Перайсьці да зьместу

Арына Сабаленка

Зьвесткі зь Вікіпэдыі — вольнай энцыкляпэдыі
Арына Сабаленка
Краіна
Пражывае ў Менск
Нарадзілася 5 траўня 1998(1998-05-05)[1] (28 гадоў)
Рост 182 см[1][2]
Вага 80 кг
Пачатак кар’еры 2015 — цяпер
Працоўная рука правая (задні ўдар двуручны)
Прызавыя грошы 49 857 610 $[1]
Адзіночны разрад
Матчаў 512–205[1]
Тытулаў 19
Найвышэйшы рэйтынг 1 (11 верасьня 2023)
Турніры Вялікага шлему
Аўстралія перамога (2023, 2024)
Францыя паўфінал (2023)
Ўімбэлдан паўфінал (2021, 2023)
ЗША перамога (2024)
Парны разрад
Матчаў 91–67[1]
Тытулаў 6
Найвышэйшы рэйтынг 1 (22 лютага 2021)
Турніры Вялікага шлему ў пары
Аўстралія Перамога (2021)
Францыя Паўфінал (2019)
Ўімбэлдан Чвэрцьфінал (2019)
ЗША Перамога (2019)
Асноўныя турніры ў пары
WTA Фінал (2017)
Арына Сабаленка ў Вікісховішчы

Ары́на Сярге́еўна Сабале́нка (нар.; 5 траўня 1998, Менск, Беларусь) — беларуская тэнісістка. На сёньня яна займае пазыцыю першай ракеткі сьвету ў адзіночным разрадзе паводле рэйтынгу Жаночай тэніснай асацыяцыі, а таксама калісьці была першай ракеткай сьвету ў жаночым парным разрадзе. Сабаленка некалькі разоў здабывала перамогі ў самых прэстыжных тэнісных турнірах сьвету, як то была пераможцай на адкрытым чэмпіянаце Аўстраліі 2023 і 2024 году, а таксама на адкрытым чэмпіянаце ЗША 2024 году. Мае вельмі агрэсіўны стыль гульні, часта назапашваючы вялікую колькасьць вінэраў і нявымушаных памылак. Пры сваім росьце яна мае яшчэ і магутную падачу.

Кар’ера

[рэдагаваць | рэдагаваць код]

Трэнавацца пачала зь дзяцінства. Прафэсійную кар’еру пачала ў 2012 годзе[3]. У 2014 пачала займацца ў Нацыянальнай акадэміі тэнісу.

Першы тытул МТФ заваявала ў парным разрадзе зь Верай Лапко ў 2013 року. У 2014 упершыню выйшла ў фінал адкрытага юніёрскага чэмпіянату Эстоніі, а пазьней стала пераможцай турніру ў Фінляндыі. У парным разрадзе абараніла тытул (гэтым разам зь Нікай Шуткоўскай) і стала пераможцай гэтага ж турніру ў адзіночным разрадзе. У канцы 2016 году паднялася на 137-ю пазыцыю рэйтынгу.

На турніры ў Вашынгтоне ў 2017 годзе.

У 2017 року ў дэбютным турніры Вялікага Шлему ў другім коле выбыла з барацьбы. У Ташкенце ўпершыню дайшла да паўфіналу турніраў ЖТА, па шляху перамогшы 3-ю сеяную, 53-ю ракетку сьвету Тацяну Марыю. У кастрычніку 2017 упершыню прабілася ў фінал турніру ЖТА (у кітайскім Цяньцзіні(zh)), дзе саступіла Марыі Шарапавай[4]. Пасьля гэтага Арына Сабаленка ўпершыню ў сваёй кар’еры ўвайшла ў топ-100 сусьветнага тэніснага рэйтынгу і стала першай ракеткай Беларусі. Пасьля перамогі на адкрытым чэмпіянаце Мумбаі Арына Сабаленка скончыла сэзон на 73-й пазыцыі рэйтынгу.

У красавіку 2018 году Арына Сабаленка ўпершыню ў кар’еры ўвайшла ў топ-50 сусьветнага рэйтынгу. Гэта адбылося пасьля ўдалага выступу на турніры ў швайцарскім Люгана, дзе беларуска дайшла да фіналу. 25 жніўня 2018 року Арына Сабаленка заваявала першы ў кар’еры тытул на турнірах прэм’ер-узроўню. У фінальным паядынку ў Нью-Гэйвэне (ЗША) яна перайграла гішпанку Карлу Суарэс Навара. Пасьля гэтага беларуска трапіла ў топ-20 сусьветнага рэйтынгу. У верасьні беларуская тэнісістка атрымала перамогу на яшчэ адным прэм’ер-турніры ва Ўхані, цягам якога перамагла 6-ю тэнісістку сьвету Эліну Сьвітоліну. На адкрытым чэмпіянаце Кітаю выйшла ў чвэрцьфінал. З-за хваробы Арына Сабаленка адмовілася ад удзелу ў ВТБ Кубку Крамля[5]. Жаночая тэнісная асацыяцыя прызнала Арыну Сабаленка «Пачаткоўцам году» паводле вынікаў 2018 году[6]. Напрыканцы году Сабаленку займала 11-ю пазыцыю сусьветнага рэйтынгу[7].

На Ўімбэлданскім турніры 2018 году.

У студзені 2019 году Арына Сабаленка перамагла на чэмпіянаце ў Шэньчжэні[8]. Наняла новага трэнэра па фізычнай падрыхтоўцы — амэрыканца Джэйсана Стэйсі[9]. Яшчэ ў студзені яна пачала працаваць у партнэрстве з Эліз Мэртэнс, але пара зазнала паразу ад першых сеяных Барбары Крэйчыкавай і Катаржыны Сінякавай у трэцім раўндзе адкрытага чэмпіянату Аўстраліі. У сакавіку яны дасягнулі посьпеху на двух прэм’еровых турнірах. У 2019 годзе стала пераможцам малога падагульняючага турніра Жаночай тэніснай асацыяцыі[10]. На Адкрытым чэмпіянаце Францыі дайшла толькі да другога кола, атрымаўшы паразу ад Аманды Анісімавай[11]. На Ўімбэлдане 2019 году была пасеяная пад дзесятым нумарам, але ў першым жа коле прайграла Магдалене Рыбарыкавай[12], якая на той час была на 139-м радку сусьветнага рэйтынгу.

Другая палова сэзону ў Сабаленкі была нашмат лепей за папярэднюю. У сваім першым турніры па Ўімбэлдане яна заняла другое месца пасьля Чжэн Сайсай на турніры прэм’еровай клясы Сылікан Волі Клясык[13]. Яна ня вельмі добра выступіла на адкрытым чэмпіянаце ЗША, саступіўшы ў другім раўндзе на апошнім турніры Вялікага шлему году[14]. Тым ня менш Сабаленка і Мэртэнс дасягнулі свайго найлепшага выніку ў парным разрадзе ў тым годзе на адкрытым чэмпіянаце ЗША. Будучы чацьвертымі сеянымі на гэтым турніры, яны дакрочылі да фіналу, не сутыкуючыся з парамі зь першай дзясяткі. У фінале яны сустрэліся з восьмымі сеянымі Вікторыяй Азаранкай і Эшлі Барці. Сабаленка з партнэркай перамаглі іншую беларуску з Барці ў двух сэтах і здабылі свой першы тытул Вялікага шлему[15]. З гэтым тытулам тэнісістка ўзьнялася ў першую дзясятку рэйтынгу ў парным разрадзе, заняўшы шосты радок. Па матчах у ЗША тэнісістка вярнулася ў Кітай, дзе пасьля чвэрцьфіналу на адкрытым чэмпіянаце Чжэнчжоў яна абараніла свой тытул на адкрытым чэмпіянаце Ўханю. У парным разрадзе Ўханскага турніру Сабаленка і Мэртэнс прабіліся ў яшчэ адзін фінал, але фінішавалі толькі другімі[16]. У канцы сэзону Сабаленка другі год запар кваліфікавалася на фінальны турнір ЖТА. У сваёй групе беларуска абыйшла грачанку Марыю Сакары да сваю партнэрку ў парным разрадзе Эліз Мэртэнс[17]. У плэй-оф Сабаленка перамагла Караліну Мухаву і Кікі Бэртэнс, стаўшы ўладальніцай пятага тытулу ў кар’еры і трэцяга ў 2019 годзе[18].

Сабаленка і Эліз Мэртэнс на Ралян Гарос у 2019 годзе.

У студзені 2020 году саступіла Крыстыне Плішкавай у другім коле турніра ў Шэньчжэні і ня здолела абараніць тытул[19]. У тым жа месяцы Сабаленка дакрочыла да паўфіналу турніру ў Адэлаідзе. Пасьля першага прайгранага сэту ў матчы супраць Сэ Су-вэй беларуска здолела адгуляцца, пасьля чаго перамагла Бэрнарду Пэра і нечакана была мацней за другую сеяную румынку Сымону Халеп, у якой яна аніколі раней не брала нават сэту[20]. У паўфінале турніру тэнісістка саступіла ў трох сэтах украінцы Даяне Ястрэмскай, якая ў выніку стала другой. У першым раўндзе адкрытага чэмпіянату Аўстраліі Сабаленка саступіла Карле Суарэс Навара ў двух тай-брэйках. На тым жа спаборніцтве, але ў парным разрадзе беларуска поруч з Мэртэнс выбылі ў чвэрцьфінале, саступіўшы сёстрам Чан з Тайваню. Ейным наступным турнірам стаў чэмпіянат Дубаю, дзе яна прасунулася да чвэрцьфіналу, атрымаўшы перамогу над Марыяй Сакары і сваёй партнэркай у парным разрадзе Мэртэнс. У матчы стадыі васьмі ўдзельнікаў беларуска сустрэлася з Сымонай Халеп. Не зважаючы на тое, што беларуска была мацнейшай у першым сэце, паўтарыць папярэдні сэнсацыйны посьпех не выпадала. Румынка ў выніку стала пераможцам турніру. На адкрытым чэмпіянаце Катару Сабаленка пасьлядоўна выбіла Анэт Кантавэйт, Марыю Сакары, Чжэн Сайсай і Сьвятлану Кузьняцову, а ў фінале ў трох сэтах узяла перамогу над Пэтрай Квітавай, здабыўшы свой трэці тытул прэм’ер-узроўню.

Пасьля таго, як тэніс аднавіўся ў жніўні пасьля затрымкі ў сувязі з пошасьцю каранавірусу, Сабаленка як другая сеяная ў Лэксынгтане абгуляла Мэдысан Брэнгл у трох сэтах, але саступіла ў трохсэтавым трылеры 16-гадовай Како Гаўф. Наступныя вынікі была расчаравальныя. У кастрычніку 2020 году яна перамагла Вікторыю Азаранку ў фінале турніру ў Остраве[21]. У лістападзе 2020 году стала пераможцам турніра Жаночай тэніснай асацыяцыі ў Лінцы[22], абгуляўшы ў фінале Мэртэнс. Усё гэта дазволіла Сабаленцы ўпершыню ў кар’еры патрапіць у дзясятку найлепшых тэнісістак паводле вынікаў году.

Сабаленка на адкрытым чэмпіянаце Францыі 2021 году.

Сабаленка пачала 2021 год з сэрыяй зь дзевяці перамог і ўзяла ўдзел у першым розыгрышы афіцыйнага турніру Жаночай тэніснай асацыяцыі адкрытым чэмпіянаце Абу-Дабі пад чацьвертым нумарам пасеву. Яна перамагла Палону Хэрцаг у двух сэтах, здолеўшы адгуляць перавагу славенкі ў 5:2, а затым выбіла з турніру Айлу Тамлянавіч і Унс Джабэр і трапіла ў чвэрцьфінал, дзе беларуска перамагла Алену Рыбакіну, а затым Марыю Сакары. У фінале Сабаленка перамагла Вераніку Кудзярметаву ў двух сэтах[23], прайграўшы ўсяго чатыры геймы. Пераможная сэрыя ў Абу-Дабі падоўжыла агульную колькасьць перамог запар да 15 матчаў ды ўзьняла спартоўку на сёмы радок сусьветнага рэйтынгу[24]. Перад адкрытым чэмпіянатам Аўстраліі Сабаленка імкнулася ўпершыню ў сваёй кар’еры трапіць у чвэрцьфінал турніраў Вялікага шлему ў адзіночным разрадзе, але ў чацьвертым раўндзе яна саступіла ў трох сэтах 23-разовай чэмпіёнцы турніраў Вялікага шлему Сэрэне Ўільямз. Аднак, беларуска разам з Мэртэнс сталі пераможцамі аўстралійскага турніру ў парным разрадзе. Заваяваўшы тытул, 22 лютага 2021 году спартоўка ўпершыню ў сваёй кар’еры ўзьнялася на вяршыню сусьветнага рэйтынгу парнага разраду[25].

Як дзейная чэмпіёнка адкрытага чэмпіянату Катару ў Досе, яна пачала турнір з другога раўнду, але адразу саступіла будучай фіналістцы Гарбіньне Мугурусе ў трох сэтах[26]. На чэмпіянаце ў Дубаі, у сваім першым турніры ў якасьці першай ракеткі сьвету ў парным разрадзе, Сабаленка і Мэртэнс прагулялі Джэсыцы Пэгуле і Бэтані Матэк-Сэндс. У адзіночным разрадзе ў Дубаі тэнісістка лёгка прасунулася ў чвэрцьфінал, перамагшы Анэт Кантавэйт, якая займала на той час 15-ы радок рэйтынгу, але потым зноў саступіла Мугурусе ў трох сэтах[27]. Сабаленка здабыла тытул на адкрытым чэмпіянаце Мадрыду, сустрэўшыся ў фінальным матчы з Эшлі Барці[28]. Дзякуючы чацьвертаму тытулу ЖТА 1000, яна пасунулася на чацьвертае месца ў сьвеце[29]. Разам зь Вікторыяй Азаранкай тэнісістка здабыла перамогу ў парным разрадзе на адкрытым чэмпіянаце Нямеччыны[30]. Будучы другой сеянай на Ўімбэлдане, Сабаленка ўпершыню трапіла ня толькі ў чвэрцьфінал, але і паўфінал турніру Вялікага шлему. У кроку ад фіналу спартоўка саступіла Караліне Плішкавай у трох сэтах. Дзякуючы выступу ў Вялікабрытаніі, яна дасягнула найлепшага ў сваёй кар’еры рэйтынгу, узьняўшыся на трэці радок рэйтынгу ЖТА ў адзіночным разрадзе[31]. Сабаленка стала трэцяй беларускай тэнісісткай, якая дакрочыла да паўфіналу Ўімбэлдану пасьля Натальлі Зьверавай у 1998 годзе і Вікторыі Азаранкі ў 2011 і 2012 гадах[32]. Удзельнічала ў Алімпійскіх гульнях у Токіё, але саступіла ў другім коле Доне Вэкіч[33]. На чэмпіянаце Канады ў Манрэалі Сабаленка таксама саступіла ў паўфінале Плішкавай[34], а ў Цынцынаці беларуска зазнала паразу ў першым раўндзе Паўле Бадосе. Не зважаючы на паразу, Сабаленка пасунулася на другі радок сусьветнага рэйтынгу[35]. У верасьні 2021 году выйшла ў паўфінал адкрытага чэмпіянату ЗША, дзе прайграла канадзкай тэнісістцы Лэйле Фэрнандэс за выхад у фінал[36]. Праз станоўчы тэст на каранавірус Сабаленка была вымушаная прапусьціць турнір у Індыян-Ўэйлзе[37].

Тэнісістка на трэнаваньні ў 2023 годзе.

Сабаленка пачала новы сэзон на турніры ў Адэлаідзе, дзе была сеяная пад другім нумарам. У сваім першым матчы турніру, які прыпаў на другі раўнд беларуска саступіла славенцы Каі Юван у трох сэтах. Сабаленка зрабіла 18 падвойных памылак на падачы пры толькі пяці эйсах[38]. Далей Сабаленка атрымала ўайлд-кард на другі турнір у Адэлаідзе, дзе таксама саступіла ў першым жа матчы 93-й ракетцы сьвету швэдцы Рэбэцы Пэтэрсан у трох сэтах. Зноў Сабаленка мела праблемы з падачай, зрабіўшы 21 падвойную памылку ў матчы[39]. На адкрыты чэмпіянат Аўстраліі беларуска трапіла пад другім нумарам пасеву. Праблемы з падачай працягваліся, але яна здолела атрымаць перамогі ў трох сэтах над 128-й ракеткай сьвету Сторм Сандэрз, 100-й ракеткай Ван Сіньюй і 41-й ракеткай Маркетай Вандраўшавай, што дазволіла ёй выйсьці ў чацьверты раўнд у другі раз у сваёй кар’еры. Яна сустрэлася з тэнісісткай Каяй Канэпі, якая ў першым раўндзе перамагла 16-ю сеяную Анджэліку Кербэр. Канэпі перамагла ў напружаным трохсэтавым матчы, які завяршыўся супэртай-брэйкам у трэцім сэце[40][41]. Сабаленка здолела адбіцца ад чатырох матч-пойнтаў суперніцы за час матчу, але таксама зрабіла 15 падвойных памылак у параўнаньні з чатырма Канэпі[42].

Далейшыя выступы былі крыху лепшыя, але здабыць перамогу тэнісістцы не ўдалося. На адкрытым чэмпіянаце Катару, яна дакрочыла да паўфіналу, дзе саступіла будучай чэмпіёнцы польцы Ізе Сьвёнтэк[43]. На турнірах у Індыян-Ўэйлзе, Маямі і Чарлстане яе чакаў хуткі вылет на раньніх этапах, а ў першы фінал сэзону яна трапіла на адкрытым чэмпіянаце Штутгарту, дзе зноў саступіла Сьвёнтэк[44]. Як дзейная чэмпіёнка адкрытага чэмпіянату Мадрыду Сабаленка была выбітая Амандай Анісімавай у першым раўндзе[45]. На адкрытым чэмпіянаце Італіі, пасьля перамогі над Чжан Шуай, Амандай Анісімавай і Джэсыкай Пэгулай, яна ў трэці раз у 2022 годзе прайграла Сьвёнтэк у паўфінале[46]. На адкрытым чэмпіянаце Францыі Сабаленка зазнала паразу ў трэцім раўндзе Каміле Джорджы ў трох сэтах[47]. На турніры ў Нідэрляндах яна прабілся ў фінал, але саступіла ў ім Кацярыне Аляксандравай. На адкрытым чэмпіянат Нямеччыны тэнісістка спаборнічала пад трэцім нумарам пасеву, але выбыла ўжо ў першым раўндзе, ня здолеўшы перагуляць Вераніку Кудзярметаву. Праз пастанову кіраўніцтва турніру ва Ўімбэлдане адносна расейскіх і беларускіх тэнісістак Сабаленцы было забаронена браць удзел у спаборніцтвах праз уварваньне Расеі ва Ўкраіну, што скараціла ейны сэзон на траве[48].

На кортах зь цьвердым пакрыцьцём на турнірах у ЗША і Канадзе Сабаленка таксама мела брак вынікаў. На адкрытым чэмпіянаце ЗША, быўшы шостай сеянай, яна перамагла Кэтрын Гарысан, Каю Канэпі, Кляру Бюрэль, Даніель Колінз і Караліну Плішкаву, але ў паўфінале ў чацьверты раз за сэзон саступіла Сьвёнтэк[49]. На зважаючы на благія вынікі сэзону, беларуска здолела кваліфікавацца на выніковы турнір ЖТА другі год запар[50][51]. Там яна дакрочыла да фіналу, перамогшы трэцюю ракетку сьвету Джэсыку Пэгулу і другую ракетку Унс Джабэр у колавым турніры, а таксама першую ракетку Ігу Сьвёнтэк у паўфінале, але зазнаўшы паразу ад Каралін Гарсіі ў двух сэтах. Яна стала чацьвертай тэнісісткай у гісторыі, якая перамагла тройку найлепшых тэнісістак на адным турніры, далучыўшыся да Штэфі Граф, Сэрэны і Вінус Ўільямз[52][53].

Сабалена на адкрытым чэмпіянаце ЗША 2023 году.

Сабаленка патрапіла ў турнір у Адэлаідзе пад другім нумарам пасеву і здабыла перамогу ў турніры ўпершыню з Мадрыду 2021 году[54]. 28 студзеня 2023 году выйграла Адкрыты чэмпіянат Аўстраліі, упершыню атрымаўшы перамогу ў адзіночным разрадзе на турніры «Вялікага шлему»[55]. Пасьля перамогі ў Мэльбурне Сабаленка вярнулася на другое месца ў рэйтынгу ЖТА. У Дубаі тэнісістка выбыла ў чвэрцьфінале, дзе саступіла будучай чэмпіёнцы Барбары Крэйчыкавай у трох сэтах[56]. На турніры ў Індыян-Уэйлзе яна ўзяла рэванш у чэшкі, але ў фінале прайграла Алене Рыбакінай[57]. У Маямі Сабаленка перамагла Шэлбі Роджэрз, Марыю Боўзкаву і Крэйчыкаву і прасунулася ў чвэрцьфінал, дзе саступіла Саране Кырсьці. На грунтовых кортах Сабаленка пачала свой сэзон у Штутгарце, дзе прабілася ў свой чацьверты фінал цягам году. У фінале, матчы-рэваншы леташняга фіналу, яна зноў саступіла ў трох сэтах першай ракетцы сьвету Ізе Сьвёнтэк. У Мадрыдзе Сабаленка на шляху да фіналу саступіла толькі ў адным сэце. У заключным матчы турніру яна зноў сутыкнулася з полькай, гэтым разам перамогшы суперніцу ў трох сэтах.

На адкрытым чэмпіянаце Францыі яна дакрочыла да паўфіналу, не аддаўшы суперніцам аніводнага сэту. За крок да фіналу беларуская тэнісістка саступіла Караліне Мухавай у трох сэтах, не зважаючы на тое, што была наперадзе зь лікам 5–2 і нават мела матч-пойнт[58]. На Ўімбэлдане Сабаленка ў чацьверты раз запар трапіла ў паўфінал турніру Вялікага шлему, але на шляху да галоўнага матчу турніру ёй перашкодзіла Унс Джабэр. У Манрэалі спартоўка хутка вылецела з турніру, а ў Цынцынаці прабілася ў паўфінал, дзе зноў у трох сэтах саступіла Караліне Мухавай.

На адкрытым чэмпіянаце ЗША беларуска лёгка дакрочыла да паўфіналу, прайграўшы ўсяго 21 гейм у пяці матчах. Пасьля гэтых перамог Сабаленка стала першай тэнісісткай пасьля Сэрэны Ўільямз з 2016 году, якая патрапіла ў паўфіналы ўсіх чатырох буйных турніраў за адзін год. У паўфінале яна сустрэлася з Мэдысан Кіз, адгуляўшы перавагу суперніцы ў сэтах і брэйках. У сваім другім буйным фінале году Сабаленка сустрэлася з Како Гаўф і зазнала паразу ў трох сэтах. Тым ня менш, у сувязі з благімі вынікамі першай ракеткі сьвету Ігі Сьвёнтэк Сабаленка ўпершыню стала першай ракеткай сьвету паводле вынікаў турніру[59]. Яна сталася 29-й тэнісісткай, якая была названая першай ракеткай у сьвеце паводле вэрсіі ЖТА, і другой беларускай пасьля Вікторыі Азаранкі. Пасьля ЗША спартоўка прасунулася да чвэрцьфіналу адкрытага чэмпіянату Кітаю, дзе прайграла Рыбакінай. На фінальным турніры яна прагуляла ў паўфінале Сьвёнтэк[60], у выніку чаго полька вярнула сабе першае месца ў сусьветным рэйтынгу, а Сабаленка паводле вынікаў году была другой ракеткай сьвету[61].

Гульчыха на турніры US Open 2024.

У студзені 2024 году Сабаленка выйшла ў фінал турніру ў Брысбэйне, перамогшы Вікторыю Азаранку ў паўфінале[62], але саступіла ў вырашальным матчы Алене Рыбакінай[63]. Сабаленка стала пераможцам адкрытага чэмпіянату Аўстраліі не аддаўшы цягам спаборніцтва аніводнага сэту, стаўшы першай тэнісісткай, якая пасьпяхова абараніла свой тытул на аўстралійскіх кортах пасьля Вікторыі Азаранкі ў 2013 годзе[64][65]. У фінале яна перамагла Чжэн Цыньвэнь, якая была сеянай пад 12-м нумарам[66][67]. У Штутгарце беларуска дакрочыла толькі да чвэрцьфіналу, а ў Мадрыдзе ў агульнай складанасьці яна згуляла чатыры трохсэтавыя матчы, каб прабіцца ў фінал, прайграўшы пры гэтым 60 геймаў, што ёсьць найбольшай колькасьцю сярод тэнісістак, якая дасягнулі фіналу ў жаночым адзіночным разрадзе ў Мадрыдзе[68]. Сабаленка мела тры матч пойнты цягам сустрэчы, але саступіла Сьвёнтак[69]. Неўзабаве полька перамагла беларуску ў фінале турніру ў Рыме. На кортах Ралян Гарос Сабаленка мелі праблемы з страўнікам у чвэрцьфінале, у выніку саступіўшы Міры Андрэевай. На адкрытым чэмпіянаце Нямеччыны яна зьнялася з турніру праз траўму пляча, а таксама прапусьціла Ўімбэлдан[70]. У жніўні яна перамагла на адкрытым чэмпіянаце Цынцынаці, атрымаўшы перамогі над Ігай Сьвёнтэк у паўфінале[71] і Джэсыкай Пэгулай у фінале[72]. У верасьні яна трыюмфавала на адкрытым чэмпіянаце ЗША, узяўшы трэці тытул Вялікага шлему[73][74]. Сабаленка стала чэмпіёнкай турніру ва Ўхані.

Пасьля 11 месяцаў у кастрычніку яна вярнула сабе першае месца ў сусьветным рэйтынгу ЖТА[75]. Пасьля перамогі над Чжэн Цыньвэнь і Жасьмін Паоліні ў сваіх першых двух матчах групавога этапу фінальнага турніру[76], а таксама паразы Сьвёнтэк ад Како Гаўф, Сабаленка ўпершыню завяршыла год пад першым нумарам[77]. Сабаленка саступіла ў сваім апошнім матчы групавога этапу Рыбакінай і саступіла Гаўф у паўфінале. У сьнежні беларуска была названая гульчыхай году ЖТА[78][79].

На прэсавай канфэрэнцыі на Маямі Оўпэн 2025.

Сабаленка пачала 2025 год зь перамогі на Міжнародным чэмпіянаце ў Брысбэйне, заваяваўшы 18-ы тытул у адзіночным разрадзе ў сваёй кар’еры[80][81]. Тэнісістка пачала сваю барацьбу за перамогу на адкрытым чэмпіянаце Аўстраліі, але ў фінале спартоўка саступіла ў трох сэтах Мэдысан Кіз, якая выйграла свой першы буйны тытул[82]. На адкрытым чэмпіянаце Катару яна саступіла Кацярыне Аляксандравай у першым раўндзе ў трох сэтах[83]. А на чэмпіянаце Дубаю Сабаленка выбыла на этапе 1/8 фіналу пасьля паразы ў матчы з Клярай Таўсан[84]. На турніры ў Індыян-Ўэйлзе Сабаленка ўзяла рэванш у Кіз у паўфінале, але ў вырашальным матчы была слабейшай за Міру Андрэеву. Фінальны матч скончыўся за тры сэты. Спаборніцтвы ў Маямі прынесьлі плён спартоўцы, бо беларуска перамагла ў іх у першы раз у сваёй кар’еры[85]. У наступным турніры ў Штутгарце яна зноў трапіла ў фінале, але саступіла Алене Астапенцы[86][87]. У фінале адкрытага чэмпіянату Мадрыду Сабаленка перамагла Како Гаўф і выйграла свой трэці тытул на гэтым турніры[88]. Пасьля Мадрыду Сабаленка стала трэцяй тэнісісткай, якая перасягнула адзнаку ў 11 тысяч пунктаў у рэйтынгу ЖТА[89]. У Рыме беларуска выбыла ў чвэрцьфінале.

На турнірах Вялікага шлему ў Парыжы і Лёндане спартоўка згуляла няблага. У першым выпадку яна дасягнула фіналу, дзе саступіла Гаўф[90], а ў Лёндане беларуска дакрочыла да паўфіналу, дзе была пераможаная Анісімавай.

Нацыянальная зборная

[рэдагаваць | рэдагаваць код]

У красавіку 2016 року Арына Сабаленка ўпершыню трапіла ў зборную Беларусі, дзе прайграла невырашальны парны матч Кубка Фэдэрацыі, у якім Беларусь адолела Расею і выйшла ў I Сусьветную групу. На той час асноўнымі тэнісісткамі краіны ўважаліся Вікторыя Азаранка і Аляксандра Сасновіч.

У першым сэзоне найвышэйшай групы зборная Беларусі дайшла да фіналу, не зважаючы на тое, што ў кожным матчы лічылася аўтсайдэрам. У чвэрцьфінале супраць зборнай Нідэрляндаў і ў паўфінале супраць зборнай Швайцарыі Арына Сабаленка саступала ў першых матчах наймацнейшым тэнісісткам суперніцаў, як то Кікі Бэртэнс і Тымэа Бачынскі адпаведна, пасьля яна замацоўвала перамогі напарніцы Аляксандры Сасновіч над другімі ракеткамі, як то Міхаэлай Крайчак і Вікторыяй Голубіч адпаведна. На час паўфіналу Сабаленка мела 125-ы рэйтынг і ня мела аніводнай перамогі ў матчах туру па-за межамі Кубка Фэдэрацыі[91]. У фінальным матчы супраць зборнай ЗША Арына Сабаленка перамагла чэмпіёнку ЗША, 13-ю ракетку сьвету Слоўн Стывэнз, аднак пазьней саступіла 10-й ракетцы Како Вандэўэй і ў парным разрадзе, у выніку чаго ЗША атрымала мінімальную перамогу зь лікам 3:2. Не зважаючы на тое, што Беларусь заняла другое месца, посьпех у Кубку Фэдэрацыі дапамог папулярызаваць жаночы тэніс у краіне і вывеў Сабаленку і Сасновіч на міжнародную арэну.

У 2018 годзе Беларусь ня здолела паўтарыць свой посьпех у Кубку Фэдэрацыі 2017 году. Іхны чвэрцьфінальны матч адбыўся ў Менску, а суперніцамі былі спартоўкі зь Нямеччыны. Сабаленка здабыла перамогу ў абодвух сваіх матчах у адзіночным разрадзе, але Сасновіч і Вера Лапко зазналі паразы ў сваіх сустрэчах. У выніку вырашальным стала сустрэча ў парным разрадзе. На апошні матч у складзе Беларусі былі абраныя Сабаленка і Лідзія Марозава, прычым Сабаленка мела вельмі кароткі перапынак адразу пасьля свайго апошняга матчу ў адзіночным разрадзе. У выніку немкі былі мацней за беларускі дуэт[92].

Наступны матч зноў ладзіўся ў Менску ў рамках плэй-оф да Сусьветнай групы, дзе зборная Славаччыны змагалася за месца Беларусі ў Сусьветнай групе ў наступным сэзоне. Сабаленка зазнала паразу ў сваім матчы, саступіўшы Вікторыі Кумжавай, але Сасновіч узяла свой матч[93]. У парным разрадзе Сабаленка не была абраная дзеля ўдзелу ў матчы. Беларускі перамаглі і захавалі месца зборнай у Сусьветнай групе на 2019 год[94]. У Кубку Фэдэрацыі 2019 году Беларусь другі год запар сустрэлася ў чвэрцьфінале з зборнай Нямеччыны. Фактычна толькі дзякуючы Сабаленцы беларускі прасунуліся далей у сетцы, дзе саступілі зборнай Аўстраліі. Пры гэтым ва ўсіх матчах супраць аўстраліек гулялі толькі Азаранка і Сабаленка.

Крыніцы

[рэдагаваць | рэдагаваць код]
  1. 1 2 3 4 5 6 WTA website
  2. ↑ https://www.wtatennis.com/players/320760/aryna-sabalenka
  3. ↑ Арина Соболенко (рас.). OOO "Спортс Инвесторс, Русь". Праверана 30 кастрычніка 2021 г.
  4. ↑ Константин Лобандиевский (4 студзеня 2019) От прошлого к будущему: хороша Маша, но Арина Соболенко лучше во всем (рас.). Прессбол.
  5. ↑ Арина Соболенко снялась с турнира «ВТБ Кубок Кремля» по болезни. Ее место займет «лаки лузер» (рас.). Twitter (14 кастрычніка 2018).
  6. ↑ Арына Сабаленка прызнаная "Пачаткоўцам года". Белтэлерадыёкампанія (19 кастрычніка 2018).
  7. ↑ Мария Никулашкина (1 лютага 2019) "Сказала, что тренер сделал из меня машину для убийств". Про крутое прозвище Соболенко (рас.). Спорт-Экспресс.
  8. ↑ Арина Соболенко выиграла турнир в Шэньчжэне. Это ее третий титул (рас.). Eurosport (5 студзеня 2019).
  9. ↑ Міхалевіч, Ю. (5 лютага 2019) «Хотим отомстить за прошлогоднее поражение». Соболенко и компания нацелены на победу в FedCup (рас.). СПОРТ.TUT.BY. Архіўная копія ад 24 жніўня 2019 г.
  10. ↑ Арына Сабаленка выйграла малы падагульняючы турнір WTA. Belarus.by (28 кастрычніка 2019).
  11. ↑ Соболенко не сумела выйти в третий круг "Ролан Гаррос" (рас.). РИА Новости Спорт (30 мая 2019).
  12. ↑ Соболенко в двух сетах проиграла Рыбариковой в первом круге Уимблдона (рас.). championat.ru (1 ліпеня 2019).
  13. ↑ 'I’m playing my tennis and stopped copying others' — Zheng stumps Sabalenka for first WTA title in San Jose. WTA Tennis.
  14. ↑ 'I probably owe her two dinners' — Putintseva surges to Sabalenka upset for best US Open run. WTA Tennis.
  15. ↑ Mertens, Sabalenka capture first Grand Slam title in women’s doubles at US Open. WTA Tennis.
  16. ↑ Chiesa, Victoria (28.09.2019). Kudermetova and Duan win Wuhan in team debut: 'It's an unbelievable week'. WTA Tennis.
  17. ↑ Aryna Sabalenka edges out doubles partner Elise Mertens to take WTA Elite Trophy semi-final place. Fox Sports Asia.
  18. ↑ 'It’s really impressive' — Sabalenka slides past Bertens to claim Zhuhai championship. WTA Tennis.
  19. ↑ Соболенко проиграла Кр. Плишковой и не смогла защитить титул в Шэньчжэне (рас.). Sport24 (7 студзеня 2020).
  20. ↑ Sabalenka shocks Halep in Adelaide upset. WTA.
  21. ↑ J&T Banka Ostrava Open 2020. У Арины Соболенко титул в одиночном разряде! (рас.). Белорусская теннисная федерация (25 кастрычніка 2020).
  22. ↑ Соболенко выиграла турнир в Линце, завоевав третий титул в сезоне (рас.). ООО «Национальный спортивный телеканал» (15 лістапада 2020).
  23. ↑ Арина Соболенко разгромила Веронику Кудерметову и выиграла первый турнир нового сезона WTA (рас.). Eurosport (13 студзеня 2021).
  24. ↑ Superb Sabalenka storms to third straight title in Abu Dhabi. WTA.
  25. ↑ Sabalenka captures WTA World No.1 doubles ranking. WTA.
  26. ↑ Garbiñe Muguruza edges Aryna Sabalenka in Doha epic. Tennis.com.
  27. ↑ Muguruza repeats in Sabalenka thriller, Mertens awaits in Dubai. Tennis.com.
  28. ↑ Sabalenka shocks Barty for Madrid title. BBC Sport.
  29. ↑ Sabalenka captures Madrid title in thriller over Barty. WTA.
  30. ↑ Azarenka and Sabalenka Sent Out Tokyo Olympics 2021 Warnings After Claiming WTA Berlin Title. Essentially Sports.
  31. ↑ Berkok, John (12.07.2021). Ranking Reaction: Shapovalov back in Top 10, Sabalenka up to No. 3. Tennis.com.
  32. ↑ Sabalenka passes Jabeur test; Pliskova sails past Golubic into Wimbledon semis. WTA.
  33. ↑ Георгий Сосно (26 ліпеня 2021) Арина Соболенко завершила выступление на Олимпиаде-2020 в Токио (рас.) championat.com
  34. ↑ Tignor, Steve (14.08.2021). Karolina Pliskova plays clean match to defeat Aryna Sabalenka in Montreal. Tennis.com.
  35. ↑ Berkok, John (23.08.2021). Ranking Reaction: Aryna Sabalenka passes Naomi Osaka for No. 2. Tennis.com.
  36. ↑ Арина Соболенко не смогла пробиться в финал US Open. БелТА.
  37. ↑ Sabalenka withdraws from Indian Wells. BBC Sport.
  38. ↑ After hitting 18 double faults, Aryna Sabalenka loses season opener to Kaja Juvan in Adelaide. Tennis.com.
  39. ↑ Umpire intervenes as star’s serve falls apart. WWOS Nine.
  40. ↑ Swiatek surges past Cirstea, Kanepi upsets Sabalenka to make Australian Open quarters. WTA.
  41. ↑ Aryna Sabalenka becomes highest seed to fall at Australian Open, beaten by Kaia Kanepi in fourth round. Eurosport.
  42. ↑ 2022 Australian Open R16: Aryna Sabalenka vs Kaia Kanepi. Tennis Abstract.
  43. ↑ Ostapenko wins 9th straight match; Swiatek sweeps into Doha semis. WTA.
  44. ↑ Sabalenka topples Badosa to reach second straight Stuttgart final. WTA.
  45. ↑ Anisimova dethrones defending champion Sabalenka in Madrid. WTA.
  46. ↑ World number one Swiatek into Rome Open final. BBC Sport.
  47. ↑ Giorgi upsets Sabalenka at French Open; Kasatkina awaits in Round of 16. WTA.
  48. ↑ Treisman, Rachel (20.04.2022). Wimbledon bans Russian and Belarusian players — including No. 2 Medvedev. NPR.
  49. ↑ Swiatek and Sabalenka renew rivalry in US Open semifinals. WTA.
  50. ↑ Sabalenka and Kasatkina qualify for 2022 WTA Finals. WTA.
  51. ↑ Road to the WTA Finals: Aryna Sabalenka. WTA.
  52. ↑ Aryna Sabalenka stuns No. 1 Iga Swiatek to reach first final at WTA Finals. Tennis.com.
  53. ↑ Sabalenka upsets Swiatek to reach WTA Finals championship match. WTA.
  54. ↑ Sabalenka stops Noskova for 11th career title at Adelaide 1. WTA.
  55. ↑ Беларуска Арына Сабаленка выйграла Australian Open. Радыё Свабода, 28-01-2023
  56. ↑ By the numbers: Krejcikova ends Sabalenka’s winning streak in Dubai. WTA.
  57. ↑ Rybakina tops Sabalenka to win Indian Wells title. WTA.
  58. ↑ Muchova topples Sabalenka at French Open; makes first Grand Slam final. WTA.
  59. ↑ Rankings Watch: Sabalenka, Gauff-Pegula duo headline historic shakeup. WTA.
  60. ↑ Carayol, Tumaini (5.11.2023). Iga Swiatek into final after dominant win over Aryna Sabalenka at WTA Finals. The Guardian.
  61. ↑ Iga Swiatek returns to No. 1 with WTA Finals win over Jessica Pegula. ESPN.
  62. ↑ Sabalenka bests Azarenka; to renew rivalry with Rybakina in Brisbane final. WTA.
  63. ↑ Rybakina races past Sabalenka to win Brisbane International. WTA.
  64. ↑ Parry, Martin (27.01.2024). Dominant Sabalenka crushes Zheng to defend Australian Open title. Yahoo! Sport.
  65. ↑ Ronald, Issy (27.01.2024). Aryna Sabalenka successfully defends women's Australian Open title, defeating Zheng Qinwen in dominant fashion. CNN.
  66. ↑ Braidwood, Jamie (27.01.2024). Aryna Sabalenka’s dominant Australian Open defence completes a stunning transformation. The Independent.
  67. ↑ Australian Open 2024 women’s final result: Aryna Sabalenka beats Zheng Qinwen in Melbourne. BBC Sport.
  68. ↑ Swiatek vs. Sabalenka: Everything you need to know about the Madrid final. WTA.
  69. ↑ Iga Swiatek defeats Aryna Sabalenka in epic Madrid Open final. Eurosport.
  70. ↑ Sabalenka withdraws from Wimbledon due to shoulder injury. WTA.
  71. ↑ Sabalenka beats Swiatek to reach Cincinnati final. BBC Sport.
  72. ↑ Sabalenka wins first title since Australian Open. BBC Sport.
  73. ↑ World No. 2 Aryna Sabalenka wins US Open over American Jessica Pegula for third grand slam singles title. CNN.
  74. ↑ Aryna Sabalenka bests American hope Jessica Pegula for U.S. Open title in New York City. NBC News.
  75. ↑ Aryna Sabalenka replaces Iga Swiatek at top of WTA rankings. BBC Sport.
  76. ↑ Zheng into last four of Finals as Sabalenka loses. BBC Sport.
  77. ↑ Carayol, Tumaini (5.11.2024). Gauff storms to second-ever win over Swiatek at WTA Finals in Riyadh. The Guardian.
  78. ↑ Aryna Sabalenka voted Player of the Year as WTA Awards Week kicks off. WTA.
  79. ↑ Sabalenka voted WTA Player of the Year. BBC Sport.
  80. ↑ Sabalenka wins Brisbane title; Osaka retires in Auckland. BBC Sport.
  81. ↑ No.1 Sabalenka holds off Polina Kudermetova to win Brisbane title. WTA.
  82. ↑ Australian Open: Keys upsets 2-time champion Sabalenka in women’s final for 1st Grand Slam title. AP News.
  83. ↑ Alexandrova stuns Sabalenka in third-set tiebreak for sixth straight win. WTA.
  84. ↑ Sabalenka wins in Dubai; Zheng and Andreeva matches postponed to Wednesday. WTA.
  85. ↑ Aryna Sabalenka defeats Jessica Pegula, wins Miami Open. ESPN.
  86. ↑ Ostapenko defeats Sabalenka for first time to claim Stuttgart title. WTA.
  87. ↑ Jelena Ostapenko stuns Aryna Sabalenka to win Tennis Grand Prix in Stuttgart. The New York Times.
  88. ↑ Aryna Sabalenka’s Madrid win makes a bigger title in Paris look more possible than ever. Tennis.com.
  89. ↑ Aryna Sabalenka surpasses 11,000 ranking points, joins Serena and Iga on exclusive list. Tennis.com.
  90. ↑ A champion’s heart: Gauff defeats Sabalenka to win French Open. WTA.
  91. ↑ Belarus stuns Switzerland to reach 1st Fed Cup final. USA Today.
  92. ↑ Germany beats Belarus 3–2 to make Fed Cup final four. Tennis.com.
  93. ↑ Kuzmova claws Slovakia back into contention in Minsk. Fed Cup.
  94. ↑ Lapko and Marozava launch Belarus back into the World Group. Fed Cup.

Вонкавыя спасылкі

[рэдагаваць | рэдагаваць код]
Атрымана з «https://be-tarask.wikipedia.org/w/index.php?title=Арына_Сабаленка&oldid=2629730»