Палац Сапегаў (Менск)

Стан сядзібы Сапегаў у 1920-я

Палац Сапегаў — меская сядзіба магнатаў Сапегаў у Менску.

Знаходзіўся на Юраўскай вуліцы (частка кварталу сучаснага Палаца Рэспублікі). Дом быў абкружаны цудоўным садам і доўгі час лічыўся адным з найлепшых у месьце.

Гісторыя

За часамі Паўночнай вайны (1700—1721), з 15 лютага да 13 сакавіка 1706 року тут жыў Пётар I. Гаспадар палаца — Казімер Ян Сапега (1637—1720) у той час быў кашталянам Менску.

Дом Сапегаў існаваў да Другой Сусьветнай вайны.

Архітэктура

Будынак быў мураваны двухпавярховы. Да яго прыбудавалі тамбур, які завяршаўся трыкутным франтонам. У цэнтры фасаду — лесьвічны вузел, па абодвух баках якога разьмяшчаліся жылыя памяшканьні.

У XIX ст. зьявілася яшчэ адна прыбудова.

Цікавыя факты

• У садзе, які абкружаў сядзібны дом, гаспадар разводзіў каштоўныя гатункі яблынь і грушаў, што давалі садавіну чорнага колеру. Грушы былі прывезеныя дочкамі Казімера Сапегі з Францыі, вырашчаныя тут і атрымалі распаўсюджваньне ня толькі ў Менску, але і за яго межамі пад назвай сапяжанак.
• Бацька расейскай імпэратрыцы Кацярыны I Іван Скаваршчук (Скаўронскі) у 1670—1780-я служыў у гаспадара палаца Казімера Яна Сапегі, пакуль ня ўцёк ад яго ў Эстляндыю, дзе і нарадзілася будучая імпэратрыца. Падчас кіраваньня Кацярыны I расейскі ўрад пачаў выкупляць з прыгону ў абшарнікаў Вялікага Княства Літоўскага яе братоў і сясьцёр.

Літаратура

• Памяць: Гіст.-дакум. хроніка Мінска. У 4 кн. Кн. 1-я. — Мн.: БЕЛТА, 2001. — 576 с.: іл. ISBN 985-6302-33-1.
• Христофор Хилькевич. Эх, вдоль по Юрьевской... // Туризм и отдых, 23 ноября 2006. — С. 18.

Вонкавыя спасылкі

• Палац Сапегаў (г.зв. «Дом Пятра І») (рас.) на Менск стары і новы