Гэльсынгборг

Хэльсынгборг
Выгляд на цэнтар Гэльсынгборгу з Унутранага порту.
Першыя згадкі:	1085
Насельніцтва (2010) • колькасьць: • шчыльнасьць:	97 122 25,29
Часавы пас: • летні час:	UTC+1 UTC+2
Геаграфічныя каардынаты:	56°2′68″ пн. ш. 12°41′62″ у. д.
Хэльсынгборг на мапе Швэцыі Хэльсынгборг
Галерэя здымкаў у Wikimedia Commons

Гэльсынгборг (па-швэдзку: Helsingborg) — горад на поўдні Швэцыі, у лэне Сконэ, у аднайменным ляндзкапе, цэнтар аднайменнай камуны.

Назва

Назва гораду паходзіць ад словаў «helsing» — частка шыі, а ў дадзеным выпадку — найвузкае месца праліву Эрэсунд, і «borg» — замак.

Гісторыя

Гэльсынгборг. Помнік Магнусу Стэнбоку каля Ратушы.

Гэльсынгборг. Вежа Чэрнан.

Гэльсынгборг — адзін з найстаражытнейшых гарадоў Скандынавіі, лічыцца што забудова ў форме невялікай фартэцыі існавала тут ужо ў X стагодзьдзі.

Адам Брэменскі ўзгадвае горад у 1070-х гадах, а 21 траўня 1085 году Гэльсынгборг згадваецца ў лісьце дацкага караля Кнута Сьвятога — гэтая дата й зьяўляецца афіцыйнаю датай заснаваньня гораду. У XII стагодзьдзі тут пабудавалі значна мацнейшы замак, горад пачаў расьці й у XIV стагодзьдзі Гэльсынгборг становіцца адным з найбуйнейшых гарадоў Даніі. У 1332 годзе горад разам з усім Сконэ й Блекінге набыў швэдзкі кароль Магнус Эрыксан, аднак ужо ў 1360 годзе дацкі кароль Вальдэмар Атэрдаг зноў адваяваў гэтыя землі. У XV—XVI стагодзьдзях значнасьць Гэльсынгборгу паменшылася са зьяўленьнем на супрацьлеглым беразе Эрэсунду замка Кронборг у горадзе Гэльсынгёр. У 1658 годзе Гэльсынгборг пераходзіць Швэцыі й у бліжэйшыя паўстагодзьдзі пабачыў шмат войнаў: у прыватнасьці, у 1710 годзе, у часе Вялікай Паўночнай вайны тут швэдзкая армія Магнуса Стэнбока перамагла датчанаў.

У XIX стагодзьдзі горад паступова пачынае расьці. У 1892 годзе Гэльсынгборг і Гэльсынгёр былі злучаныя паромам, прычым гэты транспарт злучае два гарады й дасёньня. У 1921 годзе ў Гэльсынгборгу адчыніў свае дзьверы першы ў Швэцыі гарадзкі тэатар, які, дарэчы, у 1944 годзе ўзначальваў Інгмар Бэргман. 15 верасьня 1973 годзе ў мясцовым шпіталі памёр кароль Густаў VI Адольф.

Выдатныя мясьціны

Гэльсынгборг. Дом Якаба Гансэна.

• Вежа «Чэрнан» (літаральна «ядро») — пабудаваная ў 1310-х гадах.
• Царква Сьвятой Марыі (XII ст.)
• Фахвэркавы Дом Якаба Гансэна (1641).
• Ратуша (1887)
• Гарадзкія ўмацаваньні з Тэраснымі лесьвіцамі
• Помнік Магнусу Стэнбоку

Вонкавыя спасылкі

Гэльсынгборг — сховішча мультымэдыйных матэрыялаў