sex festorum beatae Virginis (1293—1300), які прысьвяціў біскупу Конраду фон Ліхтэнбэргу.^[1]^[2]. Арыгінальны рукапіс згарэў у пажары Страсбурскай бібліятэкі пры аблозе 1870 року^[3], аднак засталіся копіі, якія захоўваюцца ў Нацыянальнай і ўнівэрсытэцкай бібліятэцы места^[2]^[4].

^ ^а ^б ^в Gottfried von Haguenau. Deutsche Biographische Enzyklopädie der Theologie und der Kirchen (DBETh). Праверана 21 сакавіка 2017 г.
^ ^а ^б Das Carmen sex festorum Beatae Mariae Virginis und die übrigen lateinischen Gedichte des Gotfried von Hagenau. Universität Freiburg. Праверана 21 сакавіка 2017 г.
^ Arbogast, Jean Épitaphes et monuments funéraires Église Saint-Thomas Strasbourg. — Eckbolsheim: Éditions du Signe, 2013. — С. 28. — ISBN 978-2-7468-3070-7
^ Gottfried von Hagenau. Handschriftencensus. Праверана 23 сакавіка 2017 г.