Назіраецца ў шыротах паміж +90° і −70°. Найлепш назіраецца ў 21:00 на працягу траўня.
Валасы́ Бэрэні́кі (або Валасы Верані́кі; па-лацінску: Coma Berenices, Com) — традыцыйны астэрызм, які цяпер зьяўляецца адным з 88 сучасных сузор’яў. Разьмешчаныя Валасы Бэрэнікі побач з Ільвом, да якога гэтая частка нябеснай сфэры раней належала; у сузор’і знаходзіцца і паўночны галяктычны полюс. Назва сузор’я зьвязаная з каралевай Бэрэнікай II, чые незвычайнай прыгажосьці валасы былі прынятыя на неба як ахвяраваньне, прынесенае ў знак падзякі за шчасьлівае вяртаньне яе мужа, караля Пталемэя III Эўергета, з вайны.