Лідзкая ратуша

Помнік грамадзянскай архітэктуры
Лідзкая ратуша
Макет Лідзкай ратушы^[1]
Краіна	Беларусь
Места	Ліда

Лідзкая ратуша — помнік архітэктуры XVIII стагодзьдзя ў Лідзе, адзін з сымбаляў места. Знаходзілася на Рынку, яе галоўны фасад выходзіў да замка. Твор архітэктуры барока, які набыў рысы клясыцызму ў выніку перабудовы. Існавала да канца XIX ст.

Гісторыя[рэдагаваць | рэдагаваць крыніцу]

Вялікае Княства Літоўскае[рэдагаваць | рэдагаваць крыніцу]

17 верасьня 1590 году кароль і вялікі князь Жыгімонт Ваза надаў Лідзе Магдэбурскае права. Неўзабаве на Рынку збудавалі першую драўляную ратушу.

Відаць, у XVIII ст. замест драўлянага збудавалі мураваны будынак у стылі барока. Вакол новай ратушы ўзьвялі гандлёвыя рады.

Пад уладай Расейскай імпэрыі[рэдагаваць | рэдагаваць крыніцу]

Па трэцім падзеле Рэчы Паспалітай (1795 год), калі Ліда апынулася ў складзе Расейскай імпэрыі, расейскія ўлады пазбавілі места Магдэбурскага права, а ратушу перарабілі пад прысутныя месцы. Захаваліся абмеры будынка колішняй ратушы^[2], зробленыя ў 1803 годзе. Апісаньне ратушы пакінуў лідзкі гісторык Міхал Шымялевіч.

Будынак ратушы згарэў у час пажару 1891 году і больш не аднаўляўся.

Архітэктура[рэдагаваць | рэдагаваць крыніцу]

Помнік архітэктуры барока, які набыў рысы клясыцызму ў выніку перабудовы. Гэта прастакутны ў пляне 2-павярховы будынак, накрыты 2-схільным дахам. Бакавыя фасады ўпрыгожвалі фігурныя франтоны. На абмерах 1803 году франтоны адсутнічаюць, што можа тлумачыцца спрашчэньнем архітэктуры будынка па адным зь мескіх пажараў.

У 2015 годзе зьявіўся праект абудовы ратушы, выкананы краяўнаўцам С. Суднікам. Паводле гэтага праекту скульптар В. Вараб’ёў зрабіў макет будынка.