In Vino

In Vino
Інфармацыя
Гады	2003 — наш час
Адкуль	Менск, Беларусь
Мова	расейская
Жанр(ы)	панк-рок
Зьвязаныя праекты	«Бетон»
Удзельнікі
Артур Шустоўскі Павал Бурчык Андрэй Верасаў
Былыя ўдзельнікі	Аляксеей Івашка Дзяніс Дзенісевіч Кірыл Плявака Стэша Казак Юлія Капцяева Нік Пятровіч Аляксей Барозна Сяргей Сугак
invinoband.by

«In Vino» — беларускі панк-рок гурт зь Менску, створаны франтмэнам Артурам Шустоўскім у 2003 годзе.

Гісторыя

Восеньню 2003 году Артур Шустоўскі сустрэўся з бубначом Аляксеем Івашка, і яны вырашылі аб’яднацца ў свой гурт разам з экс-удзельнікамі гурту «Бетон»: бас-гітарыстам Дзянісам Дзенісевічам і сола-гітарыстам, бэк-вакалістам Кірылам Плявакам — абодва зь іх адыграюць у новым калектыве год. Летам 2004 году крэсла за барабанамі пераймае Сяргей Сугак, а восеньню таго ж году ў гурт уліваецца бас-гітарыст Аляксей Баразна.

Артур Шустоўскі, лідар «In Vino»

Стыль

Кацярына Асіпчык для «Музыкальнай газеты» у 2007 годзе зрабіла разбор музычнай формулы гурту: панк-рок на смаркатыя тэксты пра каханьне.

Канцэртны аглядальнік «XLAM.BY» Юлія «Ju» Тынявіцкая пасьля выступу гурта на трыбьюце «Placebo» у 2008 годзе ўзгадвала, што для ўдзельнікаў гурту характэрны стыльныя касьцюмы, макіяж, і іх звычайна ў дастатку падтрымліваюць віскотныя дзяўчынкі. Віка «Кактус» Нарко з «LiveSound.by» у аглядзе той жа імпрэзы пісала пра «заўзяты панк-рок з звонкім, амаль падлеткавым вакалам, над якім, дарэчы, яшчэ можна працаваць і працаваць».

На прыкладзе трыбьюту «Ляпіса Трубяцкога» ў 2011 годзе грамадзкая кампанія «Будзьма Беларусамі!» сьведчыла апалітычнасьць гурта.

Ацэнкі

Музыкі гурту «Milque Twins» характарызавалі сваіх супернікаў па конкурсу «Музычны плэй-оф» у 2007 годзе як гурт, які дастойны фіналу й настрой якога спадабаўся.

Дар’я Рублеўская па выніках канцэрту на пяцігодзьдзе «Martin S.» перадавала пра «вузкае кола слухачоў» гурта.

Назва гурта

Назва «In vino veritas» (па-лацінску: Ісціна ў віне) прыйшла да ўдзельнікаў з нагоды браць на першыя рэпэтыцыі па некалькі бутэлек віна, выпіты алькаголь зь якіх дазваляў пісаць песьні спарней. Франтмэн Артур Шустоўскі тлумачыў Машы «СкаZка» Сказцы з «Музыкальнай газеты»: «Музыка стала цячы як віно, напоўнілася сэнсам, і ў словах была чутна нотка той праўды, якую называюць ісьцінай». Пад канец 2004 году апошняе слова ў назьве было вырашана ўбраць, бо «ісьціна прысутнічае ў самой музыцы».

Дыскаграфія

Альбомы

• «В свои 23» (2006)
• «Акустика» (2012)

Сынглы

• «Гимн» (2013)
• «С новым годом» (2013)
• «О Монро» (2013)
• «Влюбился в суку» (2014)
• «Пойдем курнём» (2014)
• «Будь моей женой» (2014)
• «Тебе 24» (2014)

Удзел у зборніках

• «LiveSound. Made in Belarus» (2007), трэк Мечты

Кліпы

• «Марта» (2008)
• «Влюбился в суку» (2014)
• «Будь моей женой» (2016)

Удзельнікі

• Артур Шустоўскі — вакал, гітара (2003—)
• Павал Бурчык — бас-гітара, бэк-вакал (2019—)
• Андрэй Верасаў — ударныя (2019—)

Былыя ўдзельнікі

• Аляксеей Івашка — ударныя (2003—2004)
• Дзяніс Дзенісевіч — бас-гітара (2003—2004)
• Кірыл Плявака — сола-гітара, бэк-вакал (2003—2004)
• Стэша Казак — віялянчэль (2009—2010)
• Юлія Капцяева — скрыпка (2009—2010)
• Нік Пятровіч — клявішныя, бэк-вакал (2010—2013)
• Аляксей Барозна — бас-гітара, бэк-вакал (2004—2018)
• Сяргей Сугак — ударныя (2005—2018)