Дабравесьце новага стагодзьдзя

	«Дабравесьце новага стагодзьдзя»
	яп. 新世紀エヴァンゲリオン
яп. 新世紀エヴァンゲリオン ; (Дабравесьце новага пакаленьня)
Жанр	Мэха, постапакаліптыка, псыхалягічны трылер
тэлесэрыял
Рэжысэр	Хідэакі Анна
Прадусар	Нарыка Кабаясі; Ютака Сугіяма;
Кампазытар	Сыро Сагісу
Студыя	Гайнакс; Тацунока Про; НАС;
Ліцэнзіят	Madman Entertainment (Аўстралазія); ADV Films (Брытанскія астравы); AEsir Holdings (Паўночная Амэрыка);
Тэлесетка	TXN (ТБ Токіё)
Прэм’ера	4 кастрычніка 1995 (27 гадоў таму)
Сэрыяў	26
Мова	японская

«Дабраве́сьце но́вага стаго́дзьдзя» (трансьліт. «Сынсэйкі Эванґеліён») — японскі навукова-фантастычны анімэшны тэлесэрыял рэжысэра Хідэакі Анна, прэзэнтаваны на ТБ Токіё ў 1995 року.

«Эванґеліён» — апакаліптычнае анімэ, дзеяньне якога адбываецца ў Токіё празь пятнаццаць гадоў пасьля глябальнай катастрофы. Галоўны герой — падлетак Сыньдзі, якога бацька аддаў на службу ў сакрэтную арганізацыю «Нэрв», каб пілятаваць гіганцкага біяробата пад назвай «Эванґеліён» у змаганьні з пачварнымі істотамі — Анёламі.

Тэлесэрыял аказаў значны ўплыў на аднаўленьне цікавасьці да анімэ. У франшызе выйшлі фільм, манґа, дамашняе відэа і іншыя прадукты, валавы даход ад продажу якіх да 2007 року дасягнуў 150 мільярдаў енаў.

Сюжэт[рэдагаваць | рэдагаваць крыніцу]

Прапусьціць

Увага: ніжэй знаходзіцца зьмест, які раскрывае сюжэт твору.

У 2015 року, празь 15 гадоў ад глябальнай катастрофы, называнай «Другім ударам», Ґэнда Ікары, кіраўнік ваенізаванай спэцгрупы «Нэрв», прыводзіць свайго сына, падлетка Сыньдзі Ікары, у футурыстычнае места Токіё-3. Сыньдзі становіцца сьведкам бітвы сілаў ААН супраць Анёла, аднаго з прадстаўнікоў расы пачвараў, абуджэньне якіх было прадказанае скруткамі Мёртвага мора. Анёлы валодаюць амаль непрабівальнымі сілавымі шчытамі, адолець якія можа толькі спэцыяльная зброя «Нэрву»: гіганцкія біяробаты Эванґеліёны, якія кіруюцца нэрвовымі імпульсамі сваіх пілётаў і валодаюць уласнымі сілавымі шчытамі. Афіцэр «Нэрву» Місата Кацурагі суправаджае Сыньдзі ў падземны комплекс арганізацыі, дзе ягоны бацька прымушае да кіраваньня Эванґеліёнам №01 у змаганьні з Анёлам. Непадрыхтаваны Сыньдзі хутка агаломшаны ў бітве, аднак ягоны Эванґеліён у лютасьці сам па-барбарску забівае Анёла.

Пасьля шпіталізацыі Сыньдзі пачынае трэніравацца зь Місата і пасяляецца ў Токіё-3. У другім баі Сыньдзі зьнішчае Анёла, але пасьля ў разгубленасьці ўцякае. На ягоным шляху паўстае Місата, і Сыньдзі вырашае працягнуць службу пілётам. Цяпер спэцаддзел «Нэрву» мусіць перамагчы 14 астатніх Анёлаў, каб пазьбегнуць Трэцяга ўдару, які канчаткова зьнішчыць сьвет. Тым часам Сыньдзі спрабуе пасябраваць зь пілёткай Эванґеліёна №00 — загадкавай сацыяфобкай Рэй Аянамі. Зь ейнай дапамогай Сыньдзі перамагае яшчэ аднаго Анёла. Пасьля да іх далучаецца пілёт Эванґеліёна №02, рознаталентавую, але невыносную дзяўчыну Асуку Лэнглі Сор’ю, нямецкую японку, якая пражывае ў Амэрыцы. Утраёх яны зьнішчаюць яшчэ некалькіх Анёлаў.

Сыньдзі вымушаны біцца з заражаным Эванґеліёнам №03 і назіраць, як паранены ягоны пілёт, аднаклясьнік тодзі Сузухара. Асука пасьля паразы губляе сваю самаўпэўненасьць і ўпадае ў дэпрэсію, якая яшчэ болей пагаршаецца пасьля наступнай бітвы супраць Анёла Араэля, які атакуе ейны мозаг і выпускае ейныя найгоршыя страхі ды няўпэўненасьці. У наступным баі Рэй самаразбурае Эванґеліёна №00 і гіне, ратуючы жыцьцё Сыньдзі. Місата і Сыньдзі наведваюць шпіталь, дзе яны знаходзяць Рэй жывой, аднак тая называе сябе «трэцяй Рэй». Місата вымушае Рыцука адкрыць таямніцы «Нэрву», паказаць звалку Эванґеліёнаў і сыстэму, якая дзейнічае на клёнах Рэй. Усе гэтыя падзеі бянтэжаць Сыньдзі і аддаляюць яго ад іншых. Наўзамен здранцьвелай Асуцы кіраваць Эванґеліёнам №02 прыходзіць Кавору Нагіса. Ён пасябраваў з Сыньдзі і заваяваў ягоны давер, аднак апынулася, што ён і ёсьць апошні Анёл, Табрыс. Кавору б’ецца з Сыньдзі, і, усьведамляючы, што ад ягонай сьмерці залежыць працяг існаваньня чалавецтва, сам просіць Сыньдзі забіць яго. Аднак сьмерць сябра выклікае глыбокія пакуты ў Сыньдзі.

Пасьля зьнішчэньня апошняга Анёла арганізацыя «Seele» запускае «Праект судзеяньня чалавецтву», які мусіць мэтанакіравана выклікаць эвалюцыю чалавека, у якой душы ўсіх людзей сальюцца ў адно праз Рэй. На гэтым этапе героі займаюцца самааналізам, і Сыньдзі ў канчатковым выніку пазбаўляецца нянавісьці да сябе, што дазваляе яму аб’яднацца зь іншымі.

Тут скончваецца зьмест, які раскрывае сюжэт твору.