Драўляныя цацкі Харвацкага Загор’я
Драўляныя цацкі Харвацкага Загор’я (па-харвацку: Drvene igračke Hrvatskog zagorja) — традыцыйны харвацкі прадукт, які паўстаў у XIX стагодзьдзі ў Загор’і.
Вытворчасьць цацак пачалася і застаецца дасюль у вёсках вакол мястэчак Марыя Бістрыца і Горна Стубіца. Вырабляюцца каля 50 мадэляў цацак, такіх як дудкі, ляскоткі (птушак з коламі, якія штурхаюць на палачцы), тамбура, драўляныя жывёлы (зазвычай коні), сьвістулькі, аўтамабілі, грузавікі, цягнікі, самалёты, дзіцячая мэбля для лялек і гэтак далей.
Цацкі характарызуюцца тым, што яны вырабляюцца ўручную мужчынамі, а фарбуюцца ў асноўным жанчынамі. Не існуе ніколі дзьвюх зусім аднолькавых цацак, бо кожная зь іх робіцца ўручную[1]. Цацкі ствараюцца зь мясцовых дрэваў: вярбы, клёну, буку і ліпы. Дрэва сьсякаюць, сушаць, рэжуць і прыдаюць форму з дапамогай драўляных або кардонных шаблёнаў. Найбольш распаўсюджаныя колеры цацак: чырвоны, сіні, белы і чорны. Упрыгожваюцца кветкавымі і геамэтрычнымі ўзорамі. Прыёмы вытворчасьці перадаваліся ў сем’ях з пакаленьня ў пакаленьне і захаваліся да цяперашняга часу.
Цацкі прадаюцца на кірмашах, падчас рэлігійных сьвят, а таксама ў самым вялікім храме ў Марыі Бістрыцы. Таксама цацкі захоўваюцца ў музэях. Уключаны ў сьпіс ахоўных аб’ектаў нематэрыяльнай спадчыны Рэестру культурных каштоўнасьцяў Рэспублікі і, з 2009 году ў сьпіс нематэрыяльнай культурнай спадчыны ЮНЭСКО[2][3].
Крыніцы
[рэдагаваць | рэдагаваць крыніцу]- ^ UMIJEĆE IZRADE DRVENIH TRADICIJSKIH DJEČJIH IGRAČAKA S PODRUČJA HRVATSKOG ZAGORJA na stranicama Ministarstva kulture Republike Hrvatske
- ^ http://www.min-kulture.hr/default.aspx?id=5220
- ^ Opis nematerijalne svjetske baštine na službenim stranicama UNESCO-a