Канасамэнт

Канасамэнт — дакумэнт, які выдаецца перавозьнікам (звычайна марскім) тавару адпраўніку грузу, які засьведчае прыняцьце грузу да перавозкі і зьмяшчае абавязальніцтва перавозьніка выдаць груз у азначаным мейсцы трымальніку канасамэнту.

У гандлёвым абарачэньні канасамэнт — найважнейшы юрыдычны дакумэнт, які засьведчывае наяўнасьць дамовы перавозкі і канкрэтызуе ўмовы гэтае дамовы.

Канасамэнт ёсьць каштоўнай паперай, якая перадаецца па правілах перадачы каштоўных папераў (іменны, ордэрны канасамэнт альбо канасамэнт на прад'яўніка) і раўназначная перадачы грузу. Застрахаваны канасамэнт уключае таксама страхавы поліс.

Канасамэнт мусіць уключаць наступныя зьвесткі:

• перавозьнік і мейсца яго знаходжаньня
• порт пагрузкі паводле дамовы, дата прыёму грузу перавозьнікам
• адпраўнік, мейсца яго знаходжаньня
• порт прызначэньня згодна дамове
• атрымальнік, калі такі пазначаны ў дамове
• найменьне грузу, неабходныя для ідэнтыфікацыі грузу маркі, аб'ём ці колькасьць грузу
• зьнешні стан грузу і яго пакунку
• фрахт у памеры, у якім яго мае плаціць атрымальнік
• колькасьць арыгіналаў канасамэнту, калі іх больш, чым адзін
• подпіс перавозьніка ці асобы, што дзейнічае ад яго імя

Па пагадненьню паміж бакамі ў канасамэнт могуць быць уключаныя іншыя дадзеныя.

Канасамэнт, падпісаны капітанам караблю, лічыцца падпісаным ад імя перавозьніка. Пасьля таго, як груз паладаваны на карабель, перавозьнік па патрабаваньні адпраўніка аддае яму бартавы канасамэнт, у якім дадаткова пазначаецца, што груз знаходзіцца на борце пэўнага карабля ці караблёў, а таксама дата ці даты пагрузкі.