Іван Шальманаў
| Іван Шальманаў | |
| Асабістыя зьвесткі | |
|---|---|
| Нарадзіўся | 5 верасьня 1936 |
| Памёр | 10 ліпеня 1993 (56 гадоў) |
| Літаратурная дзейнасьць | |
| Род дзейнасьці | пісьменьнік |
Іван Ігнатавіч Шальманаў (5 верасьня 1936, в. Каромка, Буда-Кашалёўскі раён, Гомельская вобласьць — 10 ліпеня 1993) — беларускі празаік.
Біяграфія
[рэдагаваць | рэдагаваць крыніцу]Нарадзіўся 5 верасьня 1936 году ў в. Каромка Буда-Кашалёўскага раёна Гомельскай вобласьці ў сялянскай сям’і. У 1955 годзе скончыў Рагінскую сярэднюю школу і быў прызваны ў Савецкую Армію.
З 1958 году працаваў на Менскім цагельным заводзе, качагарам на паравозе, сьлесарам на розных прадпрыемствах Менску. З 1968 году — літаратурны супрацоўнік рэдакцыі газэты «Связист Белоруссии», рэдактар на Беларускім радыё. З 1975 году — рэдактар, намесьнік дырэктара Менскага абласнога дому народнай творчасьці. У 1976—1979 гадох — старшы рэдактар Менскага экспэрымэнтальна-канструктарскага тэхналягічнага бюро скургалянтарэйнай і фурнітурнай прамысловасьці. У 1981 годзе скончыў Вышэйшыя літаратурныя курсы ў Маскве. З таго часу працаваў на Беларускім радыё. Сябра Саюзу пісьменьнікаў СССР з 1977 году[1].
Памёр 10 ліпеня 1993 году[2].
Творчасьць
[рэдагаваць | рэдагаваць крыніцу]Першае апавяданьне «Сябры» надрукавана ў 1960 годзе ў газэце «Чырвоная зьмена». Пісаў нарысы, апвяданьні, аповесьці. Аўтар зборніка апавяданьняў «Дзень пачаўся» (1969), аповесьцяў «Зарыва ў начы» (1968), «Цагельня» (1977). Творы перакладаліся на польскую і расейскую мову.
Крыніцы
[рэдагаваць | рэдагаваць крыніцу]- ^ Іван Шальманаў // Беларускія пісьменнікі (1917—1990): Даведнік; Склад. А. К. Гардзіцкі. Нав. рэд. А. Л. Верабей. — Мн.: Мастацкая літаратура, 1994. — 653 с.: іл. ISBN 5-340-00709-X — С. 592
- ^ Шальманаў Іван Ігнатавіч
Літаратура
[рэдагаваць | рэдагаваць крыніцу]- Іван Ігнатавіч Шальманаў // Беларускія пісьменнікі: Біябібліяграфічны слоўнік. У 6 т. / пад рэд. А. І. Мальдзіса. — Мн.: БелЭн, 1992—1995.