Ляхавіцкі строй
Ляхавіцкі строй — традыцыйны комплекс беларускага народнага адзеньня Цэнтральнай Беларусі. Бытаваў у ХІХ — пачатку ХХ ст. на тэрыторыі Ляхавіцкага, Нясвіскага і Клецкага раёнаў.
Жаночае адзеньне
[рэдагаваць | рэдагаваць крыніцу]
Аснову летняга жаночага касьцюму складалі кашуля, спадніца, фартух, пояс, гарсэт. Кашулю кроілі з прамымі плечавымі ўстаўкамі, аздаблялі вузкімі паскамі чырвонага натыканьня, якія кампанаваліся ў гарызантальныя шлякі, разьмешчаныя на грудзях, рукавах, плечавых устаўках, адкладным каўняры. У строгім арнамэнце амаль адсутнічаў рамбічны і расьлінны ўзор. Шырокая, кроеная з 4—5 полак шарсьцянкі спадніца (выбіванка, андарак, плацянковая спадніца) вызначалася суладзьдзем сакавітых разнаколерных (у вясёлкавай гаме) гарызантальных шлякоў, якія чаргаваліся зь цёмна-сінім, цёмна-зялёным, бурачковым ці чорным колерам фону. Прасавалася ў дробныя складкі. Фартух шылі з 2 полак кужалю, аздаблялі, як і кашулю. Аднаполкавы фартух шылі са стракатых тканін. Вузкі пояс, тканы геамэтрычнымі ўзорамі ў чырвона-зялёным калярыце, завязваўся сьпераду. Гарсэты цёмна-сінія, зялёныя, чорныя ў выглядзе безрукаўкі з баскай-клінкамі ці накшталт кароткага ліфа з адразной баскай на сьпіне.
Галаўныя ўборы — падвічка, намітка ці хустка, аздобленыя букетамі кветак, зеляніны, гірляндачкай (гафрыраванай разнаколернай паперай, сабранай у веер). Нагрудныя і шыйныя ўпрыгожаньні — пацеркі, тасёмкі, стужкі, абразкі.
Мужчынскае адзеньне
[рэдагаваць | рэдагаваць крыніцу]Мужчынскае адзеньне складалі кашуля навыпуск, пояс і шарачковыя нагавіцы. Галаўнымі ўборамі былі саламяныя капелюшы, упрыгожаныя чырвонымі стужкамі, кветкамі, каласкамі жыта. Верхняе мужчынскае і жаночае адзеньне — сярмяга са складкамі на сьпіне, кароткая копта з нашыўкамі чорнага аксаміту, блакітны каптан з чырвонымі выкладамі на грудзях і рукавах.
Літаратура
[рэдагаваць | рэдагаваць крыніцу]- БЭ. — Мн.: 1999 Т. 9. — С. Ляхавіцкі строй. С. 436.