Антон Кушнір

	Антон Кушнір
Пэрсанальная інфармацыя
Поўнае імя	Антон Сяргеевіч Кушнір
Нарадзіўся	13 кастрычніка 1984 (40 гадоў); Чырвонаармейск, Ровенская вобласьць, УССР
Грамадзянства	Беларусь
Прафэсійная інфармацыя
Спэцыялізацыя	фрыстайл (акрабатыка)
Цяперашнія трэнэры	Мікалай Казека
	Алімпійскія гульні

Вікіпэдыя мае артыкулы пра іншых асобаў з прозьвішчам Кушнір.

Анто́н Сярге́евіч Кушні́р (13 кастрычніка 1984, Чырвонаармейск, Ровенская вобласьць, УССР) — беларускі фрыстайліст (акрабатыка), алімпійскі чэмпіён, уладальнік Кубку сьвету 2009/2010 (выйграў 4 этапы з 6, адзін раз заняў другое месца й адзін раз трэцяе), срэбны прызэр агульнага заліку Кубку сьвету 2007 /2008, пераможца Кубку Эўропы-2004. Першы трэнэр — Галіна Пятроўна Досава. З 2002 году жыве й трэніруецца ў Беларусі (у Менску). Выступае за «Дынама» (Менск).

Удзельнік Алімпійскіх гульняў 2006, 2010 і 2014 гадоў. На Алімпіядзе-2010 у Ванкувэры, зьяўляючыся адным з галоўных фаварытаў турніру, у кваліфікацыі быў лідэрам пасьля першага скачку, але ў другім няўдала прызямліўся, у яго адшпілілася лыжа й у выніку Кушнір паказаў толькі 21-ы вынік у другой спробе, ня здолеўшы па суме 2 скачкоў прабіцца ў лік 12 фіналістаў.

На Алімпійскіх гульнях 2014 году ў Сочы стаў чэмпіёнам, зьдзейсьніўшы найскладанейшы скачок — трайное сальта зь пяцьцю піруэтамі — і паказаўшы найвышэйшы вынік 134,5 балы (дагэтуль рэкорд трымаў амэрыканец Эрык Бэргаўст, які на Алімпіядзе ў Нагана атрымаў за скачок 133,05 балы).

Вонкавыя спасылкі

Профіль на сайце FIS (анг.)
Профіль (анг.) на бачыне sports-reference.com