Герб Амсьціслава

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
Гістарычны герб Амсьціслава (леваруч) і сучасны афіцыйны з улікам расейскага гербу (праваруч)

Герб Амсьціслава — геральдычны сымбаль Амсьціслава, нададзены месту каралём польскім і вялікім князем літоўскім Уладзіславам Вазам 16 жніўня 1634: «у залатым полі збройная рука зь мечам — „Малая Пагоня“»[1].

Герб Амсьціслаўскага княства з Маскоўскага Тытулярніка (1672)

У часе расейскага панаваньня імпэратрыца Кацярына II 16 жніўня 1781 даравала Амсьціславу новы герб:

У верхняй частцы тарчы частка гербу Магілёўскага: у залатым полі палова Расейскага гербу. У ніжняй, у срэбным полі, чырвоная лісіца, якая бяжыць, каторых зьвяроў ваколіцы гэтага места маюць багата.

Вылучэньне чырвонай лісіцы (пазьней — воўка) як нейкай асаблівасьці Амсьціслава зьяўляецца штучным вынікам творчасьці мастакоў і складальнікаў гербаў з Геральдмейсьцерскай канторы Расейскай імпэрыі[2].

У сучаснай Беларусі зь невядомых прычынаў 29 лістапада 2000[3] статус афіцыйнага геральдычнага сымбалю Амсьціслава атрымаў гібрыд гістарычнага і расейскага мескіх гербаў. Аўтар гэтага гербу — С. Рассадзін.

Афіцыйнае апісаньне:

У срэбным полі францускай тарчы зь сіняга воблака выходзіць далонь Гасподняя, узброеная сталёвым мечам, а пад ёю гербавая эмблема Амсьціслаўскага княства, чырвоны воўк, павернуты налева.

Тым часам згодна з адзінай вядомай выявай гербу Амсьцілаўскага княства, што месьціцца ў Маскоўскім Тытулярніку (1672), ягоным геральдычным сымбалем была «Пагоня».

Крыніцы[рэдагаваць | рэдагаваць крыніцу]

  1. ^ Цітоў А. Геральдыка Беларускіх местаў. — Менск, 1998.
  2. ^ Шляхі развіцця беларускай геральдыкі // Цітоў А. Геральдыка Беларускіх местаў. — Менск, 1998.
  3. ^ Решение Мстиславского райисполкома от 29 ноября 2000 г. №11/2.

Літаратура[рэдагаваць | рэдагаваць крыніцу]

  • Цітоў А. Геральдыка Беларускіх местаў / Маст. А. Бажэнаў. — Менск: «Полымя», 1998. — 287 с.: іл. ISBN 985-07-0131-5.

Commons-logo.svg Герб Амсьціславасховішча мультымэдыйных матэрыялаў