| Здымак зроблены тэлефонам на плятформе Android вэрсія 1.0 beta 9 | |
| URL | instagram.com |
|---|---|
| Alexa рэйтынг | 44 (жнівень 2013) |
| Тып | сацыяльная сетка |
| Рэгістрацыя | абавязковая задарма |
| Даступныя мовы | ангельская, кітайская, француская, нямецкая, італьянская, японская, карэйская, партугальская, гішпанская, расейская |
| Пачатак працы | 6 кастрычніка 2010 (6 гадоў таму) |
| Бягучы стан | працуе |
Instagram (чытаецца — Інстаграм) — бясплатнае дастасаваньне абмену фатаздымкамі і відэазапісамі, якое дазваляе карыстальнікам здымаць фатаграфіі і відэа, прымяняць да іх фільтры, а таксама распаўсюджваць іх праз свой сэрвіс і шэраг іншых сацыяльных сетак[1]. Instagram робіць фатаграфіі ў квадратнай форме — як камэры Kodak Instamatic і Polaroid, і як любыя сярэднефарматныя камэры 6×6. Большасьць мабільных фотадастасаваньняў выкарыстоўвае суадносіны бакоў 3:2.
Гэтае дастасаваньне сумяшчальнае з прыладамі iPhone, iPad і iPod Touch на iOS 4.3 і вышэй, а таксама з тэлефонамі на плятформе Android 2.2 і вышэй з падтрымкай OpenGL ES 2. Распаўсюджваецца праз App Store і Google Play адпаведна.
У красавіку 2012 году Instagram быў набыты кампаніяй Facebook. Дакладны кошт пакупкі склаў 300 мільёнаў даляраў грашовымі сродкамі і 23 мільёны акцыяў кампаніі[2].
Зьмест
Гісторыя[рэдагаваць | рэдагаваць крыніцу]
Распрацоўка Instagram пачалася ў Сан-Францыска, калі Кевін Сыстрам (Kevin Systrom) і Майк Крыгер (Mike Krieger) вырашылі пераарыентаваць свой праект Burbn на мабільныя фатаграфіі[3]. Праграма зьявілася ў краме дастасаваньняў App Store кампаніі Apple 6 кастрычніка 2010 году.
Неўзабаве пасьля выпуску дастасаваньня да каманды далучыўся Джош Рыдэль у якасьці мэнэджэра супольнасьці. У лістападзе 2010 году каманда папоўнілася Шэйнам Сўіні — інжынэрам праекту, а ў жніўні 2011 году — Джэсікай Золман як ІТ-эвангелісткай супольнасьці.
У студзені 2011 году да дастасаваньня былі дададзеныя хэштэгі для таго, каб было лягчэй знаходзіць карыстальнікаў і фатаздымкі[4].
У верасьні 2011 году была выпушчаная вэрсія дастасаваньня 2.0, у якой зьявіліся жывыя фільтры, імгненная зьмена нахілу, чатыры новыя фільтры, фатаграфіі высокага разрозьненьня, апцыянальныя межы, паварот адным клікам і абноўлены абразок[5]. У красавіку 2012 году была выпушчаная вэрсія дастасаваньня для плятформы Android[6], якое за содні было запампаванае больш за мільён разоў[7].
9 красавіка 2012 г. Facebook абвясьціў пра набыцьцё мабільнага фотадастасаваньня Instagram за $ 1 млрд. Уладальнікам гэтага фатасэрвісу Facebook пералічыў 300 мільёнаў даляраў і перадаў каля 23 мільёнаў сваіх акцыяў. Акрамя таго, сацыяльная сетка абавязалася ў выпадку зрыву ўгоды выплаціць Instagram няўстойку ў 200 мільёнаў даляраў[8]. У сувязі з купляй 25 чэрвеня выйшла абнаўленьне 2.5.0, у выніку якога ў Instagram зьявілася больш шчыльная інтэграцыя з Facebook.
У жніўні 2012 кожную сэкунду ў Instagram ставілася 575 лайкаў і дадаваўся 81 камэнтар. На Instagram карыстальнікі праводзілі ў сярэднім 257 хвілін на месяц, што на паўтары гадзіны больш, чым у Твітэры.[9]
У канцы 2012 году Instagram анансаваў зьмену правілаў карыстальніцкай дамовы. Сярод новаўвядзеньняў павінны быў зьявіцца пункт, што Instagram атрымлівае правы на выкарыстаньне фатаграфіяў, што запампоўваюцца ягонымі карыстальнікамі, у тым ліку ў рэклямных мэтах.[10] Гэта выклікала рэзкую крытыку ў грамадзтве, як сярод удзельнікаў Instagram, так і з боку юрыстаў па аўтарскім праве. Многія ўдзельнікі Instagram выдалілі свае ўліковыя запісы. Па зьвестках аналітычнай службы AppData, Instagram, магчыма, страціў да 25% карыстальнікаў — яго штодзённая наведвальнасьць зьнізілася з 16 млн да 12 млн. Чуткі аб адмове карыстальнікаў ад Instagram ударылі па акцыях Facebook. Сутыкнуўшыся з крытыкай і пратэстамі, кіраўніцтва сэрвісу перафармулявала спрэчны пункт карыстальніцкай дамовы, заявіўшы, што іх намеры былі няправільна зразумелыя.
У красавіку 2013 году Instagram паведаміў аб пачатку ўкараненьня сваёй новай распрацоўкі, якая дазволіць карыстальнікам адзначаць на фатаздымках сябе, сваіх сяброў, цікавыя месцы, а таксама вядомыя брэнды. Акрамя гэтага будзе прадастаўленая магчымасьць наладжваць сыстэму апавяшчэньняў аб новых адзнаках і, у тым ліку, рабіць іх прыватнымі[11].
У чэрвені 2013 Instagram анансаваў магчымасьць запісу відэа даўжынёй да 15 сэкундаў.
8 жніўня 2013 зьявілася інтэграцыя з сацыяльнай сеткай «Вконтакте»[12].
Маштабы[рэдагаваць | рэдагаваць крыніцу]
Да сьнежня 2010 году ў Instagram быў адзін мільён зарэгістраваных карыстальнікаў. У чэрвені 2011 году — ужо пяць мільёнаў. Да верасьня гэтая лічба падвоілася, а да сакавіка 2012 колькасьць карыстальнікаў дасягнула амаль 30 мільёнаў[13]. Напрыканцы лютыга 2013 году Instagram абвясьціў аб 100 мільёнах актыўных карыстальнікаў.
Instagram паведаміў пра 100 мільёнаў запампаваных фатаграфіяў у ліпені 2012 году, у жніўні гэта колькасьць дасягнула 150 мільёнаў.
Фінансаваньне[рэдагаваць | рэдагаваць крыніцу]
5 сакавіка 2010 году, падчас працы над дастасаваньнем Burbn, Кевін Сыстром закрыў раўнд фінансаваньня ў памеры 500 000 даляраў ад Baseline Ventures і Andreessen Horowitz. 2 лютага 2011 году было абвешчанае, што Instagram прыцягнуў 7 мільёнаў даляраў ад розных інвэстараў, у тым ліку ад Benchmark Capital, Джэка Дорсэя, Крыса Сака (праз фонд LOWERCASE Capital) і Адама Д’Анджэлё.
Узнагароды[рэдагаваць | рэдагаваць крыніцу]
- У студзені 2011 году Instagram заняў другое месца ў намінацыі «Найлепшае мабільнае дастасаваньне» ў конкурсе 2010 TechCrunch Crunchies[14].
- У траўні 2011 году часопіс Fast Company паставіў CEO Кевіна Сыстрама на 66-е месца ў сьпісе «100 самых крэатыўных людзей у бізнэсе ў 2011 годзе»[15].
- У чэрвені 2011 году часопіс Inc уключыў заснавальнікаў Сыстрама і Крыгера ў сьпіс «30 тых, каму няма 30»[16].
- У верасьні 2011 году Instagram выйграў у намінацыі «Найлепшае мясцовае дастасаваньне» ў конкурсе SF Weekly Web Awards[17].
- У 2011 годзе Састром і Крыгер зьявіліся на вокладцы верасьнёўскага выпуску часопіса 7×7[18].
- У сьнежні 2011 году Apple выбрала Instagram «дастасаваньнем году для iPhone»
Instagram прылады і сэрвісы[рэдагаваць | рэдагаваць крыніцу]
Папулярнасьць дастасаваньня справакавала зьяўленьне мноства распрацовак, так ці інакш зьвязаных з Instagram. У якасьці асобнага напрамку такіх распрацовак можна вылучыць праекты разнастайных прыладаў, прызначаных для працы з Instagram.
Першым з такіх прыладаў зьяўляецца Instagram Socialmatic Camera — камэра, дызайн якой выкананы ў стылі абразкі Instagram. Камэра дазваляе адразу апрацаваць фатаграфію і даслаць яе ў Instagram, а таксама мамантальна раздрукаваць фатаграфію. Такім чынам, распрацоўшчыкі прылады хочуць перанесьці Instagram у рэальны сьвет, прапаноўваючы карыстальнікам дзяліцца фатаздымкамі ня толькі ў сацыяльнай сетцы, але і ў жыцьці[19]. Першыя мадэлі прадукту ADR студыі і Polaroid, якія можна будзе набыць ўжо ў 2013 годзе, будуць мець два аб’ектывы, сэнсарны дысплэй, міні-друкар з 4-ма картрыджамі, аптычны зум, 3G модуль, а таксама абсталяваны WiFi і Bluetooth.[20]
Другой прыладай зьяўляецца адмысловая лічбавая фатарамка Instacube, якая таксама выкананая ў стылістыцы абразкі Instagram і ўмее паказваць на сваім экране фатаграфіі са стужкі абранага Instagram акаўнта.
Таксама зьяўляюцца сэрвісы, якія дазваляюць надрукаваць фатаграфіі карыстальнікаў Instagram на розных прадметах — магнэты, падушкі, саколкі, палотны і інш.
Пашырэньні[рэдагаваць | рэдагаваць крыніцу]
- Instamap — гэта дастасаваньне, якое дазваляе знайсьці Instagram фатаграфіі па зададзеным геаграфічным месцазнаходжаньні або хэштэгу. Вынік можа быць адлюстраваны ў выглядзе галерэі або мапы;
- 100 Cameras in 1- дастасаваньне для iPhone, якое дазваляе накладаць яшчэ больш эфэктаў на фатаграфіі з Instagram.
- Statigr.am — бясплатнае дастасаваньне, якое дазваляе праглядаць статыстыку аб Instagram-рахунку, уключаючы інфармацыю аб пасьлядоўніках, лайках і камэнтарах;
- 4 K Stogram — бясплатнае дастасаваньне з адкрытым кодам, якое дазваляе запампоўваць фатаграфіі Instagram на PC, Mac або Linux.
Аналягі[рэдагаваць | рэдагаваць крыніцу]
- BeautyBeat — дастасаваньне, якое дазваляе запампаваць свой малюнак, апрацаваць фільтрамі і падзяліцца зь сябрамі вынікам.
Крыніцы[рэдагаваць | рэдагаваць крыніцу]
- ^ Dan Frommer Here’s How To Use Instagram(анг.)
- ^ Emil Protalinski Facebook buying Instagram for $300 million, 23 million shares(анг.)
- ^ Systrom, Kevin What is the history of Instagram(анг.)
- ^ Introducing Hashtags on Instagram(анг.)
- ^ Introducing Instagram v2.0(анг.)
- ^ Instagram стала даступная ўладальнікам Android-смартфонаў(рас.)
- ^ Приложение Instagram для Android менее чем за сутки скачано 1 млн раз (рас.)
- ^ Facebook раскрыў падрабязнасьці зьдзелкі па куплі Instagram(рас.)
- ^ Instagram ў СоцКаталёгу(рас.)
- ^ webcitation.org/6DbgYYUfJ Julianne Pepitone Instagram can now sell your photos for ads(анг.)
- ^ Instagram даў сваім карыстальнікам новыя магчымасьці(рас.)
- ^ Горад у прамым эфіры(рас.)
- ^ Почти фотограф. Instagram сделал на Android(рас.)
- ^ Congratulations Crunchies Winners!. TechCrunch: The Crunchies Awards(анг.)
- ^ The 100 Most Creative People in Business in 2011. FastCompany(анг.)
- ^ Christine Lagorio Kevin Systrom and Mike Krieger, Founders of Instagram(анг.)
- ^ Jake Swearingen SF Weekly Web Awards 2011: We Have Some Winners!(анг.)
- ^ The Hot 20 2011 (анг.)
- ^ Instagram Socialmatic Camera — новая эра сацыяльных сетак(анг.)
- ^ Instagram Socialmatic Camera Polaroid (анг.)
Вонкавыя спасылкі[рэдагаваць | рэдагаваць крыніцу]
- instagram.com(анг.)
