Тоўстая Маргарыта

То́ўстая Маргары́та (па-эстонску: Paks Margareeta) — самая тоўстая вежа Талінскага гарадзкога муру, якая знаходзіцца ў канцы вуліцы Пік.

Гарматную вежу з 155 байніцамі Тоўстую Маргарыту пабудавалі ў пачатку XVI стагодзьдзя перад Вялікай марской брамай. Сваю назву яна атрымала за вялікія памеры — 25 мэтраў у дыямэтры і 20 мэтраў у вышыню. Сёньняшнюю назву вежа атрымала ў 1842 годзе, а да гэтага яе звалі проста Новай вежай.

З 1830 году вежу сталі выкарыстоўваць у якасьці турмы. Прыбудову зрабілі ў 1884–1885 гадох (першы ад пачатку прызначаны пад турму будынак у Таліне). У сакавіку 1917 году вежу спалілі. У 1930 годзе ў пустуючай вежы разьмясьцілі Музэй Гісторыі.

У цяперашні час вежа адноўлена, рэстаўрыраваная і ў ёй знаходзіцца Марскі музэй Эстоніі.