Iļģi

Iļģi
Гады	з 1981
Краіна	Латвія
Месца ўтварэньня	Латвія
Мова	латыская
Жанр	фолк-рок народная музыка
Выдавец	UPE
Удзельнікі	Ілга Рэйзьніецэ Марыс Муктупавэлс Гатыс Гаўеніекс Эганс Кронбэргс Мартыньш Ліндэ
Былыя ўдзельнікі	Юрыс Рыекстыньш Бірута Озалыня Занэ Шмітэ Мара Калныня Гунтарс Габранаўс Гінтс Суола Арналдс Дале Яніс Абэнс Арнальдс Каркліс Юрыс Кройчс Вілніс Струодс
ilgi.lv

«Iļģi» — латвійскі постфолк-рок-гурт з Рыгі, заснаваны ў 1981 року. Выконвае творы на народныя матывы ў творчай аранжыроўцы і з характэрным рок-гучаньнем. Лічыцца піянэрам латыскай постфальклёрнай музыкі.

Мінуўшчына

Гурт 21 красавіка 1981 року заснавала выпускніца Музычнае акадэміі імя Язэпса Віталса(lv) Ілга Рэйзьніецэ, прафэсійная скрыпачка і ўдзельніца ВІА «Bizīteri» і «Skandinieki». Сьпярша ўдзельнікі «Iļģi» займаліся вандроўкамі па краіне з мэтай зьбіраньня народных традыцыяў, песьняў, шылі строі і ладзілі ўласныя інструмэнты, на якіх выконвалі народную музыку ў аўтэнтычнай манэры. Пазьней гэтыя запісы ўвайшлі ў складанку зь дзьвюх кружэлак «Agrie gadi» (2002).

Пазьней музыкі вырашылі спалучыць фолк з уласнымі густамі і інтэрпрэтацыямі. Зьявіліся новыя ўдзельнікі, інструмэнты: кокле(lv), дуда і нават акустычная гітара, што на той час было рэвалюцыяй у латыскай народнай музыцы. У першы альбом «Rāmi, rāmi» ўжо ўвайшлі, акрамя народных, уласныя аранжыроўкі гурту, больш павольныя, мэдытацыйныя. Падобны характар мае й альбом «Riti riti».

Пазьней музыкі гурту пачалі ўжываць электрычныя інструмэнты, каб зламаць стэрэатып пра цікавасьць да традыцыйнае музыкі толькі сярод старэйшага пакаленьня. Толькі ў сярэдзіне 1990-х гадоў гурт нарэшце пачаў карыстацца папулярнасьцю на радзіме. У альбоме 1998 року «Saules meita», які стаў ключавой падзеяй у гісторыі латыскае музыкі, заўважны схіл «Iļģi» да поп- і рок-музыкі, што палегчыла ўспрыняцьце ягонай творчасьці слухачамі. У 2002 року выйшла кружэлка «Spēlēju, dancoju» — фольк-рок-опэра зь песьнямі ў розных стылях. Гэтыя пошукі працягнуліся і ў наступным альбоме «Kaza kāpa debesīs».

3 сьнежня 2011 «Iļģi» адзначыў 30-гадовы юбілей вялікім аншлягавым канцэртам у Рызе, у канцэртавай залі «Palladium».

Удзельнікі

• Ілга Рэйзьніецэ (сьпеў, скрыпка)
• Марыс Муктупавэлс (сьпеў, куоклес, дуда, дудка, варган)
• Гатыс Гаўеніекс (сьпеў, бас(en), віела(en), мандаліна, домра, бубен(en))
• Эганс Кронбэргс (гітара, балалайка)
• Мартыньш Ліндэ (пэркусія)

Былыя

• Яніс Абэнс
• Гунтарс Габранаўс
• Арналдс Дале
• Мара Калныня
• Арнальдс Каркліс
• Юрыс Кройчс
• Бірута Озалыня
• Юрыс Рыекстыньш
• Гінтс Суола
• Вілніс Струодс
• Занэ Шмітэ

Дыскаграфія

Альбомы

Рок	Выданьне	Назва	Па-беларуску
1993	MC «RiTonis»	Rāmi, rāmi	«Спакойна, спакойна»
	CD, MC «Plate Records»	Bāreņu dziesmas / Šūpuļdziesmas	«Сіроцкія песьні»
1996	CD «Labvakar»	Riti, riti	«Круці, круці»
1998	CD, MC «Upe»	Saules meita	«Дачка сонца»
2000	CD «Upe»	Sēju vēju	«Сею-вею»
2002	CD «Upe»	Spēlēju, dancoju	«Сьпяваю, танцую»
2003	CD «Upe»	Kaza kāpa debesīs	«Залезла каза на неба»
2004	CD «Lauska»	Rāmi un ne	«Спакойна і не»
2005	CD «Upe tuviem un tāliem»	Totari	«Тотары»
2006	CD «Upe»	Ne uz vienu dienu	«Не на адзін дзень»
2008	CD «Iļģi»	Ej tu dejot	«Хадзем танчыць»
2009	CD «Platforma Records»	Īsākās nakts dziesmas	«Песьні найкарацейшай ночы»
2011	CD «Upe tuviem un tāliem»	Tur saulīte pērties gāja	«Туды сонца парыцца ішло»

Складанкі

Рок	Выданьне	Назва	Па-беларуску
2002	2 CD «Upe»	Agrie gadi	«Раньнія гады»
2011	CD «Upe tuviem un tāliem»	Izlase	«Складанка»

Узнагароды

Гурт шэсьць разоў атрымліваў Латвійскую музычную прэмію(lv) за найлепшы сучасны альбом народнае музыкі(lv) (1998, 2002—2005, 2011).

Альбом «Ne uz vienu dienu» (2006) чатыры месяцы ўваходзіў у дзясятку эўрапейскага чарту народнае музыкі, дасягнуўшы там другога месца. У 2012 гурт вярнуўся ў эўрапейскія чарты на 4-ю пазыцыю з «Tur saulīte pērties gāja».

Вонкавыя спасылкі

• Афіцыйная бачына  (лат.) (анг.)
• Iļģi у Facebook (лат.)