Глыбоцкі замак

Помнік абарончай архітэктуры
Глыбоцкі замак
Глыбоцкі
Краіна	Беларусь
Места	Глыбокае
Дата заснаваньня	XVI ст.

Глыбоцкі замак — помнік гісторыі і абарончай архітэктуры ў Глыбокім. Знаходзіўся ў паўднёва-заходняй частцы мястэчка. Існаваў у XVI—XVIII стагодзьдзях.

Гісторыя

Драўляны замак у Глыбокім збудавалі ў XVI ст. на месцы двара Зяновічаў. Замак значыцца на мапе М. Струбіча «Тэатар вайны за Інфлянты» (1589 год).

У вайну Маскоўскай дзяржавы з Рэччу Паспалітай (1654—1667) пад сьценамі замка 30 чэрвеня 1654 году адбыўся бой паміж абаронцамі Вялікага Княства Літоўскага і маскоўскімі захопнікамі на чале з думным дваранінам Ж. В. Кондыравым. Паводле гістарычных крыніцаў, 2 жніўня 1654 году замак ушчэнт выпалілі, а кіраўнік абароны замка полацкі падкаморы Бяганскі трапіў у палон. У 1658 годзе аддзел войска палкоўніка ВКЛ Уладзіслава Валовіча ўзяў штурмам замак і спаліў яго, а захопленыя гарматы адвёз у Даўгінаў.

Адноўлены пазьней замак праіснаваў да канца XVIII ст. За часамі Вялікай Паўночнай вайны ў 1700 годзе замак моцна пацярпеў ад вялікага пажару. Паступова замчышча забудавалі, назву Замкавая атрымала адна з вуліцаў мястэчка.

Архітэктура

Апісаньні замка не захаваліся, але, відаць, ён не адрозьніваўся ад традыцыйных тагачасных фартыфікацыяў зь земляным валам, драўлянымі сьценамі і вежамі.

Літаратура

• Беларуская энцыклапедыя: У 18 т. / Рэдкал.: Г. П. Пашкоў і інш. — Мн.: БелЭн, 1997. — Т. 5: Гальцы — Дагон. — 576 с. — ISBN 985-11-0090-0