Trinitron

Люмінафор на 14" тэлевізары пры павелічэньні

Trinitron — брэнд кампаніі Sony для лінейкі кінэскопаў з апэртурнай рашоткаю, якія выкарыстоўваліся ў тэлевізарах і маніторах. Анансаваная ў 1966 року, сыстэма Trinitron заслужыла прызнаньне за яркі відарыс (на 25% ярчэй за звычайны кінэскоп зь ценевай маскай таго часу). Пастаяннае ўдасканаленьне тэхналёгіі і кантроль якасьці дазволілі Sony мець вялізныя прыбыткі ад продажу Trinitron-аў да 1990-х.

У 1996 року скончыўся тэрмін аховы тэхналёгіі Trinitron патэнтам, і неўзабаве зьявіліся ягоныя аналягі па значна меншых коштах. У адказ Sony прадставіла свой плоскі FD Trinitron, які дазволіў ім заставацца на лідзіруючых пазіцыях да пачатку 2000-х. Аднак гэтыя распрацоўкі параўнальна хутка былі пераўзыдзеныя плазмавымі і вадкакрышталічнымі тэхналёгіямі. Апошнія тэлевізары Trinitron зьніклі з каталёгаў прадукцыі Sony ў 2006 року, а іхняя вытворчасьць спынілася ў 2008. Маніторы ўсё яшчэ выпускаюцца ў нязначных колькасьцях.

Назва «Trinitron» паходзіць ад словаў Trinity (тройца) + tron (ад электроннай трубкі).