Разьвітаньне з Радзімай

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку

«Разьвіта́ньне з Радзі́май» (па-польску: Pożegnanie Ojczyzny), часта «Палянэ́з Агі́нскага» — фартэпіянны палянэз ля мінор, напісаны кампазытарам Міхалам Клеафасам Агінскім у 1794 годзе. Адзін з самых вядомых палянэзаў. Адносіцца да мэлянхалічных палянэзаў, а не танцавальных: лічыцца, што Агінскі напісаў палянэз, пакідаючы Рэч Паспалітую пасьля задушэньня паўстаньня Касьцюшкі, у якім ён браў удзел. У гэты час, на пераломе XVIII—XIX стст., у Эўропе клясычны стыль стаў саступаць месца рамантызму.

Палянэз аказаў значны уплыў на іншых кампазытараў. Першапачаткова напісаны для клявіра, існуюць перакладаньні для розных інструмэнтаў і аркестроўка. Запісаны шэрагам выканаўцаў, у тым ліку Вандай Ляндоўскай (на клявэсыне). Беларускі дзяржаўны ансамбль «Песьняры» выконвае палянэз Агінскага з тэкстам, напісаным кіраўніком калектыву Вячаславам Шарапавым[1].

«Палянэз Агінскага» даў назву аднайменнаму фільму («Беларусьфільм», 1971), аднайменнай п’есе Мікалая Каляды і фірмоваму цягніку «Палянэз». На пачатку 1990-х «Палянэз Агінскага» разглядаўся адным з варыянтаў дзяржаўнага гімну Беларусі, аднак дзяржаўная камісія адхіліла гэты варыянт як надта складаны для выкананьня і асэнсаваньня. У маскоўскім мэтрапалітэне пачатковыя такты Палянэзу Агінскага гучаць пры спробе неаплачанага праходу праз турнікеты[2].

Крыніцы[рэдагаваць | рэдагаваць крыніцу]

Вонкавыя спасылкі[рэдагаваць | рэдагаваць крыніцу]