Георгі Шыловіч

	Георгі Шыловіч
Асабістыя зьвесткі
Нарадзіўся	7 студзеня 1924; Менск, БССР, СССР;
Памёр	20 кастрычніка 2011 (87 гадоў); Менск, Беларусь;
Літаратурная дзейнасьць
Род дзейнасьці	пісьменьнік, дзіцячы пісьменьнік, журналіст
Мова	беларуская мова
Узнагароды

Гэтая назва мае некалькі сэнсаў. Калі вас цікавяць іншыя сэнсы, глядзіце таксама Шыловіч.

Гео́ргі Ўладзі́меравіч Шыло́віч (7 студзеня 1924, Менск — 20 кастрычніка 2011, Менск) — беларускі празаік, перакладчык, журналіст і кінадраматург.

Жыцьцяпіс

Нарадзіўся ў сям’і служачага. Да вайны скончыў першы курс Менскага будаўнічага тэхнікуму. Са сьнежня 1941 году ўдзельнік Менскага падпольля, а з сакавіка 1943 году — партызан у брыгадзе імя Жалезьняка на Бягомльшчыне, з 1944 па 1945 гады служыў у Савецкай Арміі.

Скончыў аддзяленьне журналістыкі Беларускага дзяржаўнага ўнівэрсытэту ў 1951 годзе. Працаваў у рэдакцыях газэт «Мінская праўда» (1951-1953), «Зорька» (1953-1964). З 1965 году — адказны сакратар, а ў 1978-1985 гадах — намесьнік галоўнага рэдактара часопісу «Беларусь». Сябра СП СССР з 1961 году.

Творчасьць

Першыя апавяданьні надрукаваў у 1948 годзе. Выйшлі кнігі нарысаў, апавяданьняў і аповесьцей для дзяцей «Твая дарога» (1957), «Запіска на шыбе» (1960), «Школа ля крэпасьці» (1962), «Піянэрская адвага» (1962), «Праз полымя вайны» (1963), «Сшытак у чорнай вокладцы» (1965), «Чарапаха без панцыру» (1966), «Сьвятло далёкага Алькора» (1973). Напісаў аповесьці «Туман ідзе па сьледу» (часопіс «Беларусь», 1963-1964), «Сустрэча з сонейкам, альбо Аповесьць пра Пецьку-флібусьцьера і некаторых яго сяброў» (1981), «Падарожжа сярод лета» (1983). У 1986 годзе выдадзены аднатомнік выбраных твораў «Школа каля крэпасьці».

Аўтар сцэнарыяў дакумэнтальных фільмаў «Родныя бярозы не сьпяць» (1965), «Зялёны патруль» (1966), «Трэба марыць» (1967).

Перакладаў з расейскай і ўкраінскай моў.

Узнагароды

Узнагароджаны ордэнам Айчыннай вайны II ступені, мэдалямі.

Літаратура

Маргарыта Яфімава. Святло мужнасці, натхнення і высакародства... (Жыцьцё й творчасьць Георгія Шыловіча.) // Полымя : часопіс. — 2009. — № 12. — С. 136―146.

Вонкавыя спасылкі

Шыловіч на slounik.org