VOLYA

„VOLYA“ — беларускі фальклёрны ансамбль, які базуецца ў Сіэтле, штат Вашынгтан (ЗША). Створаны вакалісткамі Воляй Дземкай і Вольгай Сухавер у 2009 годзе.

Місія гурта — захоўваць і дэманстраваць, у асноўным сярод жыхароў Ціхаакіянскага Паўночнага захаду, багацьце і прыгажосьць беларускага фальклёру.

Склад

Калектыў складаецца зь пяці чалавек, глыбока зьвязаных зь Беларусьсю і яе культурай:

Воля Дземка
Дарынка Шапавалава
Вольга Сухавер
Раіса Асрыянц
Раіса Крык

Дыскаграфія

Альбомы

2010 Queen Earth («Каралеўна зямля»)
2014 Long Journey («Вялікая дарога»)
2018 Forest Tweets («Лясныя гуканьні»)

Сінглы

2015 Goldberry («Златавіка») (з Мэтам Блэрам)

Кліпы

Малады кароль / Каралю (2013), — музычнае відэа з удзелам калектыва Дзіна Хаака. Прадусарка і рэдактарка Воля Дземка, апэратарская работа Воля Дземка, Фуонг Бокс, Крыс Моблі.

Дзейнасьць

VOLYA сьпявае традыцыйныя песьні з розных рэгіёнаў Беларусі, апроч таго, выканальніцы выступаюць у аўтэнтычных народных строях ручной работы, якія былі падараваныя калектыву беларускімі вяскоўцамі.

Воля Дземка:
«Я сама пачала сьпяваць архаіку ў гурце «Гуда», сьпяваю ўжо 16 гадоў, і за гэты час тое-сёе адшліфавала.
Ведаеце, мы звыкліся з бабулінымі сьпевамі, ніколі і не думалі, што яны нейкія зусім ледзь не іншапланетныя. А я калі пачула, як сьпяваюць маладыя дзяўчаты — усё. Зачапіла мяне і не адпусьціла.
Спачатку хацела прыйсьці на рэпетыцыю «Гуды» толькі паслухаць, бо сама сьпяваю з пяці гадоў па харах усялякіх. Дзеўкі сказалі: «Канешне, прыходзь», — а калі прыйшла, сказалі, што ў іх усе спяваюць і ніхто так не сядзіць. Ну і амаль прымусілі сьпяваць разам зь імі».

Гурт пастаянна ўдзельнічае ў музычных праектах, якія адбываюцца ў Вашынгтане, Арэгоне і Ванкувэры, Брытанская Калюмбія.

У 2010 годзе калектыў VOLYA стварыў дабрачынную некамэрцыйную арганізацыю «Цэнтр даследаваньняў, збору і рэстаўрацыі матэрыяльнай і нематэрыяльнай беларускай культуры». Валянтэры зьбіраюць і аднаўляюць аўтэнтычныя беларускія касьцюмы і падтрымліваюць аўдыякалекцыю аўтэнтычных беларускіх народных песень і бібліятэку апублікаваных матэрыялаў, зьвязаных зь беларускай народнай творчасьцю, гісторыяй і культурай. Сабраныя матэрыялы перакладзеныя на ангельскую мову, каб зрабіць іх дасяжнымі для шырокай аўдыторыі.

Беларускія народныя песьні лічацца самымі старажытнымі песьнямі ў Эўропе. У 2016 годзе Воля Дземка падрыхтавала дакумэнтальны фільм пра зьнікаючыя культурныя традыцыі Беларусі — The Songs of Old Europe — Ancient Belarusian Folk Songs («Песьні старой Еўропы: старажытныя беларускія народныя песьні»). Матэрыялы для фільма былі сабраныя падчас адмысловых этнаграфічных экспэдыцый па аддаленых беларускіх вёсках: Воля Дземка здымала спэктаклі і інтэрвію са старэйшынамі і занатоўвала песьні пра вясельлі, каханьне, плач і бітвы.

Фільм быў цёпла сустрэты амэрыканскімі і беларускімі гледачамі і атрымаў шэраг узнагарод — сярод іншага стаў пераможцам міжнароднага кінафэстывалю Creatіоn Internatіоnal Fіlm Festіval 2016, Summer Session (Канада) і атрымаў платынавую ўзнагароду «Рэмі» на 50-м міжнародным кінафэстывалю Houston WordFest 2017 у Х’юстане (ЗША). У 2020 годзе гэта дакумэнтальная стужка была апублікаваная на YouTube.

Прэса

Беларускі гурт зь Сіэтлу — «Дзічэй за індзейцаў» — 5.12.2015, Tuzinfm.by
Песня как документ далеких веков — 19.09.2016, Белорусы и рынок
Гісторыя паляшучкі, якая стварыла ў ЗША першы дакументальны фільм пра беларускія песні — 21.10.2016, media-polesye.by
Старая Еўропа: самапазнанне — 6.06.2018, Літаратура і мастацтва
«Паболей бы такіх фільмаў для людзей» — 20.04.201, velvet.by
«Неглюбскую кашулю выкупіла на eBay» — 6.03.2021, Наша НіNa
«Глядзіце, у нас ёсьць такое!» Як беларуска з Амэрыкі зрабіла каталёг беларускага традыцыйнага адзеньня — 30.03.2021, Радыё Свабода

Вонкавыя спасылкі