Землеўпарадкаваньне Марсу (настольная гульня)

Зьвесткі зь Вікіпэдыі — вольнай энцыкляпэдыі
Перайсьці да навігацыі Перайсьці да пошуку
«Землеўпарадкаваньне Марсу»
Самастойная гульня ў «Землеўпарадкаваньне Марсу»
Дата выпуску 2016
Распрацоўнік(і) Якаб Фруксэліюс
Аздабляльнік(і) Ісаак Фруксэліюс
Выдавец FryxGames
Колькасьць гульцоў 1—5
Дыяпазон узростаў ад 12 гадоў
Працягласьць гульні 120 хвілінаў
Уплыў выпадковасьці сярэдняя
Неабходныя ўменьні стратэгія, тактыка, лёгіка
Сайт https://www.fryxgames.se/games/terraforming-mars/

«Землеўпара́дкаваньне Ма́рса» (па-ангельску: Terraforming Mars) — гульня на дошцы для 1—5 гульцоў, распрацаваная Якабам Фруксэліюсам і выдадзеная ў 2016 року. У гэтай стратэгіі гульцы выконваюць ролю карпарацыяў, якія супрацоўнічаюць у засваеньні Марсу шляхам павышэньня тэмпэратуры плянэты, насычэньня атмасфэры тленам, напаўненьня паверхні вадой і стварэньня расьліннасьці і жывёльнага сьвету.

Гульнявы працэс[рэдагаваць | рэдагаваць крыніцу]

Гульцы ў ролі зямных карпарацыяў спаборнічаюць у справе землеўпарадкаваньня Марсу. Гульнявая дошка ўяўляе сабой мапу паверхні плянэты, на якой разьмешчаная 61 шасьцікутная плітка, кожная зь якіх адпавядае прыкладна 1% паверхні Марсу. Гэтыя пліткі прызначаныя для разьмяшчэньня акіянаў, расьліннасьці, местаў ды іншых аб’ектаў. Мэта гульні — дасягнуць трох прыдатных для засяленьня ўмоваў:

  • падняць узровень атмасфэрнага тлену да 14%;
  • падняць сярэднюю тэмпэратуру ад -30° да +8°C;
  • пакрыць 9% паверхні Марсу акіянам.

Гэтых мэтаў гульцы дабіваюцца, разыгрываючы карткі з разнастайнымі тэхналёгіямі альбо збудаваньнямі, прызначанымі для землеўтварэньня Марсу. Гульня дзеліцца на некалькі пакаленьняў, кожнае зь якіх адпавядае аднаму колу. Пакаленьне складаецца зь некалькіх фазаў:

  • выцягваньне картак;
  • выкананьне дзеяньняў:
    • выкарыстаньне картак;
    • задзейнічаньне эфэктаў ужо згуляных картак;
    • купляньне магчымасьцяў, прысутных на дошцы;
  • зьбіраньне прыбытку і рэсурсаў.

Пасьля гэтага надыходзіць новае пакаленьне.

Адной з унікальных асаблівасьцей «Землеўпарадкаваньня Марсу» ёсьць сыстэма «рэйтынгу землеўпарадкаваньня» (РЗ). Выконваючы дзеяньне, што павялічвае адну з трох глябальных умоваў землеўпарадкаваньня, гулец падвышае і ўласны РЗ. Гэты рэйтынг ня толькі ўплывае на колькасьць здабытых гульцом пераможных пунктаў, але і падвышае ягоны прыбытак у канцы кожнага пакаленьня.

Калі дасягнутыя ўсе тры глябальныя парамэтры землеўпарадкаваньня, гульня працягваецца да апошняй фазы дадзенага пакаленьня. Пасьля гэтага адбываецца падлік рэйтынгаў землеўпарадкаваньня, пабудаваных гульцамі плітак местаў і расьліннасьці, асабістых дасягненьняў і згуляных картак. Перамагае гулец з найбольшай сумай паказьнікаў.

Пашырэньні[рэдагаваць | рэдагаваць крыніцу]

Выйшлі пяць дадаткаў да гульні:

  • «Эляда і Элізіюм» (анг. Hellas and Elysium; 2017), які ўключае новую двухбаковую гульнявую дошку з двума новымі рэгіёнамі Марсу, кожны з уласным рэльефам і дасягненьнямі ў канцы гульні
  • «Наступная — Вэнэра» (анг. Venus Next; 2017), які ўключае новую гульнявую дошку Вэнэры з новымі можнасьцямі землеўпарадкаваньня і новымі карткамі пра Вэнэру
  • «Прадслоўе» (анг. Prelude; 2018) з новымі карткамі, якія гульцы атрымліваюць у пачатку гульні дзеля паскарэньня свайго разьвіцьця і марсаўпарадкаваньня
  • «Калёніі» (анг. Colonies; 2018), які дадае тэрыторыі для калянізацыі і падарожжаў у Сонечнай сыстэме, прадастаўляючы альтэрнатыўныя спосабы здабываньня рэсурсаў без патрэбы разыгрываньня картак
  • «Узрушэньне» (анг. Turmoil; 2019), які дадае марсіянскі ўрад з рознымі палітычнымі фракцыямі з уласнымі праграмамі, на якія гульць могуць уплываць, каб атрымліваць разнастайныя бонусы

Відэагульня[рэдагаваць | рэдагаваць крыніцу]

У 2018 року пабачыла сьвет кампутарная адаптацыя «Землеўпарадкаваньня Марсу» францускага выдаўца «Asmodee Digital»[1].

Ацэнкі[рэдагаваць | рэдагаваць крыніцу]

Часопіс «Папулярная мэханіка» ўключыў «Землеўпарадкаваньне Марсу» ў 50 найлепшых гульняў году[2]. Паводле стану на 10 ліпеня 2020 гульня займала 4-е агульнае месца ў сьпісе паводле вэрсіі BoardGameGeek[3].

Крыніцы[рэдагаваць | рэдагаваць крыніцу]

  1. ^ Asmodee Digital unveils Terraforming Mars—the only board game on PC that takes players to the Red Planet(анг.). PC Gamer (2 красавіка 2018). Праверана 10 ліпеня 2020 г.
  2. ^ Herkewitz, William (17 студзеня 2019) The 50 Best New Board Games(анг.). Popular Mechanics. Праверана 10 ліпеня 2020 г.
  3. ^ Browse Board Games(анг.). BoardGameGeek. Праверана 10 ліпеня 2020 г.

Вонкавыя спасылкі[рэдагаваць | рэдагаваць крыніцу]