Людміла Пайдушакава

Людміла Пайдушакава
Дата нараджэньня	29 чэрвеня 1916(1916-06-29)
Месца нараджэньня	Радашаўцы[d], Скаліца, Трнаўскі край, Славаччына
Дата сьмерці	6 кастрычніка 1979(1979-10-06) (63 гады)
Месца сьмерці	Высокія Татры, Попрад, Прэшаўскі край, Славаччына
Месца вучобы	Прыродазнаўчы факультэт Унівэрсытэту Коменскага[d]
Занятак	астраномка
Навуковая сфэра	астраномія
Месца працы	Астранамічны інстытут Славацкай акадэміі навук[d]
Узнагароды	Прэмія Нушла[d] (1946)

Лю́дміла Па́йдушакава (па-славацку: Ľudmila Pajdušáková; 29 чэрвеня 1916, Радашаўцы — 5 кастрычніка 1979, Вышнія Гагі) — славацкая астраномка, фізык. Доктарка прыродных навук, кандыдатка навук.

Жыцьцяпіс

Навучалася ў рэальнай гімназіі Кляштару пад Зьневам, у 1935—1936 роках атрымала спэцыяльнасьць памочніцы настаўніка ў прыватнай навучальнай установе.

Выкладала ў народнай школе ў Вінасадах, Сьлепчанах, Шцьяўніку, Брвэнішці і Трэнчанскай Цеплай. З 1944 року працавала ў дзяржаўнай абсэрваторыі(d) на Скалістай плесе(d). Вывучала астраномію на прыродазнаўчым факультэце ўнівэрсытэту Коменскага ў Браціславе.

Займалася назіраньнем мэтэораў. У 1946 року сабрала 10 000 здымкаў 11 000 мэтэораў, што паводле колькасьці саступала толькі гарвардзкай калекцыі таго року. Аднак найбольш значнага посьпеху Людміла Пайдушакава дабілася ў назіраньні камэтаў. Ейным імем названыя пяць камэтаў, адкрытых у 1946—1953 роках.

З 1958 року займала пасаду дырэктаркі Астранамічнага інстытуту Славацкай акадэміі навук(d), дзе займалася дасьледаваньнем атмасфэры, пэрыядычнасьці і зьменьлівасьці сонечнай актыўнасьці.

Апублікавала да 20 самастойных навуковых, дзясяткі прафэсійных і больш за 100 працаў навукова-папулярнага характару.

У 1961—1963 роках была сяброўкай Сусьветнай рады міру, у 1962—1974 — старшынёй Славацкага астранамічнага таварыства. Сяброўка Міжнароднага астранамічнага зьвязу з 1967 року.

Памяць

Да 100-годзьдзя нараджэньня, 29 чэрвеня 2016 року, у ейнай роднай вёсцы Радашаўцах адкрытая памятная дошка.

У ейны гонар названая малая плянэта (3636) Пайдушакава.

Вонкавыя спасылкі

• Матэматычны інстытут АНС  (славацк.)