Рамуальд Зямкевіч

Рамуальд Зямкевіч
Род дзейнасьці	бібліёграф, гісторык літаратуры, публіцыст, перакладчык
Дата нараджэньня	7 лютага 1881
Месца нараджэньня	Варшава, Царства Польскае, Расейская імпэрыя
Дата сьмерці	1943/44
Месца сьмерці	канцлягер Асьвенцім
Занятак	літаратуразнаўца, перакладнік, журналіст, паэт, адмысловец у прапагандзе, бібліёграф, публіцыст, гісторык літаратуры, беларусазнавец
Псэўданімы	Роман Земляника, Юрий Олелькович, Савка Барывой, Шершень, Р. Зем., Ром. Зем., Р-н Сун. і Р . С-ца.
Сябра ў	Беларускае навуковае таварыства
Рамуальд Зямкевіч у Вікісховішчы

Гальяш Леўчык, Зоська Верас, Рамуальд Зямкевіч

Эксьлібрыс Р. Зямкевіча. Добра відаць свастыку

Рамуа́льд Алякса́ндравіч Зямке́віч (7 лютага 1881, Варшава — 1943/44, канцлягер Асьвенцім (?)) — беларускі бібліёграф, гісторык літаратуры, публіцыст, перакладчык.

Біяграфічныя зьвесткі

Бацькі паходзілі са Случчыны. Вучыўся ў Кіеве, атрымаў прафэсію інжынэра-мэханіка.

Зьбіраў матэрыялы па гісторыі беларускай літаратуры і культуры, працаваў у бібліятэках і архівах Варшавы, Львова, Раперсьвіля (Швейцарыя). Жывучы пераважна ў Варшаве, шмат езьдзіў, у тым ліку па Беларусі. Быў зьвязаны зь беларускім нацыянальна-культурным рухам. У 1908 рабіў фальклёрна-этнаграфічныя запісы каля Зэмбіна на Барысаўшчыне. Сабраў калекцыю беларускага народнага адзеньня (у 1918 немцы вывезьлі ў Бэрлін). У 1913—14 шукаў гісторыка-літаратурныя матэрыялы на Магілёўшчыне. У 1915—17 жыў у Менску, працаваў ваенным інжынэрам. Часта бываў у Вільні і Пецярбургу як цэнтрах беларускага грамадзка-культурнага руху і выдавецкай справы. Сабраў унікальную бібліятэку па гісторыі, мовазнаўстве (усе працы Я. Карскага), літаратуры, фальклёры Беларусі, Украіны, Летувы, Польшчы і іншых славянаў, вялікую калекцыю рукапісаў беларускіх пісьменьнікаў. Сярод рарытэтаў ягонай бібліятэкі былі шматлікія старадрукі, у тым ліку «Біблія» Ф. Скарыны, Астроская Біблія 1581, «Лексыкон» П. Бярынды, «Хроніка» М. Белскага, кітабы 16—17 ст., аўтографы А. Рыпінскага, А. Вярыгі-Дарэўскага, В. Дуніна-Марцінкевіча, Я. Лучыны, Ф. Багушэвіча, Ядвігіна Ш. (рукапіс ягонай драмы «Злодзей»), Я. Купалы, Я. Коласа, М. Багдановіча, аўтараў «Нашай долі» і «Нашай нівы» і інш.

Арыштаваны ў акупаванай нацыстамі Варшаве. Загінуў у канцлягеры. Ягоныя зборы і бібліятэка зьніклі ў разбуранай Варшаве, частка трапіла ў прыватныя рукі.

Навукова-дасьледчыцкая дзейнасьць

З 1909 друкаваўся ў «Нашай ніве» і іншых беларускіх выданьнях. Дасьледаваў беларускую бібліяграфію, старажытную беларускую літаратуру, беларускую літаратуру ХІХ ст., этнаграфію, беларускую народную эстэтыку, фальклор, беларускае мастацтва. Падрыхтаваў і выдаў першы спэцыялізаваны бібліяграфічны даведнік на беларускай мове — «Беларуская бібліяграфія» (1910). Напісаў шэраг прац па гісторыі беларускай літаратуры, у якіх прывёў невядомыя на той час зьвесткі пра В. Дуніна-Марцінкевіча, Я. Баршчэўскага, А. Кіркора, А. Ельскага, Я. Лучыну, К. Каганца, М. Багдановіча і інш. Апублікаваў невядомыя рукапісы М. Багдановіча (1919), К. Каганца (1920), В. Дуніна-Марцінкевіча (1923), Я. Лучыны (1932). У 1919 у часопісе «Беларускае жыцьцё» (№ 5) упершыню надрукаваў гравіраваны партрэт В. Цяпінскага (1576), які адшукаў у бібліятэцы К. Сьвятаполк-Завадзкага ў Крошыне. Дапамагаў матэрыяламі і зьвесткамі Я. Карскаму, абменьваўся навуковай інфармацыяй з А. Ельскім, А. Шлюбскім, даваў свае архіўныя знаходкі і рукапісы, успаміны варшаўскаму славісту Ю. Галомбаку, калі той працаваў над манаграфіяй пра В. Дуніна-Марцінкевіча.

Сабраў унікальную бібліятэку па гісторыі, мовазнаўстве, літаратуры, фальклёры, вялікую калекцыю старабеларускіх рукапісаў. У сваіх працах прывёў новыя зьвесткі і апублікаваў невядомыя рукапісы беларускіх пісьменьнікаў ХІХ — пач. ХХ ст.

Большасьць ягоных багатых збораў, а таксама частка ўласных рукапісаў (у прыватнасьці, рукапіс кнігі «Кароткі нарыс гісторыі беларускай музыкі») загінулі.

Літаратурная творчасьць

У 1942—43 пад псэўданімам Шэршань друкаваў сатырычныя вершы ў беластоцкай газэце «Новая дарога». Пісаў вершы і па-польску. Перакладаў на беларускую мову творы ўкраінскага пісьменьніка В. Стафаніка (друк. ў «Нашай ніве») і француза А. Дадэ.

Рукапісная спадчына

Паасобныя рукапісы і пісьмы зьберагаюцца ў архівах і бібліятэках Менску, Вільні, Варшавы, Санкт-Пецярбургу.

Бібліяграфія

• Беларуская бібліяграфія: Беларускія кнігі XVI—XVIII стст. // Першы беларускі каляндар «Нашае нівы» на 1910 г. Вільня, 1910;
• Вінцук Дунін-Марцінкевіч, яго жыцьцё і літаратурнае значэньне // Наша ніва. 1910. 25 лістап.;
• Адам Ганоры Кіркор: (Біяграфічна-бібліяграфічны нарыс у 25-летнюю гадаўшчыну сьмерці). Вільня, 1911 /Кірыліца і лацінка/;
• Ян Баршчэўскі — першы беларускі пісьменьнік ХІХ сталецьця: (Успаміны ў 60-ю гадаўшчыну сьмерці). Вільня, 1911 /Кірыліца і лацінка/;
• Тарас Шаўчэнка і беларусы // Наша ніва. 1911. 24 лют.;
• Гульня «Курылка» // Наша ніва. 1912. 1 сак.;
• М-ка Крошын // Bielarus. 1915. 4 чэрв.;
• 400-лецьце беларускага друку // Вольная Беларусь. 1917. 8 жн.;
• Значэньне Францішка Скарыны ў беларускай культуры // Вольная Беларусь. 11 жн.;
• Друк Скарыны і друк сучасны // Вольная Беларусь. 23 жн.;
• Няміга і Менск. Старая беларуская пісьменнасьць // Варта. 1918. № 1;
• Цукраварні на Беларусі. [Менск], 1918;
• Францыск Скарына // Беларускае жыцьцё. 1919. 6 ліп.;
• Васіль Цяпінскі // Беларускае жыцьцё. 14 ліп.;
• Беларускія назовы вуліцаў у Менску // Беларусь. 1919. 4 лістап.;
• Стары замак у Менску // Беларусь. 14—15 лістап.;
• Стары Менск у беларускіх успамінах // Беларусь. 26—27 лістап.; 1920. 3, 13 студз.;
• Варункі нацыянальнага адраджэньня // Звон. 1919. 3 кастр.;
• Станіслаў Манюшка і беларусы // Беларускае жыцьцё, 1920. 19 студз.;
• Гутаркі аб беларускай літаратуры // Новае жыцьцё. 1923. 3 сак.;
• Нацыянальнасьць у Вінцука Дуніна-Марцінкевіча // Заходняя Беларусь. Вільня, 1924;
• Аб беларускай народнай эстэтыцы // Маладняк. 1927. № 3;
• Ян Неслухоўскі (Янка Лучына) і яго няведамыя вершы // Нёман. 1932. № 2.

Літаратура

• Гарэцкі М. Зямкевіч Р. // Гарэцкі М. Гісторыя беларускай літаратуры. Мн., 1992;
• Умястоўскі Ф. Праўда аб рэдагаваньні «Нашай долі» (1906): Адказ на пісьмо Саўкі Барывоя (Р.Зямкевіча), апублікаванае ў газ. «Права працы» (Вільня, 1927, 14 сьнеж., № 3. С. 4)… // Беларускі дзень. № 40, 24 сьнежня 1927;
• Ахрыменка П. Тарас Шаўчэнка і Беларусь. Мн., 1969;
• Кісялёў Г. Загадка беларускай «Энеіды». Мн., 1971;
• Кісялёў Г. Пошукі імя. Мн., 1978;
• Мальдзіс А. Таямніцы старажытных сховішчаў. Мн., 1974;
• Кабржыцкая Т., Рагойша В. Карані дружбы. Мн., 1976;
• Саламевіч Я. Слоўнік беларускіх псеўданімаў і крыптанімаў (XVI—XX сіст.). Мн., 1983;
• Саламевіч Я. Зямкевіч // ЭГБ ў 6 т. Т. 3. Мн., 1996;
• Маракоў Л. У. Рэпрэсаваныя літаратары, навукоўцы, работнікі асветы, грамадскія і культурныя дзеячы Беларусі, 1794—1991. Энц. даведнік. У 10 т. Т.1. —Мн:, 2003. ISBN 985-6374-04-9.

Вонкавыя спасылкі

Рамуальд Зямкевіч — сховішча мультымэдыйных матэрыялаў

• Псіхалогія здрады: беларускі нацыянальны рух вачыма канфідэнта ІІ аддзела польскага Генеральнага штаба
• ЗЯМКЕВІЧ Рамуальд Аляксандравіч